مش حسكت...............

[akerima]

أشعر بقشعريرة تسرى فى جسدى كلما أرى ذلك المقطع للفتاة التى يسحلها بعض المخنثين من قواتنا المسلحة التى نموّلها بفلوس ضرائبنا (والمعونة الأمريكية) و أحدهم يضرب بقدمه رداءها لينكشف جسد مصر ثم يضربها فى صدرها بقدمه بغلٍ أتعجب كيف تكوّن فى قلبه و ماذا قالوا له ليكره مصر كل هذه الكراهية !! نعم مصر - فلقد كان يضرب مصر فى قلبها و ليس الفتاة الطاهرة.



ثم أشعر بغضب شديد و أنا أرى مخنثاً آخر يقفز فى الهواء ليهوى بقدميه على متظاهر آخر ملقىً على الأرض كان يحاول نجدة ابنة مصر - ربنا يشل قدميك يا بعيد !!

المنظر العام عندما يتجمع هؤلاء المخنثون لضرب ضحية ما يذكرنى بمنظر مجموعة من الكلاب تتصارع على قطعة من اللحم ملقاة على الأرض و نباح الكلاب و حركاتهم العنيفة يملأ المكان أملاً فى الحصول على الجزء الأكبر من قطعة اللحم التى يتم نهشها. أيها الكلاب: إنكم تنهشون جسد مصر - تنهشون أطهر من فى هذا الوطن.



لم أجد من الكلمات ما أرد به على زميلى البريطانى فى العمل وهو يحمل جريدة تتصدر صفحتها الأولى صورة الفتاة المسحولة و الجندى المخنث يضربها فى صدرها. سألنى زميلى: ماذا يحدث فى مصر و لماذا يعاملكم الجيش و الشرطة بهذه الوحشية؟ لم أجد كلاماً أرد به على سؤاله سوى الاستئذان بالانصراف لأغسل عينى التى ملأتها دموع الحسرة على ثورة سلبها أعداء مصر و شمت فيها بتوع (خربتوا البلد).


ببساطة كده - شوية رسائل قصيرة:
** إلى كل من تساءل هى البنت مكنتش لابسة ليه حاجة تحت العباية؟ : و إنت مال أمك !! إنت حتحاسبها على اللى فوق العباية واللى تحتها كمان؟؟ !!!



** إلى كل من سخر من هذه الفتاة و جعلها مادة للتهكم: والله العظيم والله العظيم والله العظيم: افعل ما شئت فكما تدين تُدان - و ابقى خلى بالك من بناتك و مراتك و أخواتك !!

** إلى كل من يتهم 6 إبريل و حركة كفاية بالتمويل الخارجى و العمالة: زهقت من الرد على الموضوع ده - تأخذ كام و تقف أمام قطار يجرى بأقصى سرعة؟؟ طب كنت تأخذ كام و تقف وحدك محاطاً بالأمن المركزى و أباطرة أمن الدولة فى مجدهم و تقول فى وجههم: يسقط يسقط حسنى مبارك - أمن الدولة كلاب الدولة؟؟ !!! الناس اللى بتتهمهم دوول كانوا بيتكلموا لما رجالة كتير زيك كانوا بيلبسوا طُرح !! الناس دى اللى خلت اللى يسوى واللى ميسواش واللى كانوا بيبوسوا الأيادى يطلعوا و يعملوا سياسيين دلوقتى !! قولوا شباب أرعن - قولوا معندهمش خطط واضحة - بس متقولوش عملاء و افتكروا الطُرح اللى فى دولابكم !!

