لم يكن التيل السبب

[tham1010]

أعزائى عندى ماتركس 2001 وارد الخارج. من يوم ما جبتها وأنا بأسمع صوت نحر فى العجلة الأمامية يمين ( صوت زى ما يكون واحد بيسن سكين على حجر) كان كل التفسيرات اللى الأعضاء شاركوا عن سبب هذا الصوت هو ان التيل هو السبب ولابد من تغيرة وخاصة ان السيارة مستوردة ولا اعرف متى تم تغير التيل..

أشتريت تيل جولد الكورى ورحت لميكانيكى غير لى التيل من أسبوعين. وكان التيل القديم متاكل وسايب من الإطار بتاعةكمان... وأنا مروح سمعت نفس الصوت لمدة ثوانى واختفى قلت يمكن السبب ان التيل لسة جديد ومش طبع لسة. المهم اليوم طلعت بالعربية كالعادة ووجدت أن الصوت ظهر من جديد والحقيقة الصوت لما طلع لم يكن لانى ضغت على الفرامل ولكن كنت ماشى على طريق فى حفر وأخدت حفرة صغيرة بالعجلة اليمين وجدت الصوت ظهر وأستمر لعدد من الدقائق كان فيها يزيد أحيانا ويختفى قليلا احيانا لحد ما الصوت راح لوحدة وكملت المشوار بتاعى عادى ومش ظهر تانى

أنا نفسى اعرف سبب الصوت دة ممكن يكون من ايه؟ أنا راكن السيارة فى شارع عمومى والتراب فيه بالهبل وبأطلع بالعربية مرة كل أسبوع لمدة ساعة فقط وطوال الاسبوع العربية مركونة فى الشارع ومتغطية... هل من تفسير عن سبب الصوت.هل ممكن يكون التراب. هل هو من التيل ام حاجة تانية. وللعلم الصوت مش بيطلع إلا من العجلة اليمين فقط. متشكر جدا للرد

[أيمن الروبي]

المشاركة الأصلية كتبت بواسطة tham1010 أعزائى عندى ماتركس 2001 وارد الخارج. من يوم ما جبتها وأنا بأسمع صوت نحر فى العجلة الأمامية يمين ( صوت زى ما يكون واحد بيسن سكين على حجر) كان كل التفسيرات اللى الأعضاء شاركوا عن سبب هذا الصوت هو ان التيل هو السبب ولابد من تغيرة وخاصة ان السيارة مستوردة ولا اعرف متى تم تغير التيل.. أشتريت تيل جولد الكورى ورحت لميكانيكى غير لى التيل من أسبوعين. وكان التيل القديم متاكل وسايب من الإطار بتاعةكمان... وأنا مروح سمعت نفس الصوت لمدة ثوانى واختفى قلت يمكن السبب ان التيل لسة جديد ومش طبع لسة. المهم اليوم طلعت بالعربية كالعادة ووجدت أن الصوت ظهر من جديد والحقيقة الصوت لما طلع لم يكن لانى ضغت على الفرامل ولكن كنت ماشى على طريق فى حفر وأخدت حفرة صغيرة بالعجلة اليمين وجدت الصوت ظهر وأستمر لعدد من الدقائق كان فيها يزيد أحيانا ويختفى قليلا احيانا لحد ما الصوت راح لوحدة وكملت المشوار بتاعى عادى ومش ظهر تانى أنا نفسى اعرف سبب الصوت دة ممكن يكون من ايه؟ أنا راكن السيارة فى شارع عمومى والتراب فيه بالهبل وبأطلع بالعربية مرة كل أسبوع لمدة ساعة فقط وطوال الاسبوع العربية مركونة فى الشارع ومتغطية... هل من تفسير عن سبب الصوت.هل ممكن يكون التراب. هل هو من التيل ام حاجة تانية. وللعلم الصوت مش بيطلع إلا من العجلة اليمين فقط. متشكر جدا للرد

الصوت اللي حضرتك بتوصفه صوت تيل فرامل غالبا او بليه عاوزه تتغير بس صوت البليه بيكون ارخم شويه غير البليه وشوف

[محمد حسن عبد الرحمن]

