رش الفيليشيا كامله فرن

[سعيد بديع]

بسم الله الرحمن الرحيم

فيلشيتي كنت شاريها فيها كام خبطه كده وقلت اسيبهم شويه عشان تاخد العين وكمان لان مكانش فيه فلوس وقت ما جبتها عشان ارشها وقلت اهو برضه خليها كده علي ما اخد عليها تمام

والحمد لله من يوم ما استلمتها وهي حتي مفيش حكه زيادة عن اللي كان فيها

المهم من اسبوع قررت اني اروح اعمل السمكرة واوديها تترش وكانت المفاجاة

خلاف الخبطات اللي في الجنب لاقين بوهيه مفرقعه كتير واضطريت طبعا اني اشيلها
وكانت النتيجه ان جنب اتشرك تقريبا 60 في الميه منه وهيحتاج يترش كله

الجنب التاني كان فيه حتت بسيطه والكبوت كان متمعجن اصلا بس مش كله حتت صغيرة فيه

فقررت اني ارشها كلها فرن وخلاص عشان متبقاش مبقعه وعشان اضمن ان اللون مش هيبقي مفارق ولو حاجات بسيطه وهي كده كده كانت راشه قبل كده خوارج بس

فانا برضه هرش الخوارج بس لان الدواخل نضيفه ومش محتاجه اي حاجه

المهم وانا عند السمكري اكتشف بارومة في الباب وفي الرفرف الوراني .... مش سارحه بس اهي بارومه برضه وااضايقت جدا بصراحه بس السمكري قالي ان الحل بسيط هنقطع الجزء المصاب ونحط صاج نضيف

وفعلا عالج البارومة في الرفرفين وحته في الباب الوراني ورا السواق وكانت التكلفه رض الخبطات وقطع الصاج وتغييره 400 جنيه بالتمام والكمال

وابتديت اسال عن بوهيجي عشان يمعجن ويرش وسمعت ارقام فلكيه

واحد قالي 800 جنيه من غير المون

واحد تاني قال هاخد مصنعيه 500 جنيه وتحجزلي الفرن وتشتريلي البوهيه

يعني الموضوع كده رايح تقريبا 1000 جنيه دا انا ما احتاجتش اصلا

وفي النهاية قابلت واحد صاحبي معاه عربيه 131 ولسه راششها كلها من بره

فسالته عملتها بكام فقالي معجون ورش وكله 1000 جنيه مع العلم ان كان حارق العربيه كلها واتمعجنت كلها من جديد

المهم شوفت العربيه وما شاء الله صنايعي عشرة علي عشرة العربيه نضيفه جدا والرش بصراحه تحفه واحلي من الناس اللي شوفتهم قبل كده

اخدت رقم تليفون الصنايعي ده ورحتله بص علي العربيه وقالي هتجيبلي المون المعجون والوهبه ولو هجيب انا .... فقلتله ممكن نروح نجيبهم سوا بس قولي انت الموضوع هيتكلف كام من الاول للاخر

يعني تحسبلي المعجون والبوهيه والفلر والمصنعيه كله كله علي بعضه

فقالي كله كله 700 جنيه بالفرن والمصنعيه والمون

من هنا لهنا اتفقنا علي 600 جنيه و 50 دخان للصنايعيه في الورشه

علي شرط اني انا اللي هشتري البوهيه اللي هيه برضه محسوبه من 600 جنيه اللي اتفقنا عليهم

اظن ده سعر في الجون خصوصا انه صنايعي كويس وشغله نضيف

وكمان انا اخدت واحد معايا معرفه للصنايعي فعشان جدا اتساهل معانا شويه وقاله كده تقريبا انا كل اللي واخده مصنعيه 200 جنيه وباقي الفلوس هيبقي ايجار الفرن والمون بالظبط

عايز اعرف هو كده 600 جنيه رش فرن ومون وبوهيه ده سعر كويس ؟؟

وهل هو عامل الصح فعلا زي ماهو بيقول

لانه قالي اي حد تاني هيقولك 1000 جنيه

انا شايف ان 600 جنيه ده سعر تمام

مستني ردودكم

[autofinish]

عايزك تحسبها بالعقل اقل كيلو بويه مصرى 140ج كابسى لو عربيتك حتترش كلها تاخد 1.5ك يعنى 210ج+ قول علبتين معجون 80+فلير25+تنر15+30 صنفره+فرن60 مثلا+ يوميات صنعيه وورشه150=570ج دى اقل تكلفه باقل خامات بس عايز اقولك حاجه عربيت صاحبك 131 اتفرج عليها بعد 3 شهور وافتكر شكلها فى الأول وحتقول سبحان مغير الأحوال الدهانات الرخيصه بتفرح اول مره زى المنتجات الصينى شكلها حلو بس جوه الله اعلم لايمكن ان تدوم لمعان ومقاومه الدهان اكتر من 3 شهور احسن حاجه كنصيحه اتفق معاه على مصنعيه بالمون فقط وهات انت البويه ايطالى المانى مش مهم الفلوس قد ما حتاخد حاجه قيمه تشرفك قدام

[abb]

انتا متاكد من السعر ده اصلى هعمل نفس الشغل بتاعك بس سئلت كذا واحد بتاع دوكوا والسعر بين 2000و2500ج

[سعيد بديع]

ما احنا قولنا بقي ان الراجل هيعمل واجب وانا اللي هجيب البوهيه هو كل مصنعيته 200 جنيه بالظبط

[eng_gouda2000]

السلام عليكم ورحمة الله وبركاته

أحب اضيف حاجة مهمة جدا جدا بص ياباشا متديش الامان لاي صنايعي مهما كان وعن تجربة اكتر من مرة

السعر كدة رخيص اوي اوي ومتفرحش بالتكلفة القليلة اللى هايقابها بالتأكيد جودة قليلة

أنا لسة راشش باب الشنطة والاكصامين والرفرفين خلفي بـــــ 400 جنية

يعني أقل من ربع العربية بـــ 400 جنية

بس اخدت شغل ممتاز والراجل من نفسه قاللي لو معجبكش الشغل ارشهالك على حسابي كلها وبصراحة طلع ممتاز فى صنعته

الخلاصة المهم تتأكد من مستوي الصنايعي وانه كويس دة اهم حاجة وكمان البويات تبقي نوعية كويسة وبعد كدة التكلفة تدبر

تحياتي ليك