بفكر أجيب سواق وحابب أعرف رأيكوا

[ahmedraafat00]

السلام عليكم

أزيكم يا جماعه يا رب تكونوا بخير دايما
انا أكتشفت ان السواقه فى مصر حاجه ممله جدا واكتشفت انى مليش طقتان للسواقه هنا
والواحد عنده عربيه و مش بيستخدمها ده غير النتائج السلبيه اللى بتيجى على العربيه من الوقفه
ساعات ببقى رايح مشوار طويل والسكه بتبقى غبيه ببقى محتار اخد العربيه هتخنق من السواقه ودمى هيتحرق اركب موصلات هتمرمت ويطلع عينى " البيضه ولا فرخه "
مره فى العيد روحت المعموره مع صحابى و طبعا مخدتش العربيه السكه هتبقى غبيه على البحر وواقفه و مش ناقصه نفخ وحرقه اعصاب فى العيد المهم خدنا اتوبيس واحنا رايحين واحنا مروحين شوفنا مهازل بتحصل على المواصلات وكل اتوبيس يجى الناس تجرى عليه وتزق بعض بغباء واللى يدخل من الشباك !!! و اتمرمتنا بمعنى الكلمه فى اليوم ده و انا وكل صحابى كنا مستغربين ازاى واحد معاه عربيه و يسيبها ويفضل يتمرمت كده !!!!
وبعد صراع مرير من التفكير امبارح الوالد جه وقترح عليا نجيب سواق محترم و كبير فى السن يسوقلنا لان الوالد كمان مش بيسوق خاااااااااااااااالص
قولتله يا حج هوا بعزقه فلوس وخلاص قاللى المصاريف اللى بندفعها للباص بتاع مدرسه اختك ندفعهاله و يبقى يودى اختك مدرستها و يخلص مشاوير البيت
هوا طبعا مش هيبقى سواق بالمعنى الدقيق يعنى مش هيبقى طول النهار فى الجراج و تحت امرنا لا هوا هيبقى ليه مرتب و لما نكلمه هيجيلنا و هيودى اختى المدرسه من عندنا فى المنشيه للعجمى (اسكندريه ) و اى مشوار عندنا فى بيت هنكلمه هيجيلنا و يخلصه والعربيه طبعا هتبقى معانا
وده طبعا ميمنعش انى ابقى اسوق فى المشاوير الخاصه مثلا او المشاوير الهاديه والاوقات اللى بتبقى الدنيا رايقه
والموضوع انا شايف ليه شويه ايجابيات : منها مثلا هيبقى فى حد هيهتم بالعربيه زيت و بنزين وميكانيكا وكده وكمان العربيه هتتحرك كتير بدل الوقفه و هنحس ان عندنا عربيه وانا لما تطلب معايا سواقه هسوق وممكن ابقى اخليه يزودلى مهاراتى
وفى النهايه عاوز اعرف رأى حضارتكم فى موضوع السواق ده : وهل نعمله نسخه من المفتاح ولا لا ولو لا المفروض انه هيجى كل يوم ياخد اختى عشان يوديها المدرسه والمفروض انه هيروح يجيب العربيه من الجراج و يستنى اختى تحت البيت ازاى هيجيب العربيه من غير مفتاح
واتمنى نصايح حضراتكم فى الموضوع ده

[epnmasr]

والله أنا شايف الموضوع عادي يعني لو عندك إمكانيات تدفع مرتب سائق يبقى أيه المشكله توكل على الله ولكن تأكد أنك تعرفه جيداً ويكون ثقه علشان يحافظ على العربيه وعلى ركابها وربنا يوفقك في الأختيار

[@واحد من الناس@]

بص أنا مفضلش موضوع السائق ده خالص ومعلش تعالى على نفسك وإستحمل السواقه وخليك بارد ومع الوقت هتاخد على الوضع وهتحب السواقه كمان بس وإن بقه إتطريت لسائق وخلاص قفلت معاك بص عمى إحتاج سائقمن 7 سنين تقريبا جاب إتنين واحد شاب كان مش بيحافظ على العربية وهو ماشى لوحده واللى بعديه راجل كبير مهمل مبيقدرش حد والأخير بقاله 5 سنين ويمكن أكتر كمان راجل ماشاء الله قمة فى الأمانة والجدعنة والرجولة بجد بيخاف على العربية أكتر من صحابها و أمين لأبعد حد وشاب مش كبير فى السن لدرجة إنه ممكن لما يعمل مشوار يخص عمى وحب يعمل لنفسه مشوار بالمرة يكلم عمى الأول يستأذنه طبعا مش عايز أقولك عمى تعب قد إية على مالقى واحد زية

[fire storm]

بص يا باشا من رايي بلاش موضوع السواقين ده عشان انا اعرف سواقين كتير طول ما هما معاك محافظين عاليها و زى الفل لكن طول ماهو ماشى لوحده اجارك الله فرك و غرز و تخميس للصبح و بعدين معظمهم مش مضمونين خصوصا ان حضرتك بتقول انه هيودى اختك المدرسه و يجبها فالاحتياط واجب

[ahmedraafat00]

شكرا يا جماعه على الرد والاهتمام
وانا لسه مققرتش هنجيب سواق ولا لا انا حبيت اعرف رايكوا
وملحوظه صغيره : العربيه مش هتبقى مع السواقو تقريبا مش هيسوقها لوحده الا نادرا لان العربيه هتبقى فى الجراج بتاعنا مثلا عندنا بكره مشوار هنكلمه هيجلنا راكب مواصلات عادى و نقابله مثلا فى الجراج و يخلص معانا المشاوير وهكذا
ده لو الموضوه ده تم هوا لحد دلوقتى مجرد فكره متداوله بس مش اكتر