ساعدوني ضروري -BMW ولا seat leon ولا golf

[Ahmed_bokhary]

لو سمحتم يا جماعه أنا معايا حوالي 135000 و قصادي :
1- BMW 116i موديل 2007 أو 2008
2- seat leon موديل2010 أو 2011
3- GOLF موديل 2011 أو 2010
و التلاته تقريبا بنفس السعر , يعني مابين 115000 و 135000 , عاوز أعرف أختار ايه ؟ هل الفروق كبيره يعني بينهم ؟
محتاج اعرف رأيكم و رأي الناس اللي عندها عربيه من دول لو امكن .

[AbOnOrA]

نقول كمان مفيش عربيه افضل على الاطلاق لكن فيه عربيه انسب ليك او لى ومش شرط المناسب لى يكون مناسب ليك لان طبيعة احتياجاتى وترتيب اولوياتى يختلف عنك فالقرار فى الاخر ليك انت لوحدك

لكن انا هقولك رائى فى كل عربيه بشكل عام

البى ام ال 116 فى رائى من اجمل عربيات البى ام الحديثة تصميماً من الناحية الجمالية وبنفس القدر من اسواء العربيات تصميماً من الناحية العملية
فاولاً هى وارثة نفس عيوب الجيل ده من البى امات سواء كثرة الاعطال وتعقيدها او غلو قطع الغيار والصيانة
وثانياً وهو الاهم فى رائى ان الكنبة الخلفيه ملهاش اى لازمة فتصميم العربيه المدمج مع كون العربيه دفع خلفى وده بياخد من المساحة الخلفيه مخلى الشنطة والكنبة الخلفيه ضيقين جداً وغير عمليين يعنى لو انت شاب ومش متجوز او متجوز جديد ومش مخلف ماشى لكن عندك عيال ومشاوير عائلية الموضوع هيبقى صعب ويدايق وهتتمنى لو كنت اشتريت حاجة اوسع

وثالثاً ان العربيه 1600 سى سى وده فى رائى قليل جداً على عربيه دفع خلفى فانت عايز على الاقل موتور 1800 ان مكانش 2000 سى سى علشان تديك اداء متوازن ومعقول وان كان فى رائى ان البى ام ميتحسش متعته مع المواتير الاربعة سلندر عموماً

واخيراً هى من اتقل موديلات البى ام انتشارا وبالتالى اغلاها فى قطع الغيار واتقلها فى اعادة البيع
يعنى بتتقارن بالمينى فى الندرة وان كانت المينى مميزة اكتر طبعاً واشيك بكتير

الليون والجولف تقريباً عربيه واحدة وان كنت اميل للجولف باعتبارها اكثر انتشاراً وقطع الغيار اسهل وكمان اعادة البيع يعنى تقدر تقول ان الجولف هى الاختيار الاكثر عملية مابين العربيات التلاتة
وطبعاً الرينج ده فيه عربيات كتير غير دول بس زى ما قولت فى البداية الخيارات ديه يحددها برضو احتياجاتك واولوياتك

[Ahmed_bokhary]

ألف شكر يا AbOnOrA على الرد السريع , بالنسبه لل bmw 116i أفهم من كلامك ان ركوب شخصين في الكنبه ورا يكون متعب جدا ليهم ولا مقبول خصوصا لو الكراسي مش راجعه لورا جامد ؟
بالنسبه لأعطالها الكتير , المعلومه دي أكيده ؟ أنا كان في دماغي ان دي أقل عربيه في التلاته حيكون فيها أعطال لأنها ببساطه bmw ده غير اني عارف قطع غيارها غاليه و محترمه و بتعيش , أما ألجولف أنا سمعت ناس كتير بتشتكي من الفتيس بتاعها ! ولو هي زيها زي السيات ليون يبقى أعتقد السيات أحسن من حيث ألشكل بالنسبالي لأن الجولف هاتش باك تقليديه جدا يعني , و طبعا قطع غيار السيات حتكون أرخص , عموما بالنسبه لقطع الغيار هل التلاته أسعارعهم متقاربه ؟ يعني الصيانه الدوريه تتكلف كام مثلا ؟

[Omar Hammoudy]

أنا رائي برضو متناسب مع رأي الأستاذ AbOnOra، من ناحية قوة المحرك أعتقد الBMW هتكسب بس يلفرق مش كبير بمن المحركين 1600 سس اما التوفير فا الجولف موفرة أكتر من ناحية الإقتصادية و البنزين,, BMW احسان شكلان من بارا بس أنا بفضل تابلو الجولف لأنه شكله متطور أكتر بكتيير فرأيي . أخيرا لو أنا مكانك اروح أشتري الألماني المنتشر عشان برضو وقت ما تحيب تشتري حاجة برا التوكيل تلاقيها بسهولة

[Ahmed_bokhary]

طيب معلش سؤال أخير , انا قصادي ليون 2011 اوتوماتبك و عجباني , بس في ناس خوفوني من الفيتيس بتاعها و نصحوني أشوف ليون مانيوال ! الكلام ده صح ؟ و هل في منها مانيوال 2011 ولا آخر المانيوال كان 2010 ؟؟؟؟؟