تقرير عن صيانة 35000 للفيرنا * Corsair *

طبعا انا شغال تأجيل في موضوع الصيانة ده بسبب الصيام والنهارده خدت فيفي عبده وطلعت جري علي نتاجاز علشان اشتري زيت فيسكو 3000 قبل ما اطلع علي مركز الخدمة

المهم اشتريت الجركن ب 120 جنيه بعد ما كان ب 115 زاد 5 جنيه مش مشكله اللي يجي في الزيت زحلقه

بعد ما اشتريت الزيت طلعت علي المعلم ابو غالي في العبور وكالعاده نقل مكانه من جنب سوق العبور ل امام كرفور العبور تقريبا كدا واخدها فسحه في العبور

بعد طبعا ما دخلت المركز واستنيت دوري علشان اسجل بيانات العربية صدمني مسئول الاستقبال وقالي لازم تكون حاجز يا عم يهديك يرضيك ابدا قالي مينفعش

قولتله والحل قالي في مركز جنبي هنا اسمه كار تك العبور وفعلا بعديه مفيش ب 100 متر المركز ده

المهم لقيت المركز ده معتمد لهيونداي واسكودا قولت فل ودخلت العربية من غير حجز وطبعا الاستقبال مفيش بعد كدا وسجلت بيانات العربية بعد ما طلع عيني علشان افهم اللي علي الاستقبال اللي انا عايزه تقريبا كدا شكله يا سوري يا افغاني

المهم كانت ملحظاتي

في تقطيع مع الفرامل بتيجي علي فترات

في تصفير في الكاوتش لما بدوس فرامل

العدادت الجديدة اللي انا مركبها عداد السرعه ناقص 10 كيلو

وجود تزييق بالعفشه

الباب اليمين مش بيقفل مع السنتر لوك

وكنت عايز اسلك الريداتير واغير الميه بس قالولي ديه في صيانة ال 40000 كيلو

المهم العربية اتعمل كل اللي طالبه فيها ما عدا شغل الكهربا واتصلوا بيا علشان اجرب العربية قبل شغل الكهربا

وروحت جربتها ولقيت العربية الحمد لله تمام كانو غيرو الزيت وشيكوا علي الفرامل وغيرو الفلتر بتاع الزيت وربطوا العفشه وكله تمام التمام

ورجعت سلمتهم العربية من تاني علشان شغل الكهربا

والعربية غطست بتاع ساعتين وبعدين اتصلوا بيا علشان استلم العربية روحت طبعا الخزنه وحاسبت علي تمن المصنعية وفلتر الزيت والحساب كان 159.50 جنيه

وروحت علشان استلم العربية لقيت العدادت زي ما هيه متعملش فيها حاجه ولقيت الباب اليمين زي ما هو طبعا روحت مصدرلهم الوش الخشب وفي اللقطه ديه عرفت المركز ده علي حقيقته الواد بتاع الريسيبشن مش عارف طبعا يرد عليا شوية يقولي التابلوه لازم يتفك كله علشان يعملوا العدادت قولتله تابلوه ايه يا عم النايم العدادت بتتشال من غير ما نيجي جنب التابلوه خالص قالي يبقي لازم نفك الدريكسيون قولتله نعم يا خويا طبعا هو مش فاهم حاجه ومش عايز يعملها وعمال يبرر بكلام فاضي وفي الاخر قالي الموضوع ده هياخد وقت وعندنا زحمه راح مجنني اكتر وابتدي صوتي بقا يعلي طب وام الباب متعملش ليه قالي ثواني كدا راح مدخل العربية تاني ورجعلي مفيش 5 دقائق قالي محتاج كالون كهربا وده مش موجود عندنا قولتله تــــــــيــــــــت قولتله كالون كهربا ايه يا عم انتا طبعا انا النهارده اجازتي وكنت اساسا رايح وانا مش طايق نفسي روحت فاضحهم وخدت العربية ومشيت وعفرت علي المركز كله بطلعتي بس عرفتهم انكم مينفعش تفتحوا مركز خدمه للعربيات اخركم مركز خدمه لعربيات البليله والفول وانتهي اليوم علي كدا ولسه بكره بقا ان شاء الله هروح اظبطهم عند واحد كهربائي حبيبي يا رتني كنت روحتله من الاول بدل القرف ده

بس يا جماعه ده كان اليوم العصيب وديه نهايته ونصيحتي ليكم محدش يهوب نحية المركز ده لان اغلبية الصنايعيه اطفال والله بتكلم جدا تشوفهم متدهمش 15 سنة

الميزة الوحيدة في المركز ده ان مفيش حجز وده اكيد لان الناس بتتجنبه وكمان سرعة انجاز العربية ومفيش زحمة غير كدا المركز ده كله سيئات

:k_c rying77[1]:

[amdd]

ولا يهمك يا ريس كويس انك عرفت المركز ده علشان تعلم عليه وتعرف الهيونداوية انه مش تمام,,بس معلش هى جت فيك انت.

[memo1100]

اية معلش بس عايز افهم حاجة علشان كدة انا وقعت
هو تكاليف صيانة الفيرنا 160 جنية بس ولا اية مش فاهم كورسير فهمنى ونبى انت عارف ال فيها انا مش فى مصروعايز اعرف كل حاجة بتفاصيل

بص يا غالي انا بشتري الزيت من بره وتكلفة الصيانة اللي بتبقي كل 5000 كيلو 120 جنيه + 25 جنيه فلتر زيت + 14.5 ضريبة يعني الاجمالي 159.5

يعني انا بروح صيانة ال 5000 وال 15000 وال 25000 وال 35000

وهكذا

لكن صيانة ال 10000 كيلو بتبقي اغلي وهو هو اللي بيتعمل في ال 5000 مفيش جديد

يعني انا شاري الزيت ب 120 جنيه يمشي 15000 كيلو

وتكلفة الصيانة بالكامل 159.5

يعني اجمالي المصاريف 280.5 لصيانة ال 35000 كيلو