مشكلة فى 128 وعايز اراء الخبراء ارجوكم اسمعونى

[hobaus3000]

السلام عليكم
انا اشتريت عربية 128 من سنتين وكانت ماشيه معايا زى الفل هى موديل 85 طبعا كعادت المستعمل لازم اكون مصاحب ميكانيكى وكهربائى و بتاع عفشة الخ وطبعا عملت مشاكل مع صنيعية كتير المهم مش هطول عليكم فى موضوع مشاكلها القديمة لأنى الحمد لله عندى خبرة تكاد تكون بسيطة ولأنى لست جاهل ومن الناس اللى مش عارفه حتى فين الرداتير من الكاربيراتير وكان احلى حاجة عندى انى لما اطلع صانيعى انه مش فاهم وانه بيتكلم فى عيب تانى غير اللى فى العربية وافضل أئاوح معه وبعين اروح لميكانيكى تانى والاقيه بيأكد كلامى ويصلح العيب اللى انا كنت متأكد منه المهم اخر مشكلة هى ان العربية مكنتش بتسحب كويس وكانت بتمشى بالعافيه وخصوصاً فى مطالع الشوارع او فى طرق السفر بالعافية وخصوصاً لما أكون محمل ناس كتير المهم كنت غيرت الاسبراتير (استيراد) وايضا الكربيارتير (استيراد) وطقم ديسك واسطوان وبلية دبرياج (جديد) واستبدال رداتير حديد 2 ماسورة بأخر نحاس 3 ماسورة وجوان وش سلندر مرتين بسبب (غباء صنايعيه) عفشة متظبطه وطبعا كذا طقم بوجيهات وفلاتر وجوانات وكل اللى عايز تقوله قوله الحمد لله ايدى فى العربية علطول المهم اخر حاجة روحت للسمكرى عشان يلحم شويت حاجات فى الركب قالى لأ لازم يطلع الماتور ونشتغل صح لأن الربع الادمانى للعربية سايب المهم انا قلت بدل ميطلع الماتور على الفاضى ومصنعية قولت افك الماتور واعمل طقم شنمبر والذى منه عطلة بعطلة و مصنعية بمصنعية

المهم الميكانيكى فك الماتور ولقى ان الشمايز كويسة فقام بعمل الآتى:-
1- تغيير طقم الشنمبر
2-خراطة فى البلوك بس مش شمايز
3- تغيير جميع الجونات
4- تغيير الاولسيهات
5- الهلايل
6- توسيع مجرى البساتم للشمبر الجديد (وسع مكان تركيب الشمبر فى البستم)

وركبنا الماتور وبدأنا التليين على الواقف صفيحة ومن اول يوم فى التليين لقيت فى دخنة طلعة من الفايظ بسيطة اقول للمكانيكى يقولى ده بخر زيت مع انى عارف من خبرتى التى لاتذكر ومن المنتدى الجميل ومن اصدقائى اللى في واحد منهم تاجر سيارات ويعتبر ميكانيكى وبالاجماع ان كده الشنمبر وحش ومش مظبوط المهم قلت كمل تليين ويمكن يروح لأى سبب وابتديت الين ولكن بعد 600 كيلو روحت للميكانيكى للتربيط على الوش وتغيير الزيت وفلتر الزيت وقلتله ان الزيت نقص للنصف ما بين العلامتين قام معجبوش كلامى وقاللى ان ده زيت تليين ولازم ينقص وده برده مش صح (قال يعنى بعيب فى شغله) المهم قلت كمل كملت 1000 كيلو تليين وبعدين سفرت يوم الخميس بليل اسكندرية وقبل ما امشى كشفت على الزيت لقيته نقص شوية بعد حوالى 300 كيلو من تغيير الزيت والفلتر ولما وصلت وكشفت على الزيت بعد مالعربية هديت بساعة لقيت الزيت على minimum اتصلت بالميكانيكى واتخنقيت معاه وقلته ان ده تأكيد لكلامى ان الشنمبر مش معمول صح وانه كده يبقى ضحك عليا دلوقتى بقى بيقولى ان ده عيب طقم جلد صباب وده السبب وهنعمله والدنيا تتظبط مع انى مش مقتنع وقلتله ده ليه علاقة بالدخنة اللى خارجة من الفايظ قالى اه مع انى برده مش مقتنع
انا كنت ماشى فى السفر على 100 كم/ساعة ولما قلت للميكانيكى كده قالى انت كده قرصت عليها مع انى لينت 1000 كيلو ومتهيألى كده لو عربية زيرو كان كفايه عليها 1000 كيلو وانا كنت بمشى بالعربية كده قبل طقم الشمنبر وكانت بتنقص بالكتير نصف كيلو او كيلو بس فى 1500
وبعدين واحنا بنعمل الماتور قلتله عايزين نعمل روديه قاللى احنا اختبرناه ولقيناه مش محتاج والاختبار ده بيكون عن طريق انا احنا بنحط بنزين لو سيل يبقى محتاج لو مسيلش يبقى مش محتاج العجيب بقى فى الموضوع انه دلوقتى عايز يعمل كده (يعمل روديه)

الدخنه فى الفايظ موجوده علطول وبتزيد بسيط مع الكبس

مع العلم انى مرضتش اشتر طقم الشنمبر وخلته هو يشترى علشان الخلوص والكلام ده وعشان هو قال بلسانه ان ده هيبقى مسؤليتى لو كنت اشتريته ومسئوليته لو هو اشتراه

