تجربتى مع تويوتا الياريس
بسم الله الرحمن الرحيم
الشكر كل الشكر لرجال موقع مصر موتورز ماشاء الله شعله فى النشاط
مصدقتش نفسى ان هناك موقع مصرى عربى بيتكلم عن اختراع اسمه السيارات
يارب للامام على طول
ندخل فى الموضوع
انا من هواة التغيير فى قيادة السيارات
أبتديت بسياره شاهيين وبعد كده تويوتا عيون وبعد كده لانسر1300 موديل 2004 وبعد كده نيسان صنى فول اوبشن وبعد كده لانسر خليجى موديل 2007 فول اوبش يعنى كله فول اوبشن اتوماتيك واخيرا مع الياريس
بصراحه الانسر عربيه ممتاذه واعطالها قليله جدا بس بحس انها مش يابانى يمكن لخشونتها وعدم سرعتها وعند اى ميكانيكى تعمل اللى انت عايزه
المهم اشتريت ياريس فول اوبشن موديل 2008 ب 80 الف وماشاء الله سحبها ممتاذ قفلت العداد 195 كم س والعربيه بحاله ممتاذه وفجاءه واحد قال لى اعمل ليها كتاوت نور علشان نورها ضعيف عملت لها كتاوت مع تركيب 2 لمبه المانى بمبلغ 300 جنيه...
انا عارف ان السعر غالى قلت مش مهم والحمد لله تمام
ضربت فى دماغى اعمل شوية شغل فى الماتور علشان اذود السحب ويرتاح الماتور
ذهبت الى احدى الميكانيكيه طبعا مش توكيل راح عمل شوية غسيل للماتور وفك طرمبة البنزين علشان ينظفها من الداخل . وتم تركيبها وحسيت ان فى حاجه غلط فى التركيب وكان احساسى صح . اول ما ذهبت من عند الميكانيكى لاقيت مؤشر البنزين مش متحرك وكمان ريموت العربيه مش بيفتح خالص الا مع دخوله فى الباب
نسيت اقول علشان اغير فلتر هواء حافيت علشان اجده ولكن دون جدوى
ذهبت لاقرب توكيل تويوتا عندنا فى محافظنى وكان فى مدينة دراو بمحافظة اسوان
من كلامهم حسيت عايزين ينصبوا اول حاجه سالتهم عن الطرمبة والريموت قالوا المهندس هيجى بعد شهر اوك.
قالوا هنعملك صيانة 50 الف قلت ماشى طب بكام قالوا 620 جنيه طب هتعملوا ايه
قالوا 1 - هنغير فلتر هواء 2- هنغير ذيت ماتور 3- هنغير فلتر ذيت 4- هنكشف على الماتور والعفشه . قلت لهم عايز اسمع تانى راحوا بسرعه خفضوا المبلغ من 620 الى 490 جنيه قلتلهم ليه
قالوا ذيت موبيل وان ب 260 ج - فلتر ذيت ب 35 ج واخيرا فلتر هواء 95 جنيه
وشوية تظبيطات فى العفشة ب 100 جنيه وبعد نقاش خفضوا المبلغ ل 80 جنيه وفى الاخر كتبوها مصنوعيات طبعا انتم عارفين الميكانيكى التوكيل شكله ايه
يروح ياخدك على جنب ويقولك هعمل وهعمل وهعمل كله علشان البقشيش
المهم سوف اذهب بها الى الغردقه بعد العيد .
مميزات تويوتا الياريس
عدم استهلاك البنزين 370 كم لكل 35 لتر بنزين
سرعه السحب عن الانسر
راحه فى الصالون
عيوبها
أقل خدشه تؤثر فى جسم السياره
قطع غيارها غير متوافر بره التوكيل
مش اى ميكانيكى أو كهربائى يشتغل فيها
والتضارب فى السعر بالنسبة للمستعمل
وأخيرا تويوتا هى تويوتا
وأخيرا طولت عليكم
والسلام عليكم ورحمة الله وبركاته
|