تحذير هام

[hannibal]

السلام عليكم

ده أول موضوع ليا في المنتدى لكن مش أول مرة أدخله، بل يمكن بدخل المنتدى يوميا أكثر من مرة، لأني عاشق للسيارات من صغري ولأن المنتدى محترم فعلا والناس اللي فيه عارفين بيقولوا ايه مش مجرد أي كلام عن العربيات وخلاص.
أعرفكم بنفسي، اسمي فريد كرماني وبشتغل مترجم والنهاردة حصل موقف فعلا يجبر أي حد أنه يتكلم فيه بخصوص سرقة السيارات.
أنا عندي سيارة سكودا أوكتافيا والنهاردة أخويا الكبير، دكتور هو، كان عنده كشف خارج البلد (ساكن في شبين القناطر بالمناسبة) ولأنه مش بيعرف يسوق كويس قاللي تعالى وصلني ونرجع مع بعض.
خرجنا مع بعض ورحنا بس اتاخرنا شوية في الكشف، واحنا راجعين اللى حصل اننا على مشارف المقابر في الطريق لقيت شابين في سن المراهقة (ما بين 15 و 18 سنة) خرج فجأة مش عارف منين ورمى على البرابريز كيسين ماء مع سرعة السيارة وقذف الكيسين انفجروا بجد بشكل وحش جدا والمشكلة اني كنت فاتح كل الشبابيك.
وقفت بعده بحوالي 20 متر وبجد فتحت الباب وعفاريت الدنيا بتتنطط قدامي من اللي عمله، لقيت ان اللي رموا الكيسين دول مجرد دفعة أولية وكان فيه وراهم أكتر من 15 واحد ماسكين حاجات الله أعلم ايه هي (بعدها اخويا قاللي سلاح) بصراحة اتجمدت مكاني ثواني وركبت السيارة الحمد لله انها كانت لسة شغالة وطلعت على طول في ثواني.
ايه الحل مع العصابات دي؟ ايه اللي كان ممكن يحصل لو كان أخويا الكبير لوحده؟ بصراحة حسبتها على نفسي وعلى غيري وقلت الحمد لله إن ربنا سترها وحبيت بس أنبه الناس هنا في المنتدى عشان لو كان حد هنا من شبين القناطر ياخد باله كويس أوي وهو ماشي من جنب مقابر طحا.
وربنا يسترها مع الجميع يارب.

[حسام البورسعيدى]

حمدلله على سلامتك و سلامة اخو حضرتك يا استاذ فريد .. والحمد لله ان ربنا نجاك من البلطجية والمجرمين دول ..


ربنا يسترها علينا جميعا .. وشكرا لتحذيرك يا غالى ...

[hannibal]

يا الله.... والله ما كنت متصور حد يرد لأني عضو جديد، والشائع في المنتدى ده إن محدش بيرد على الجديد خالص ... ميرسي جدا وربنا يخليك والله

[mohamed selem]

الف حمدلله علي السلامه انت واخوك
انا اعرف مناطق في شبين القناطر وروحت ناحيه المقابر دي بس كان قبل الثوره
عموما الف حمدلله ع السلامه مره تانيه ليك ولاخوك

يا الله.... والله ما كنت متصور حد يرد لأني عضو جديد، والشائع في المنتدى ده إن محدش بيرد على الجديد خالص ... ميرسي جدا وربنا يخليك والله

اكيد لاء طبعا الجديد له اهميتو ودورو في المنتدي زيو زي الي في المنتدي من بدايه نشئتو
وانت شرفتنا يا أ / فريد

[hannibal]

المشاركة الأصلية كتبت بواسطة mohamed selem الف حمدلله علي السلامه انت واخوك انا اعرف مناطق في شبين القناطر وروحت ناحيه المقابر دي بس كان قبل الثوره عموما الف حمدلله ع السلامه مره تانيه ليك ولاخوك اكيد لاء طبعا الجديد له اهميتو ودورو في المنتدي زيو زي الي في المنتدي من بدايه نشئتو وانت شرفتنا يا أ / فريد

بجد انا مكسوف أني قولت إنكم مش بتردوا على الجديد.... وبجد مش عارف أقول إيه ربنا يكرمك يا رب ويخليك