هل فعلا جلد الصباب ينقص كيلو وربع زيت فى حوالى 300 كيلو من غير دخنة من الشكمان؟
اه البوجيهات مبيجيش عليها زيت والمياه فى الرادتير نظيفة

انا اسف جداً جداً جداً للأطالة ولكن ده من غلبى ومصدقت اكلم ناس فاهمه

وشكراً مره اخرى لأحلى منتدى

[mhamdy75]

روح لميكانيكى تانى وسيبك من ده خالص

[الايطالى الصغير]

انا زيك عندى عربية 128


بس اهم من العربية


وقبل ما تشترى العربية


فيه نظرية


العبد لله هو اللى اخترعها


او فكر فيها وحسبها صح قبل ناس كثير والله اعلم


ايه هى النظرية


اشترى الميكانيكى قبل العربية


يعنى ايه ؟


قبل ما تفكر تشترى عربية لازم تكون حاطط عينك على شخص من اهل الثقة وفى نفس الوقت من اهل الخبرة

علشان الصيانة يا باشا


بيسموها فى الانترنت الدعم الفنى


كان ليه واحد صاحبى اخوه ميكانيكى


بس ثقة ومش بيغشك وبيعمل الحاجة صح صح


قلتله هشترى


قالى توكل على الله


واشتريت


وفعلا ريحنى فى حاجات كثير


وحللى مشاكل كنت ممكن ابقى ضحية سهلة لاى ميكانيكى


لكن هو امين وبيعمل الشغل صح


فكنت لما اتزنق اروحله


واقوله انا هراضيك بس شوف المشكلة


وفى مرة كان فيه حاجة فى العربية ضبطها وما رضيش ياخد فلوس


قلتله ليه


قالى لانى ما عملتش حاجة تستاهل اخد فلوس


ومن يومها


حمدت ربنا


انى حسبتها صح


الميكانيكى قبل العربية


تخيل فى مرة رحت لواحد بتاع عفشة طلعلى العربية كلها عايزة شغل


رحت لواحد اعرفه كان بيجينى اصلحلة الكمبيوتر بتاعى


قالى عربيتك تمام وما فيهاش حاجة والدليل اهوه


ونزلنى تحت العربية وورانى كل شىء وشرحلى وفهمنى


دلوقتى


الميكانيكى سافر ودخل الجيش


وانا احتست ودخت وتهت ولما بتظهر مشكلة فى العربية

ب
حاول ادخل المنتدى أشوف حد يقولى اعمل ايه


انما حرمت خلاص

مستحيل اتعامل مع ميكانيكى فى مصر


الا بقى لو اضطريت


لانى عارف الذمة والضمير مش موجودين


وربنا يستر علينا


حتى العمرة


ناوى اجيب مستعمل او استيراد او شورت بلوك


ومش هعمل عمرة ابدا عند واحد فى مصر


قول على الدنيا السلام


وربنا يصبرك على مشكلتك

[hobaus3000]

الف شكر لكل واحد رد عليا وكل تقدير واحترام وايضاً لكل من لم يرد عليا فى المنتدى الجميل
الجديد ى الموضوع ان انا روحت للميكانيكى بتاعى النهاردة وقعد يبص على العربية تحت وفوق والشكمان ويظبط الكاربيراتير ويبص على العادم وانا ازود بنزين وفى الآخر برده مقتنع انه جلد الصباب يا عم الحج مفيش دخنه من الشكمان يقولى ما هو ده دليل على انه جلد صباب وانا اقوله ان ده شمبر مش معمول صح وده مش مقتنع وهو شايف الدخنة اللى خارجة من الفايظ و اقوله الدخنة من الفايظ يقولى جلد صباب ويقولى ان الشمبر يعمل دخنة من الفايظ ومن الشكمان قولتله على فكرة انا لما جتلك وشفنا الشمبر وكان ضايع العربية عمرها ماطلعت دخنة من الشكمان وكان كله من الفايظ وعمرها ما تلتت بوجيهات وقلتلة ان انا ركبت خرطوم الفايظ فى العمه ورحت بيها مشوارين حوالى 100 كيلو ولقيت فى تعريق زيت فى الخرطوم الحديد اللى راكب فيه خرطوم الفايظ وواصل للداخل وبرده مش مقتنع

اه وهو بيجرب فك غطاء التاكيهات (غطاء تزويد الزيت للماتور) لقى الدخنه بتاعت الفايظ بقيت بتخرج برده من فتحة الغطاء
انا بجد مش عارف العيب فين طبعاً سبته ومشيت وطبعا الموضوع تحدى لأنى فهمته انى هاعمل العربية بره وهاجيله اثبتله كلامى لأنه اللى هو عايز يعمله ده تضيع وقت ومجهود وفلوس والنتيجة صفر

وبالنسبه للأعضاء سكان الهرم ايه الميكانيكية المشهود لهم والمحترفين ضرورى

[طارق ابوذيد]

أخى الكريم اذا كان العيب من جلد الصباب فستجد السياره فى أول تشغلها فى الصباح يصدر من الشكمان دخان لمده عشره دقائق ثم يمتنع بعد ذلك فهل هذا هو الحال عندك ؟