كيفية ضبط نور السيارة بالصور

[YahiaAshraf]

بسم الله الرحمن الرحيم

السلام عليكم ورحمه الله وبركاته
بصراحه انا مش عارف الموضوع ده اتعرض قبل كده فى المنتدى ولا لأ فسامحونى على التكرار ان وجد وندخل فى الموضوع بس نصيحه اللى عربيته لسه جديده او حتى قديمه بس مش لعب فى ضبط فوانيسها مش يقرا الموضوع لأنى مش بانصح ابدا بتغير ضبط المصنع لأن ده أكيد افضل ضبط
طبعا الكل عارف ان الإضاءة الأمامية من اهم اساسيات السيارة وممكن تخلى القياده ليلا جحيم او جنه والأهم من اللمبات هو ضبط الفانوس نفسه فى ناس كتييير مركبه زينون ومش مستمتعه بيه لعدم الوصول للضبط المثالى للفوانيس والفكرة مش لما الفانوس يعلى يبقى هيدى اضاءه افضل ,,, وعلشان انا دخلت فى موضوع ضبط الفوانيس ده ودخت على ماعرفت اوصل لضبط مضبوط لعربيتى السابقه بعد ماركبت زينون وبعدها وطيت الفوانيس علشان المقابل وبعدها شلت الزينون ورجعت للمض العاديه تانى هنا احترت مش عارف ارجع الفوانيس لأى مستوى من غير ما اذى المقابل طبعا دورت على النت كتير والمهم لقيت طريقة سهلة جدا لضبط الفوانيس

بس قبل ما ندخل فى الموضوع لازم ناخد بالنا من الأتى
- كاوتش العربية لازم يكون متظبط كويس لا نايم ولا زياده
- تانك البنزين يفضل انه يكون نصه مليان مش فاضى او متفول
- طبعا شنطه العربية تكون فاضيه

احنا محتاجين :
- حيطه مستويه
- أرضيه مستويه مش مايله ويفضل مش يكون فيها تعوجات
- مفك او مفتاح حسب نوعيه المسمار اللى بيعلى ويوطى النور
- طباشير
- متر للقياس
- كشاف صغير علشان ننور لنفسنا واحنا بنضبط النور
ودلوقتى نيجى للطريقه

اولا بسم الله الرحمن الرحيم
- طبعا كل فانوس فيه مفتاحين واحد بيحرك الفانوس لفوق وتحت والتانى بيحرك الفانوس يمين وشمال لازم نعرف اماكنهم قبل عمليه الضبط
- نجيب العربية قدام الحيطه ونقربها خالص من الحيطه ونور النور وبعدبن نرسم نقطه فى منتصف النور اللى على الحيطه مع مراعة انها تكون فى مساواة منتصف الفانوس (قدام الكريستاله أو اللمبه ) ونسمى النقطة دى وليكن a زى الصوره

- كده احنا عندنا نقتطين a فى نفس المستوى نرسم خطين واحد بالعرض وواحد بالطول زى الصوره

- نرجع العربية مسافة من 7 - 10 متر بس ناخد بالنا لازم المسافة تكون محسوبه كويس ( هنقيسها بالمتر من الفانوس وليس من الكاوتش ) ولازم واحنا بنرجع العربيه تكون فى خط مستقيم ودى مهمه جدا علشان الإتجاهات
- نيجى لأهم نقطه هنفتح الكابوت هنلاقى على الفانوس رقم زى 1.2% أو 1.0% او 1.3% وهكذا ... الرقم ده مهم جدا وبيختلف من عربيه للتانيه .. المهم نضرب الرقم ده فى المسافه اللى العربية رجعتها .. مثال : احنا نفرض اننا رجعنا العربية 8 متر والرقم بتاع الفانوس كان 1.2% يبقى 8 × 1.2 = 9.6 سم نقول 10 سم تقريبا
- نرجع تانى للحيطه ونرسم نقطه تحت النقطة a ب 10 سم ( ده الرقم اللى احنا حسبناه فوق ) ونسمى النقطه دة b بشرط انها تكون فى نفس الخط الطولى المار بالنقطه a
- نرسم خط تانى بالعرض موازى مار بالنقطتين b وموازى للخط العرضى المار بالنقطتين a زى الصورة

- الخط الأخضر فى الصورة هو اللى هنضبط عليه النور بحيث ال cutoff line بتاع النور يكون فى مستوى الخط اللى تحت وعلى يمين الزاويه بين الخط الأخضر والخط الطولى او النقطة b كما موضح فى الرسم التالى

- نلاحظ ان لازم الخط الأخضر يكون متزن يعنى مش مايل من ناحية ويكون ال cutoff لكل فانوس فى نفس المستوى ويعنى مش لازم يكون الفانوس اليمين أعلى من الشمال علشان المقابل زى ماهو معتقد عند البعض لأن كما ملاحظ ان ال cutoff بتاع النور أعلى من جهة اليمين بالتالى هو اقل من جهة الشمال والعكس فى العربيات المزوده بدريكسيون يمين وبالتالى انا بأنصح اى حد يجيب فانوس استيراد يخلى باله من النقطه دى لو لقى العربيه دريكسيون يمين مش يجيبه لأن هيلاقى النور أقوى من الشمال وضعيف فى اليمين وبالتالى مش هيشوف يمين الطريق كويس وهيسبب أذى كبير للمقابل
- دى نتيجه ضبط النور بس نلاحظ ان انا كنت مركب لمبات فيليبس x-treme power

.

ودى على طريق رملى بكاميرا الموبايل بالوضع العادى

- ودى صور من نفس المكان بالوضع الليلى

- ودى صوره من الخارج للنور الواطى

نلاحظ الأتى :
- انا كلامى كله عن النور الواطى لأن بمجرد ضبط النور الواطى العالى بيتضبط لوحده
- انا لما ضبط النور على الرقم اللى موجود على الفانوس ( 10سم كما فى المثال ) حسيت ان النور لسه عالى وطيته شويه حوالى 5 سم كمان علشان المقابل
- الزينون لازم نوطى الفانوس كمان شويه علشان نسبه اللإضاءه أقوى مش يأذى حد
- الصور اللى أنا استخدمتها من تصويرى على عربيتى اللانسر قبل ما ابيعها وتم التنفيذ فى شمال سيناء ايام ماكنت مكلف طبيب ريف هناك كنت فاضى مش لاقى حاجه اعملها ...

كده احنا خلصنا ياريت أعرف رايكم ويارب الموضوع يكون عجبكم ومفيد لكم
والسلام عليكم ورحمة الله وبركاته



منقول

[bunnybunny77]

شكرا

[خالداعزالناس]

:Bra vo:

[تامر ديزل]

[YahiaAshraf]

HPPY BUS