سهره فى سوق سيارات المنصورة

[elmo7areb]

بسم الله الرحمن الرحيم

جت الصدفه يوم الاربعاء معايا ورقة لازم اوصلها لصاحبها اتصلت علية لقيته فى سوق السيارات الى بعد الاستاد قلت له جاي لك اهو نتفرج شويه

دخلت السوق لقيت الشله كلها هناك قلت هيصه وهجوم وقلت بسم الله اما نشوف سعر العربيه الى معايا تعمل كام

دخلت على اول نيو اكسنت
المواصفات
لون نبيتي
فبريكه بس مليانه خدوش والعتب واخد كام خبطه من الجنبين
موديل 2009 اوتوماتيك
مفيش اي اضافات فيها خالص ولا حتي جنوط ومغيره اكصدام ومفيش فوانيس شبوره

السعر بقة بدايه الكلام 80 الف وصلت لغاية 78 بالعافيه

عدادها 29000
بس حاله العربيه من بره متبهدل وشكله مش شرعي


دخلت على واحدة تانيه
2008
فبريكه بس فيها رفرف واكصدام متغير
والريداتير مش اصلى والبطاريه تعبانه وحتي الوش بتاع الماتور مش هو الى فى عربيتي والفوانيس قدام مش اصلي ولونها اسود وشكلها عجوزه

مطلوب كام يا سيدي
بدايه الكلام 68000
وصلنا 66000


والنبي الاسعار دي مش حرام ؟؟؟

دة انا كنت فاكر ان عربيتي اخرها 60 الف بالكتير ويوم ما جالي واحد ب 60 قلت حرام عليا اخدعه وياخد عربيه اكتر من توبها خليها معايا احسن واهي مش مزعلاني

مع ان حاله العربيه بتاعتي احسن واروق وجنوط وفرش يعنى بيتي

عربيات فى السوق تعبانه واسمع اسعار خيال

انا مصدوم

[Mido Madrid]

فعلا عربيات سوق المنصوره معظمها مش مظبوط وفيه عربيات مغيره ارباع وانصاص ويقولك فبريكه كمان شغل نصب

[احمد على 1999]

اشك ان عربيتك تبقى ب 60 بس كدا انت كنت مسترخصها فحت

[elmo7areb]

فعلا يا ميدو كلام سليم معظم الى هناك تجار وعربيات نص كم

والله يا استاذ احمد انا كنت فاكر الاسعار كدة وبعدين مهما كانت موديل 2008 لكن هناك فاكرين ان العربيه حتي لو موديل 2000 تبقي جديده وتستاهل اي حاجة

الصراحة مفيش احسن من الزيرو وسط سوق زي ده بالاسعار دي والحالات دي