** إلى بتوع خربتوا البلد: برضه زهقت منكم جداً - كل ما أتحاور مع أحدهم و أقول له: يعنى إنت كان عاجبك حال البلد أيام مبارك؟
- يقول لى: طبعاً لأ - ده كان ابن تييت و خربها.
- طب زعلان ليه دلوقتى يا عم و واقف ضد الثورة ليه؟
- يقول: كنا عايشين فى أمان و عربيتى كانت حتتسرق و الغوانى فى الشارع.
- أقول له: و إنت زعلان من الثورة ليه؟ ما تروح تمسك فى بتوع الداخلية اللى مش عايزين يشتغلوا بإحترام !! هو يا يضربوا المصريين بالجزم يا ميشتغلوش؟؟!! إنت زعلان من الشخص الغلط.
- طب بتتظاهروا و معتصمين ليه؟
- هو فى حاجة فى 10 شهور دوول اتعملت من غير تظاهر و إعتصام؟؟ رووح امسك فى المجلس العسكرى اللى مش بينجز مش فى الثوّار
- طب مش لما يعملوا ثورة يبقوا محضرين حلول بديلة و عارفين الخطة؟
- حاضر - حأبقى أكلم محسن بيه - الثورة الجاية إن شاء الله.
- مليش دعوة: إنتم خربتوا البلد
- ثكلتك أمك يا شيخ !!


شوية أسئلة على السريع:
- محاكمة قتلة خالد سعيد وصلت لفين؟
- محاكمة مبارك و أعوانه وصلت لفين؟
- مين اللى قتل المعتصمين فى ماسبيرو؟
- فين نتائج تحقيقات شارع محمد محمود؟
- فين لوحة زهرة الخشخاش؟ و مين أدين بصورة نهائية؟
- مين بيأخذ معونة من أمريكا علنى و لسة بيصد غاز لإسرائيل؟
- علاء عبد الفتاح مسجون ليه؟؟ و فين أدلة إدانته؟ و بيتحاكم عسكرى ليه؟
- مين فجّر كنيسة القديسيين و قتل مريم و أختها و مامتها و خالتها؟ و فين محاكمته؟
- إيه اللى تم إنجازه فى ال 11 شهر اللى فاتوا (غير موضوع التوقيت الصيفى و تغيير أرقام المحمول لو سمحت)؟
- ليه تونس اللى بدأت معانا بقى عندها رئيس جمهورية و بيفنشوا الدستور و إحنا لأ؟
- ليه لعبة (فرّق تسُد) بتلعبوها فى مصر مع إنكم كان ممكن تدخلوا التاريخ من أوسع أبوابه و تبنوا مصر على نضيف من الأول و الشعب كان كله وراكم؟
- ليه بتحطوا مندسين وسط الثوار علشان يشوهوا وجه الثورة؟ !!
- ليه ابتديت أخاف إن أخويا فقد تعاطفه مع الثورة و مبقاش عنده مشكلة إنه يضربهم مع إنه فى الأول كان مستحيل يعمل كده حتى لو القائد بتاعه حيقتله؟؟ ماذا قلتم له؟؟ !!

منقول عن صديق يعيش في انجلترا - له اخ ظابط محترم في الجيش المصري

مع الاعتذار لبعض الالفاظ التي قد تكون خارجة لكن حبيت انقل لكم كلامة بالكامل بدون اي تعديل - مع موافقتي علي الافكار بالطبع

[akerima]

http://www.youtube.com/watch?v=DhRAG...ature=youtu.be

بس عشان تبقوا عارفين ليه الراجل الانجليزي كان مستغرب من اللي بيحصل في مصر

[lost2008]

إذا كنت من مؤيدي الرئيس مبارك فارفع رأسك ,

إذا كنت من مؤيدي المجلس العسكري فارفع رأسك ,

إذا كنت من مشاهدي التلفزيون المصري فارفع رأسك ,

إذا كنت من بتوع (((خربتوا البلد))) فارفع رأسك ,

إذا كنت من القائمين بدعم طنطاوي فارفع رأسك

اما اذا كنت من الثوار المطالبين بالحرية .. فارفع قدميك دوس على كل تلـــــــــك الرؤوس فكلهم مكانهم تحت أقدام الثورة..

مسحول كبير

منقول من الفيسبوك عن طالب ثانوية عامة من الى اتسحلو.

[akerima]

كبيره اوي

[walidelmorsi]

المشاركة الأصلية كتبت بواسطة akerima http://www.youtube.com/watch?v=DhRAG...ature=youtu.be بس عشان تبقوا عارفين ليه الراجل الانجليزي كان مستغرب من اللي بيحصل في مصر

بارك الله فيك