زهقت بجد من العربية

[elsheikh2010]

السلام عليكم ورحمة الله وبركاته
كل سنة وحضراتكم طيبين ....
استمراراً لمشاكلي مع عربيتي الزيرو للأسف .... معايا فيرنا 2011 والحمد لله على كل شئ .... أقسم بالله العلي العظيم اني بأصين في التوكيل بالرغم من أسعارهم النار و بأحسس على العربية لدرجة ان الي ماشي ورايا ممكن يتضايق مني وباسمع كلام زي الفل من السواقين الميكروباصات .... وبالرغم من كده باسمع أصوات عجيبة في العربية و المشكله الجديدة ... بقيت بأسمع في الصالون صوت زي سكسكة أو صوت حاجة محلولة جاي من التابلوه وبالذات لما بأمش على طريق محبب ومابيبقاش ظاهر لما بامش على طريق ناعم وكمان ومباسمعهوش لما بأكون مشغل التكييف مش عارف هل لأن صوت التكييف بيبقى عالي ؟؟؟ . واعذروني على التشبيه لأني مش عارف اوصفه ولا ممكن يكون جاي من ناحية الكاوش أو حاجة محلولة في الماتور وتصورا في التوكيل مش عارفين يوصلوا لهذا الصوت بعد سنتين من الذهاب اليهم لدرجة انهم بيقولي عيش معاه تخيلوا !!! وده بعد ماحلو الكونسول الي في النص وربطوا الحاجات الي ممكن تكون السبب .
فبالله عليكم ياريت لو حد حصلوا حاجة معاه شبه كده ياريت لا يبخل علينا بالرد ... لأنك تخيل معي عربيا زيرو بتخلل وانت ماشي بيها وبتشخلل بذمتك مش حاجة تغيظ .
الحمد لله على كل شئ وأسف على الإطالة

[حسام البورسعيدى]

هل الازاز عندك فيه شرخ او اتغير قبل كده ؟؟؟

[memodina1]

ياباشا عندى اصوات فى العربية برضة من ساعة ما كانت زيرو وفى منها بيروح ومنها مبيروحش بس انا عندى عادى هعمل اية يعنى هى بس عشان تقفيل مصرى هتلاقى اصوات وكدة حاول تشيل من دماغك انها بايظة حط فى بالك انى التقفيل المصرى مش كويس وصدقنى عيش واستمتع طالما كويسة وصيانتها كويسة وماشية تمام

[zing0]

للأسف فيه ناس (محسوكه) و بتدقق فى كل حاجه و مينفعش تلاقى حاجه مش مضبوطه و يطنش
للأسف أنا منهم, رغم إنى عارف أن ده جايب لى وجع دماغ مالوش لازمة و مخلينى دايماً قرفان و زهقان و متضايق و تاعبنى
هيا مش (تعقيد) هيا طبيعه فى ناس معينه بيقولو عليهم بالإنجليزى neat freak
و بيوصفهم علم النفس على أنهم أفلاطونيين (من سكان المدينه الفاضله)... بغض النظر عن كل ده

بأقول لنفسى و لأخونا صاحب الموضوع:
حاول دايماً تفضل فاكر أنك فى الدنيا مش فى الجنه, و خاصة لو أنت أكيد فى مصر

[elsheikh2010]

المشاركة الأصلية كتبت بواسطة zing0 للأسف فيه ناس (محسوكه) و بتدقق فى كل حاجه و مينفعش تلاقى حاجه مش مضبوطه و يطنش للأسف أنا منهم, رغم إنى عارف أن ده جايب لى وجع دماغ مالوش لازمة و مخلينى دايماً قرفان و زهقان و متضايق و تاعبنى هيا مش (تعقيد) هيا طبيعه فى ناس معينه بيقولو عليهم بالإنجليزى neat freak و بيوصفهم علم النفس على أنهم أفلاطونيين (من سكان المدينه الفاضله)... بغض النظر عن كل ده بأقول لنفسى و لأخونا صاحب الموضوع: حاول دايماً تفضل فاكر أنك فى الدنيا مش فى الجنه, و خاصة لو أنت أكيد فى مصر

صدقني يا أخي .... العملية مش كده العربية بتاعتي مليانة أصوات غير ده كأنك راكب مراجيح مولد النبي ... بس الصوت ده رخم صوته عالي كأن فيه سلسلة مفاتيح بيت بتخبط في بعض ...صوت يجيب العصبي بجد .