مشكلة في سيارتي الشاهين .. مطلوب المساعدة من أهل الخبرة

[prof.moka]

أنا معايا شاهين 2005 ومن حوالي 7 شهور سمعت صوت ونه ضعيفة عند سرعة معينة
وشكيت في بلي العجل بس لما ودتها للميكانيكي قال لي المشكلة في الكرونة
شكيت في كلامة وقلت أوديها للتوكيل علشان يكشفوا عليها وفي التوكيل أكدولي ان السيارة فيها مشكلة في الكرونة والكرونة الأصلية الجديد ب 7500 جنيه

تماشيت مع الأمر وكبرت دماغي بس بقيت بحطلها زيت تروس 140 بس كل شوية الصوت بيذيد عن الأول
ودلوقتي الصوت أصبح مزعج جدا وظاهر في أي سرعة بس الونه دي بتظهر وأنا دايس بنزين بس ولو شلت رجلي من علي دواسة البنزين الونه بتروح
وفي آخر مرة كنت بغير فيها زيت التروس لقيت برادة حديد في الزيت
المشكلة اني بسافر بيها من الغردقة للقاهرة رايح جي مرة كل شهر

حد يقدر يساعدني في الموضوع ده وهينفع فيها أصلاح و حد يعرف حد أصلح عنده يكون موثوق فيه؟؟
أرجو المساعدة

[AbOnOrA]

ممكن تىجيبها استيراد بس انصحك متتبعش نفسك وتخسر فلوسك فى التصليح علشان مش هيجيب نتيجة حاسمة اسئل على سعرها جديدة بره التوكيل واسال على الاسعار استيراد وسيبك من التصليح خالص

[tamer.koko]

في حل مؤقت ممكن تعمله ومعمول عن تجربه وماشي كويس هات كرونه 131استيراد ال 1600 بتركب عليها علاطول بدون تعديل

[essamenen]

المشاركة الأصلية كتبت بواسطة tamer.koko في حل مؤقت ممكن تعمله ومعمول عن تجربه وماشي كويس هات كرونه 131استيراد ال 1600 بتركب عليها علاطول بدون تعديل

كرونه 131 اطول من الشاهين من ناحيه عمود الكردان لازم تعمل تعديل
ركب كرونه الشاهين وانصحك بعدم تركيب اى نوع اخر ( فولفو او تويوتا )

[mr_astra]

للاسف الحاجات دى مش بتتباع برة التوكيل
الحل من وجهه نظرى
1- تجيب ببة بتاعة شاهين واعتقد ان سعرها 1000 جنية
2- تجيب تاج وبنيون جديد وتقريبا سعرهم 750 جنية مع تغيير الاويل سيل والبلى ان وجب وبامر الله تطلع كويسة واهى جديدة
مين بقى اللى يعملك القصة دى
واحد فى ميدان حدائق القبة امام القصر الجمهورى من ناحية محطة مترو الانفاق
الاسم / الحاج حمدى
للاسف بدور على رقم موبايلة مش لاقية لكن اعتقد من الوصفة كدة هاتوصل بامر الله