عايز رائيكم ضرورى جدا

[بحر الحياه]

العربيه فيرنا فول اوبشن مانوال 2011 عامله 3000 كيلو
انهارده كنت حاجز موعد صيانه فى ابو رواش وقلتلهم على اربع حاجات
1 - صوت الصفاره اللى بيطلع من الكومبريسور بتاع التكييف لما بزود بنزين
2 - سلكة الارضى بتاعت الموتور كانت مفصوله
3 - استهلاك البنزين عالى جدا 150 كيلو فى الصفيحه جوه البلد بالتكييف
4 - كان فى تخبيط ورا جامد ودبدبه

وبعد تلات ساعات خرجوا العربيه كالاتى

بالنسبه لصوت سفارة الكمبوريسور بتاع التكييف وانا بزود بنزين كاتبين ده صوت طبيعى وهيختفى مع الاستعمال وسمعونى الصوت فى عربيه لسه زيرو عندهم هو هو
بالنسبه لسلكة الارضى ربطوها تمام ولفوها بشريط لحام قوى جدا عامل كده كانه شاش بس كويس
بالنسبه الستهلاك البنزين كاتبين انهم حطوها ع الجهاز والموتور مظبوط لذلك فاستهلاك البنزين متوقف على رجلى وعدد الاشارات اللى بقف فيا وحاجات تانيه كتير اما الموتور فهو تمام
بالنسبه للخبط اللى ورا دى المفاجاءة اللى انا فوجئت بيها بصراحه
كتبو انهم ربطوا العفشه كويس من ورا وقدام ولما طلعت بيها لاقتها فعلا ما شاء الله الدبدبه راحت خالص وبقت كويسه جدا جدا واتبسطت من كده جدا

لكن دلوقتى اا عايز رائيكم فى النقطه رقم واحد هل حد عنده العربيه جديده بيسمع الصافره دى من الكومبريسور لما يزود بنزين ولاا لاء وهل ده عادى ان الكومبريسور يصفر لما ازود بنزين وهل كلامهم ده منطقى ولا لاء وبالنسبة لاستهلاك البنزين ايه رائيكم فى الكلام ده

ملحوظه المهندس لما لاقانى مش مقتنع بكلامه بالنسبه لصوت الكومبريوسر قالى على فكره لو اى حاجه فيها مشكله فى العربيه اا مش هتاخر ابدا فى تغييرها لاننا بناخد من الشركه فى كوريا ضعف تمن القطعه دى كنوع من التعويض فلو غيرتلك حاجه بايظه انا اللى كسبان انا بس بوضحلك النقطه دى عشان افهمك ان تغيير الكوبريسور لو بايظ مش هيكلفنى بالعكس هيفيدنى


ايه رائيكم ؟؟؟؟؟؟؟؟؟؟؟؟؟؟

[memodina1]

