موقف صعب سبحان من صبرني

[hyundai 2005]

امبارح حصل ليا موقف وسبحان من الهمني الصبر احكي ليكم عليه
البدايه انا من النوع اللي مابيحبش يطلع بالعربيه داخل البلد عشان الزحمه والتكاتك وغيره من قرف وهم مقضيها تكاتك
المهم الجمعه الدنيا بتبقي رايقه والدنيا فاضيه والجماعه فالبيت طلبوا مني شويه حاجات للغداء المهم كنت تعبان وكسلان قولت اخد العربيه اكيد الدنيا فاضيه وكله تمام
نزلت الشارع وفعلا كانت شبه رايقه وقفت العربيه علي الجانب الاخر من الطريق وقبل المحل يعني كان بيني وبينها حوالي 16-17 متر بالظبط المهم عيني عليها علطول وصاحب المحل بيحضر ليا طلبي والاقي واحده معديه جنب العربيه وفي ايديها طفل عمره من 11-12 سنه والاقي الواد حاطط صباعه علي جنب العربيه من اولها وماشي قولت اللهم صبرني العيال غاويه تعمل الحركه دي تمسح خط تراب كده ولا يكسب اسمه من التراب اللي عليها مثلا المهم الواد جاب جنب العربيه من الرفرف الخلفي مرورا بالباب الخلفي والباب الامامي والرفرف الامامي الي ان وصل لنص الرفرف واذا بي المح بريق لماع ومشرق كالفضه في ضوء الشمس طالع من ايديك الولد ينهار اسود ولمده دقيقتين روحي فارقت جسدي وانا واقف عالارض وذهبت الي النعيم الاعلي ولكن لان ميعادي لم يأتي بعد عادت الي روحي مره اخري بعد غياب لايقل عن دقيقتين فتحت عيني وانا مصدوم عربيتي اللي بجدد رخصتها لتاني مره وحافظ عليها خلال رحله شيقه لمده عامين خاليه من اي خربوش او خدش تفقد عزريتها علي يد طفل
بدون تفكير جريت علي العربيه وابص الاقي خربوش بمطوه او قطر من اول الفانوس الخلفي للامامي رفيع جدا وعميق جدا عدي الي الصاج نطيت فالعربيه مافيش وقت ادير ضربت خمسايه العربيه لفت وسط استغراب الماره دخلت الشارع بسرعه رهيبه بحثا عن الولد وامه اخدت الشارع لاخره والشارع الفرعي لاخره كنت ناوي الف البلد كلها لحد ما الاقيه ومره واحده فكرت للحظه طيب اما تشوفه حتعمل ايه حتعدي عليه تهرسه وتروح فيه السجن ولا تمسكه تسحله سحله محترمه فالشارع وهو طفل ؟ ولا حتشتمه . ولا ولا ولا ........
لاقيت ان ايجاده مش حيجدي نفعا وحيدخلني في مشاكل .........
رجعت تاني المحل وانا مغموم واخدت طلبي اللي كلفني اكتر من فلوس الدنيا كلها .
قولت انا مش حرتاح الا لما احل الموضوع قولت اجرب اعملها ببولش وكامبوند المهم افتكرت اني اللي كانوا عندي خلصوا لفيت علي المحلات كله قافل واخيرا عثرت علي محل طلبت البولش والكامبوند بضرب ايدي في جيبي مالقيتش فلوسي كمان ؟؟؟؟؟؟؟؟
الحمد لله يعني هي جات عالفلوس .
روحت البيت وقبل اي حاجه خدت فلوس وطلعت تاني اجيب الحاجه روحت المحل قولتله هات بولش وكامبوند قاله ادي البولش والكامبوند مش موجود ؟ايه ؟ مش موجود ده هو المهم
لفيت تاني الي ان روحت لواحد صاحبي يمتلك فرن بويه نزلته من البيت مخصوص فتح وجابلي الكامبوند وكيس قطن وروحت
سميت الله ومسحت جنب العربيه وفردت الكامبوند وفاتك يا فرك رايح جاي رايح جاي . وامسح
وبعدين البولش افرد يا معلم ويلا دواير دواير .........
وامسح والنتيجه .......
الحمد لله لا اثر نهائي ؟ طب ازاي ده كان جايب الصاج ؟
اقولكم ازاي لان ربنا اراد ان يجازيني عن صبري وكظمي لغيظي .
الحمد لله علي كل شئ

[hyundai 2005]

.....

[sayed2077]

اسلوب الحكاية لوحده خلانى احس انى انا اللى فى الموقف مش انت

وعموما جزاك الله خيرا على كظمك غيظك والحمد لله انك متهورتش كان ممكن حاجه تحصل كده ولا كده وتقع فى مشاكل انت مش قدها
والحمد لله انها اتعملت

[تامر ديزل]

الحمد لله جت سليمة
وكويس ان حضرتك ما لحقتش العيل الفظيع ده

[nktis]

حاجه تحرق الدم فعلا....ويا طوله بالك ده لو معايا كان زمانوا مات...:w6w200504112247346 1