الكيا برايد في رأيي

[Eng. Hany Mostafa]

عربيتي برايد 99 مانيوال لونها احمر حالتها متوسطه هبدأ موضوعي بمعلومات عن العربيه :
1- 1323 سي سي وده هيخليك في الترخيص في فئة اعلي من 1300 سي سي
2- التانك 37 لتر فيهم من 3 – 4 لتر احتياطي يعني التفويله 32 لتر
3- بتاخد 3.4 لتر زيت موتور
4- العربيه كربيراتير
5- بتاخد 2.5 لتر زيت فتيس
6- بتاخد 5 لتر مياه في الريداتير
7- البطاريه 12V – 40A
8- العربيه زجاج امامي كهرباء فقط
9- تكييف علي ما تفرج
10- فتح الشنطه والتنك البنزين من الداخل
11- مش بور بس الاسكاترا
12- طبعا 5 سرعات وسرعه خلفيه
ندخل علي المميزات والعيوب
• المميزات :
1- السحب كويس
2- العزم كويس في اول 3 نقلات وده طبيعي
3- مش بتاكل بنزين لو العربيه متظبطه يعني ممكن توصل اللتر يمشيك 13 كيلو في الطرق السريعه وفي الزحمه 10.5 كيلو
4- قطع غيار رخيصه
5- واسعه من جوه تشيل 5 رجاله مش مزنوقين
6- الاسكاترا فيها ناعمه او كويسه
7- ابعاد العربيه ظريفه بالنسبه للبلد الزحمه ديه
8- بالنسبه ليه الطابلوه والعدادات مريحين وعمليين
9- الشنطه كويسه بتشيل بس طبعا مش زي العربيات الكبيره
10- العربيه اعطالها قليله وفي نفس الوقت الميكانيكا فيها بسيطه ممكن تقولوا فيات 128 وقيفوها
11- العربيه بنزين 80 او 90 او 92 كله شغال بس انته اوصل للبنزين ال80 او 90

• العيوب :
1- قطع الغيار مش بتعيش كتير
2- خامات الطابلوه والابواب فقيره
3- طبعا الاتزان في الكنافه من بعد 110 كم/ساعه بس انا شخصيا مش من هواة الجري بحب التزم بالسرعات بتاعة المرور العبقري بتاعنا
4- التكييف تعبان بالنهار وبيبان تأثيره علي الموتور جامد - بالليل ظريف
5- العفشه نشفه وتحس بالخبط مع المطبات بتاعتنا ( عقاب جماعي للملتزم بقواعد المرور والغير ملتزم ده غير ان كل ما احفظ المطبات يغيروها )

• التقييم :
- لو انته موظف ومتزوج او شاب وعايز عربيه تشتريها مش هيه اللي تشتريك اركب برايد سواء سيدان او عصفوره
- مصاريف العربيه اقل من مصاريف سجايري في الشهر
- لو انته مش من هواة الجري والحرق هات برايد
- انا مره اتجننت وجبت بيها 155 عشان اشوف اخرها وطبعا كل حاجه كانت سليمه في العربيه بس لوحدها
- لو انته عايز عربيه عمليه واصيله في اعطالها هات برايد
- لو مش بتاع كماليات كتير بتضور علي المهم هات برايد
- لو بتشغل التكييف كتير اوعي تجيبها

اسعار العافشة مثلا :
1- جوز كبالن 200 جنيه
2- جوز مقصات 350 جنيه
3- جوز مساعدين امامي 370 جنيه
4- علبة دركسيون كامله 900 جنيه
5- علبة دركسيون من غير طقم البيض 750 جنيه
6- طقم بيض داخلي 160 طقم بيض خارجي 140
7- طقم جلب للعافشة 60 جنيه

اسعار الرفايع اللي الطبيعي انها تنكسر في ظل السواقه المراجيح في الشوارع وخصوصا من التكسيات والمكروبصات
1- فانوس امامي 85 جنيه
2- فانوس خلفي 70 جنيه
3- فانوس اشاره 30 جنيه
4- غمازة اشارة 10 جنيه
5- جوز مرايات 150 جنيه
6- شبكه امامية 65 جنيه

الخلاصة :
طالما انك في الفئه المتوسطه او فوق المتوسطه ومش عايز تشيل هم الـ running cost او تشيل مصاريف الرفايع - والكماليات عندك مش قضيه هات البرايد
لو انته معاك فلوس لفئه اعلي من البريد اوعي تجيبها انته اولي بالكماليات
لو انته من هواة الجري اوعي تجيبها - العمر مش بعذئه
في ناس بتجيب السيدان وتسقط عليها مواتير وتظبط في العربيه – بس انا منصحش بكده لو عايز تصرف هات عربيه تانيه اعلي وريح دماغك

[AhmedSakr_86]

اتفق معاك تمام

[wael890610]

باشا حضرتك ذكرت الشبكه الاماميه هل موجود منها جديد
وهل بخطوط طوليه ام عرضيه

[وليــد]

الله ينور عليك تقرير وافي وشـامل ما شاء الله .. أنا معايا برايد سيدان 2005 متهيألي نفس الإمكانيات اللي حضرتك قلتها ، بس اكمني لسة بتعلم عليها فمش عارف أي حاجة .. بس سؤال أنا لسة مغير زيت موبيل 2000 ويا دوب العربية طلعت مشوار لاسكندرية ( طبعا مش انا اللي كنت سايق وإلا كان زماني اتشيعت ) بشوف الزيت لقيته تقريبا اسود واللزوجة بتاعته مش موجودة إيه الحكاية ؟

[Eng. Hany Mostafa]

أسف علي التأخر في الرد كنت مسافر
الشبكه في منها جديد عند تارجت اللي في شارع فيصل وطبعا في منها استيراد ونصحتي هات الاستيراد ارخص وامتن من الجديدة