1. بص بالنسبة للكمبروسير هو المفروض يكون لية صوت اساسا كدة زى نفخ او خرم ضيق بيطلع منة هوا صوتة كدة بس بيكون ضعيف يعنى مش مسموع اوى ولو مشغل كاسيت مش مسموع خالص لو كدة يبقى عادى
2. تانى حاجة العربية بتلين شوف العربية على 5000 وحاول تحرق شوية بيها يعنى طريق سفر كدة 200 الى 300 كيلو فاهمنى واكيد هتلاقى حاجات اتغيرت فى العربية مع التليين ولو عاوز تطمن شغل التكييف على سرعة عالية 3 او 4 مثلا وامشى بية دايما وشوف الكمبروسير اخبارة اية
3. واما للعفشة فمدام الخبط راح يبقى كويس ولعلم هتلاقية رجع تانى متقلقش هتربط عفشة والفيرنا محتاجة تربيط كتير شوية يعنى كل 3 الى 6 شهور كدة تربط وترصص حسب استخدامك واهم حاجة ظبط الزوايا
4. وممكن بعد فترة تلاقى تزييق برضة عادى شوف بيجى منين وحط شحم كتير على المكان لانة هيكون قى المفصلات اللى تحت الموكيت بتاع العربية دا بيظهر دايما يعنى او رش WD40
5. دا لو ظهر لو مفيش يبقى تمام
6. اهم نقطة بقى كنت عايز اتكلم عليها فى ناس معاها فيرنا تقولك انا بعمل 300 كيلو فى الصفيحة دا حوارات اوى اوى وناس تقولك انا روحت من مصر للاسكندرية ورجعت تانى واخدت يدوب ربع التانك دى ناس عمرها ما ركبت عربية اساسا
7. روح شوف فى الكتالوج بس القديم زى اللى معايا 2007 هتلاقى صفحة 4-6
8. مكتوب عن البنزين فيها الحد الاقصى للاقتصاد فى البنزين 7 لتر تقريبا او اقل بنسبة بسيطة اوى يعنى 6.8 كدة انا بقول 7 وخلاص يعنى لكل 100 كم وبدون استخدام التكييف والسرعة لا تزيد عن 90 كم فى الساعة
9. يعنى مينفعش اقل من المعدل دا طيب الفيرنا 40 لتر وانا شكيت فى الموضوع دا لانى جبت نصف التانك ورحت فولت اخدت 16 لتر ونصف طب فين الباقى يا عم الحج واحد من التوكيل قالى هى تقريبا 35 والخمس لتر احطياتى وكدة وحوار وواحد قالى هى طول عمرها الفول تانك بتاعها لا يزيد عن 35 وجرب بنفسك وشوف المهم هنقول يا عم انى هما 20 لتر فى الصفيحة
10. مع انهم اقل والله وانا متاكد يعنى حسب تقديرى لا تزيد عن 17
11. لكن خليهم 20 زى ما بيقولوا
12. انت بتمشى فى البلد واول وتانى وتالت واول واشارة ومعلش ممكن تحرق على الغيار وتطلع وتبطل العربية وتشغلها وتجيب عيش وتبطل وترجع تشغلها وتروح السوبر ماركت وهكذا يعنى مش بتمشى فى البلد على 90 كم على طول دا لو جبتها اساسا
13. طيب احسب كدة لو مشينا على الكاتالوج المفروض تعمل حوالى 275 كم فى 20 لتر دا المعدل القياسى طيب احسب بقى عندك
14. اولا انت عارف انى جوة البلد غير برة البلد يعنى 275 دول برة على الصحراوى مع 20 لتر تعمل جوة البلد حوالى 200 كم لكل 20 لتر دا بقى انا سالت فيها مليون سواق تاكسى معاة الفيرنا بنزين وناس صحابى كلهم اجمعوا انى لو مشيت جوة البلد ومش بتحرق ولا حاجة بس كل الحكاية انت بتغير واول وتانى وترجع تالت واول طبعا دا فية بنزين كتير حكاية الغيارات والوقوف فى الاشارة وكدة كلهم اجمعوا انة لا يتعدى 200 كم فى نصف التنك وفعلا الكلام دا صحيح حط فى بالك انى ولا واحد بيشغل التكييف
15. طيب انت بتشغلة ونسبة استهلاك التكييف فى الفيرنا للكاتالوج 20% من استهلاك الوقود
16. يعنى ممكن يعمل معاك بالتكييف 160 الى 170 اخرة لو مشغل التكييف على فترات كبيرة يعنى مثلا ساعتين فى اليوم
17. فمتقلقش لو الراجل بتاع التوكيل قالك كشفنا على العربية وكلة تمام اوكى جرب العربية من غير تكييف كدة ومن غير حرق على العربية وشوف لو عملت 200 الى 190 كم فى نصف التانك تبقى المعدل كويس خد بالك دا جوة البد مش برة وجرب انك يكون نصف التانك بالضبط فاضى ومون مستحيل هتعمل 20 لتر وشوف يعنى اساسا هتلاقية بالكتير اوى 17 لتر ودا رهان لكل اللى معاة فيرنا لو جبت نصف التانك اكتر من كدة شلن واحد همونلك على حسابى التنك كلة وبجد يهمنى راى الناس فى الكلام دا
18. وربنا يكرمنا فى عربياتنا ويستر طريقنا جميعا امين

[بحر الحياه]

يا باشا انا متشكر جدا جدا جدا على الكلام ده كله ومتكشر انك تعبت نفسك وكتبت الكلام ده كله وبكده انتى طمنتنى والله ربنا يطمنك

[memodina1]

المشاركة الأصلية كتبت بواسطة بحر الحياه يا باشا انا متشكر جدا جدا جدا على الكلام ده كله ومتكشر انك تعبت نفسك وكتبت الكلام ده كله وبكده انتى طمنتنى والله ربنا يطمنك

ولا يهمك يا ريس وبلاش تدور على حاجات صغيرة تعكنن بيها نفسك فى العربية لاة عيش حياتك واتمتع بالعربية وهى ممتازة والله جدا وليكن عيبها الوحيد الجنوط الحديد مصر تبع مصنع الانتاج المصرى هنا والجنط السرة بتاعتة مش مظبوطة تمام اوى هبتعمل رجة بسيطة فوق 120
دا العيب الوحيد اللى مجننى بس هجيب جنوط كورى بتاعتها حديد برضة لانى بكرة الاسبور كذا مرة يتشرخ فى عربية من بتوع صحابى ويرجع يركب الحديد تانى بس الكورى بتاعها ممتاز الى راكب فيها الاتوماتيك بتاعها 14 دا ناوى اجيبة ان شاء الله

[بحر الحياه]

المشاركة الأصلية كتبت بواسطة memodina1 ولا يهمك يا ريس وبلاش تدور على حاجات صغيرة تعكنن بيها نفسك فى العربية لاة عيش حياتك واتمتع بالعربية وهى ممتازة والله جدا وليكن عيبها الوحيد الجنوط الحديد مصر تبع مصنع الانتاج المصرى هنا والجنط السرة بتاعتة مش مظبوطة تمام اوى هبتعمل رجة بسيطة فوق 120 دا العيب الوحيد اللى مجننى بس هجيب جنوط كورى بتاعتها حديد برضة لانى بكرة الاسبور كذا مرة يتشرخ فى عربية من بتوع صحابى ويرجع يركب الحديد تانى بس الكورى بتاعها ممتاز الى راكب فيها الاتوماتيك بتاعها 14 دا ناوى اجيبة ان شاء الله

والله كلامك صح بلاش اعكنن على نفسى
وربنا يوفقك فى حوار الجنوط