[حبيب الناس]

الاخت فاتن ربنا يبارك فيكي وربنا يكرمك وعربيتك تتصلح وتبقي في احسن حال ومتبيعهاش وتكون معاكي علي طول لان بجد العربيه الماروتي ممتازه جدا وخاصة ان اللي بيستخدمها مش من هواة السباقات في الطريق لانها عربيه جميله واقتصاديه جدا في كل حاجه
بالنسبه لباق تسائلاتك الاخ hm414 اجاب علي جزئيه هامه منها وهيا الكشف عن تسريب الزيت من الماتور او فلتر الزيت وده بيتم انك بتروحي بنزينه كويسه وتغسلي الماتور فيها قوليلهم عاوزه اغسل الماتور كيماوي فيه بنزينه في اول شارع مصدق بالدقي تحت الكوبري بتغسل الماتور بالكيماوي تقربا 20 جنيه والعربيه تقريبا ب10 جنيه ولو غسلتيه عادي كان تقريبا ب 10 جنيه انا بروح اغسلها من بره وبتترفع وتتغسل العفشه وبغسل الماتور وبيكنسوها من الداخل بمكنسه وبيمسحوها من جوه كل ده مبيكملش 50 جنيه بالاكراميه يعني اللي هيغسل الماتور والعفشه واحد او العربيه من بره والماتور واحد بديه 5 جنيه والتاني 5 جنيه بصراحه العربيه بتطلع عروسه المهم بعد اسبوع من الغسيل تروحي للمكانيكي يبسلك يشوف العربه بتسرب زيت ولا لأ
وفيه بنزينه في شارع امتداد رمسيس في مدينه نصر بعد نقابة المحاسبين وقبل اللفه بتاعة ارض المعارض بتغسل العربيه كلها بره وجوه ماتور ب 27 جنيه بس
ملاحظه لو الماتور هيتغسل بميه وجاز فقط يعني مش بي الكيماوي خلي الراجل يلف كيس نيلون علي الاسبراتير ومكان البوجيهات كويس علشان ميدخلش لهم ميه ويبوظو
كمان فيه حاجه مهم وهيا كيفيه قياس الزيت :
علشان نقيس الزيت بطرقه عمله صحيحه لازم العربيه تكون واقفه علي ارض مستويه ارض عدله مش مطلع ولا منزل وكمان لازم العربيه متكنش دارت في خلال اربع ساعت علي الاقل يعني افضل وقت قبل ما تدوري العربيه الصبح لازم قبل التدوير علشان يكون كل الزيت متجمع في كارتيره الزيت علشان المقاس يكون مظبوط
اولا نخرج مقاس الزيت نكون محضرين منديل ونمسح بيه المقاس كويس ونرجع نرجع المقاس مكانه وندخله كويس حتي اخره مكانه ونثبته جيدا وبعد كده نخرج المقاس ونشوف نسبه فقد الزيت ده اسلم طريقه لقاس الزيت ولازم تكون العربه متبطله بقالها حوالي اربع ساعات
ممكن نقيس الزيت في اكتر من كان يعني انا بقيسع تحت البيت الصبح وبقيسه قبل ما اروح من الشغل في الجراش علشان تكون قرايه المقاس اكيده
بالنسبه للسؤال عن لمبه قياس الزيت اللمبه مبتنورش الا لما الزيت يقل اقل من الحد الادني اللمبه بتنور او عندما مضخة الزيت تتوقف عن العمل او ينسد فلتر الزيت ويقوم بمنع الزيت بلانساب بشكل طبيعي او ان كون الحساس بتاع الفلتر عطلان