احذروا التامين عند كوتكت كار

[overclockman]

بسم الله الرحمن الرحيم

السلام عليكم ورحمة الله وبركاته

ياجماعة انى واقع فى مشكلة مع شركة كونتكت للتامين وبالنسبة لى المشكلة مش مشكلة فلوس

نزلت يوم الصبح لاقيت الزجاج الامامى (البربريز )مضروب مفك والزجاج مكسور

المهم كلمت كونتكت قولتلهم على اللى حصل

ردو عليا قالولى ابعته المكان اللى هو التوكيل واحنا حنبعت نعاين طبعا قعدت فى التوكيل من 9 صباحا الى 1 ظهرا فى انتظار المهندس اللى بيعاين وفى الاخر مشيت

وجاه بعد مامشيت المهم عاين وقال الزجاج حتيغير بس السنسور اللى فى الزجاج مش حينفع نغيره قولتله ليه طيب قالى علشان الخبطة بعيدة عنه

المهم كلمت هندس التوكيل قالى السنسور لازم يتغير لانه لما بيتنقل من زجاج الى زجاج ياما بيقطع او مبيشتغلش وهو سنسور للمطر تمام لحد كده

الغريب فى الامر ان كل السيارات من نوع سيارتى اللى بتدخل فى التوكيل تبع كونتكت بيتغيرلها

الاتنين من كلام مهندس البافارية وتبع التامين


المهم رحت للفرع الموجود فى سموحة بكلم المسئول هناك قالى لا كلم الادارة المهم بعد شد وجذب كلم نائب المدير وهى ست للعلم

المهم بعد الكلام معها قالتلى كلم مهندس التوكيل يكتبلك الاتنين بند واحد واحنا ندفع مفيش مشكلة
طبعا قولت الكلام ده للمهندس قالى ده تزوير واحنا شركة محترمة ومالناش فى الكلام ده
لان كل قطعة بتتغير لها سيريل نمبر خاص بها

المهم كلمتها تانى قالتلى
لا مفيش مشكلة خالص والاتنين حتغيروا واحنا اسفين

فوجئت بهم بيكلمونى بيقولى الزجاج بس هو اللى حيتغير والسنسور لا

فطبعا اتنرفزت بعد ماقالوه حيتغير رجعو فى كلامهم بعد مذنبونى اسبوع

وللعلم انا بدفع 8000جنيه تامين واضطريت انى اغير السنسور على حسابى
والزجاج على حسابهم والسنة الاولى دافع 10000 جنيه ولم استفد بهم لانى مكنش فى مشاكل فى السيارة

الخلاصة من الموضوع

ان عروض البطاقة البرتقالى والزرقاء مجرد ضحك على الناس
ولا فى شى اسمه سيارة بديلة ولا قطر ولا اى حاجة من العرض اللى هما كتبنه بجانب معاملة فى منتهى قلة الذوق فى التليفون بعد ميكلمك ساعة يقولك كلم الادارة

يجانب ان فى التوكيل لما بيعرفوا انك تبع كونتكت مش عارف بحس معاملتهم بتتغير على عكس لما بروح اعمل صيانة بمفردى

انا عامل الموضوع ده لوجه الله لانى قيمة التامين لدى كبيرة جدا وبيتهربوا من الاصلاح فما بالكم اذا كانت قيمة التامين اقل من ذلك

واسف على الاطالة

[mohamed elshahat]

[ابو هيما]

يا باشا جزاك الله خيراً على الموضوع والأفادة وربنا يجعله يارب فى ميزان حسناتك , وعلى فكرة انا عن نفسى من أشد الكارهين والمعارضين لموضوع التامين على السيارة وذلك بعد تجربة مريرة استمرت لمدة عامين مع الجمعية المصرية للتامين التعاونى . وأقسم بالله أن العربية اللى جبتها بعد كده ولأ كنت مأمن عليها ولأ حاجة وكنت بسافر بيها كل يوم تقريباً مسافات لا تقل عن 140 كيلووبسرعات 150 و160 كيلو فى الساعة ده بقى غير الأنتقالأت الكتير بالسيارة بين المحافظات وكان ربنا ولله الحمد مباركللى فيها أوى أكتر من اللى كان متأمن عليها . والله العظيم الناس دي بتضحك علينا , ساعة ما تروح توقع عقد معاهم تلأقى الوشوش كلها بتضحك ومبتسمة ولو انت فين يجولك جرى , أما بقى لما تيجى يا حلو تقع فمش هتلأقى حد يسمى عليك , وكمان هتلأقى المعاملة اتغيرت والوشوش اللى كانت بتضحك لك هى نفسها اللى بقت تهرب منك وتفضل عمال تجرى من ده لده . طب يبقى أيه لزمته بقى , طالما جرى بجرى .
يبقى لو لأقدر الله العربية عاملت حادثة أو حصلها حاجة اروح أعملها بنفسى وفى ملأيين الورش وباسعار مختلفة , ولو لأقدر الله لأسوء الظروف العربية أتكهنت ومعادتش تنفع فبردوا هتلأقى ألوف متخصصة وبأسعار مختلفة فى شراء سيارات الحوادث . عشان كده انا بقول القرش اللى بتصرفه ومبتسافدش بيه أنت وبيتك أولى بيه . ده بقى غير ما قيل من قبل المتخصصين فى الدين بحرمانية التأمين أصلأً لأن لأينفع أنك تأمن نفسك من قدر الله .
ربنا يصلح لك الحال ويصلح حالنا جميعاً , وسامحنى على الأطالة .
أرجو ان تتقبل تحياتى وأدعو الله لك بالتوفيق أن شاء الله فى الأمور كلها

[damdam41]

ربنا يهديهم انا لاحظت فعلا ان فى ناس كتير بتشتكى من كونتاكت

[overclockman]

^^^^^^^^^
سبحان الله كانك كنت معايا والله ده اللى بيحصل فعلا

بس الفكرة ان فى تبريرات هبلة وانا مش عايز اغلط فيهم لانى مبحبش اغلط فى حد

بس والله والله دافع 18000 جنيه فى سنة و9 شهور بالظبط ومش هاين عليهم يدفعوا 660 جنيه تمن السنسور
اللى هما فى الاساس فلوسى
طب اللى بيامن 1000 جنيه و2000 جنيه نفسى اعرف حيعملوا معاه اه

عامة حسبى الله ونعم الوكيل وفعلا عندك حق يا ابوهيما فى اللى انت بتقوله