خلى عفشجى أو ميكانيكى يركب معاك العربية وسمعوا الصوت اللى حضرتك بتقول علية أنا كان عندى صوت مشبه للصوت اللى حضرتك بتقول علية مش أنا بس وصاحبى كمان أن هقول لحضراتك أمكان كل الحاجات اللى قد تطلع أصوات من عند العجل لعل وعسى تستفيد و تجد حلا لمشكلتك والله الموفق:
1- تيل الفرامل.
2- حصوة أو ظلطة تكون محشورة بالعجل.
3- يوجد غطاء يغطى جهاز الفرامل قد يكون هذا الغطا غير مثبت كويس أو به أنبعاج فيحك فى الطنابير ويعمل الصوت ده.
4- من الممكن أيضا أن لما حضرتك بتدوس فرامل التيل مبيرجعش مكانه للأخر.
5- فى حاجة تانية وديه كانت موجودة عندى من فترة ولا تزال موجودة بسيارتى وهى لادا والصوت جاى من وراء من عند العجلة اليمين وراء وسيارتى ذات دفع خلفى وهى رومبيل فرك ومشيت علية لدرجة عمل فى الأكس اللى راكب داخل الدفرنس مشكلة ويحتاج الى أكس جديد.
6- حضرتك بتقول أن عربيتك ماتريكس يعنى سحب أمامى أية أخبار الكابلن معاك تمام والشحم تمام.
7- هل جربت أنك تغسل السيارة وتشحمها.
8- هل سيارة حضرتك بجنوط حديد وحضرتك غيرتها بجنوط المونيوم وأجهزة الفرامل قريبة من أطار الجنط وعند حدوث المطب الجنط يقرب أكتر من جهاز الفرامل فيحدث ذلك الصوت.
9- هل حضرتك حلت الجنط اللى فيه المشكلة وبصت علية من جوة هل يوجد به تأكل أو كان شئ بيحك فية.
والله يا باشا هى ديه الحاجات اللى كانت هفكر فيها لو كنت فى موقفك فتأكد من هذه الأشياء أو لو تعرف ميكانيكى أو عفشجى يكون خبرة خبرة خبرة يبصلك ويشوف فيها أيها وأن شاء الله تجد شيئا بسيطا جدا.
وأرجو أنى أكون قدرت أفيد حضرتك ولو بالقليل وأنشاء الله بقية الأخوة الأعضاء يفيدوك أكثر منى.

أخوك محمد

[محمد حسن عبد الرحمن]

أه نسيت أقول لحضرتك كمان لما تيجى تحل الجنط بص على المسامير الخاصة بربط الجنط وشوف هل يوجد بها تأكل أو حكات وهل هى بتلمع ولا مصدية وبص كمان على الجسم اللى بتربط علية الجنط هل يوجد مسامير متأكلة أو بتلمع أو مصدية أو حتت فيها بتلمع ولا المسامير كلها مصدية أو نظيفة لو حاجة بتلمع يبقى الحك يحدث فى النقطة اللى بتلمع أما لو مصدية فلا تقلق ولا يوجد حك بالمنطقة المصدية أو التى بها صدأ وتبقى طمنا وقولنا أيه النظام وربنا يقويك وخليك يوم الأجازة أنت واحد صاحبك تعملو الشغلانة ديه وربنا يوفقك.

أخوك محمد

[tham1010]

متشكر جدا لكل من رد على. الحقيقة انا مليش اوى فى الحاجات الكثيرة اللى أ/ محمد حسن بيقول عليها. اللى يغيض انك مش تقدر تعرف امته هيظهر الصوت ولكن السبب اللى بفكر فيه هو أن البستم بتاع خزنة الفرامل مش بيرجع للخلف تماما وان مع أى مطب بيحدث تماس بين الطنبورة وتيل الفرامل.

العربية فيها جنوط أسبور ألمونيوم. يعنى تقدر تشوف الطنبورة والخزانة بتاع الفرامل. وقد حدث مرة قبل تغير التيل انى أثناء السير طلع رائحة شياط وكمان دخان من هذه الفردة ووجدت أن العربية لا تسحب مع الضغط على دواسة البنزين على الاخر ولكن عداد RPM لم ينكن يتحرك نهائيا كما لو لم أكن ضاغط على الدواسة الخاصة بالبنزين ولم يكن صوت المحرك يرتفع. وفسرت الامر ان العجلة بتكون قافشة كما لو كنت دايس فرامل. المهم رحت غيرت التيل لهذا السبب. ولم يحدث هذا بعد تغير التيل. وعندى تشكك أنه ممكن يحدث هذا العطل من جديد لو تركت التيل يحك هكذا. على العموم أن هراقب الامر من جديد. وطبعا ممكن اكون مخطأ ايضا وان الصوت من منطقة اخرى لانى عندما اسمع الصوت أكون قائد للسيارة. وإذا توقفت توقف الصوت. لهذا صعب تحديد مصدر الصوت بدقة على الرغم من أن حاسة السمع لدى تؤكد إنها من هذا المكان..

أنا لم اغسل السيارة مطلقا سواء بنفسى أو فى مغسلة. ولم اقم بتشحيم السيارة لانى أعرف ان السيارات الحديثة لا يتم تشحيمها. كذلك ليس عندى شكوى من الكبالن وأعتقد ان الشكوى تكون فى اللف شمال ويمين فقط ولا يذهب الصوت ويظل مستمر..

شكرا للرد وننتظر مزيد من الردود.. بارك الله فيكم