تم بحمد الله انهاء صيانه العربيه عند الاستاذ حمدى و العربيه رجعت احسن ما جبتها من الاول
اولا اعطال العربيه :
1 - العربيه كانت يوجد بها تقطيع بالمتور و بتفصل فى السلانسيه و كان تقريبا من المستحيل قيداتها السبب ( ميكانيكى اخر بتاع رينو زى ما يافطه الورشه بتقول كان بيركب ترس الكرنك و طلمبه المياه ) العربيه طلعت من عنده كده و فى تفاصيل كتير ملهاش دعوه
2- بس كده
ثانيا : مرحله العرض على الاستاذ حمدى :
روحت للاستاذ حمدى فى ورشته فى بلاوق الدكرور من نزله المعتمديه على الطريق الدائرى يوم السبت 23/8/2014 و تعبت تقطيع و سخونه و مدافع من العربيه لحد ما خلاص و كمان الحر اليوم دا كان عجيب و الزياده الى كملت عليا الكلام الى كنت بسمعه من الناس على الطريق علشان العربيه بتبطل
المهم دخلت و رشه الاستاذ حمدى الساعه 12 ظهرا و بعد ما شفت الورشه قلت فى نفسى
ازاى واحد زى الاستاذ حمدى و عنده اختراع
قاعد فى الورشه الصغيره دى و دا معناه انه تعب بجد و اشتغل بجد بالامكانيات المحدوده دى بس و عمل حاجه مهمه و دا زاد من احترامى ليه اكثر و اكثر
المهم تانى معلش بطول كتير و صل الاستاذ حمدى الساعه واحد ظهرا
اول ما جه الصراحه ابتدينا علطول قالى دور و زود بنزين خلصنا الكشف المبدئى و لما جه يفك البوجيهات اتصدم نفس صدمتى البوجيهات عايزه مفتاح (14) و اتصرف و عملنا مفتاح عموله و تعب معايا عقبال ما فكينا طلعت البوجيهات (بوش سوبر) بقالها 10 سنين فى العربيه عامله 128 الف كيلو (شكرا اوى) و لسه شغاله
غيرنا البوجيهات و مفيش تغيير قلتله انا شاكك فى البوابه و حساس السلانسيه قالى لا مفيش فيهم حاجه من اصرارى فكهم و مطلعش فيهم حاجه ( انا اتحرجت ) المهم كملنا شغل و بصينا على كل حاجه قالى بس كده الموضوع عايز كمبيوتر و سيب العربيه علشان محتاجه وقت قلتله ماشى اتكل انا و كانت الساعه 5 و اتعلمت حاجات كتير فى العربيه اليوم دا
ثالثا : قطع الغيار و اماكن الشراء و الاسعار
1- اربع رشاشات بنزين كليو 2004 1.2 سى سى = 350 جنيه من غير المسطره استيراد
2- حساس كرنك استيراد :150 جنيه ( ايوه غالى )
3- حساس حراره = جديد 175 جنيه اصلى (غالى بردوه ) المكان فى الحاجات الثلاثه محل اسمه شركه مرسيليا الهندسيه
4- طقم كويلات ( الموبينه بسلوك البوجيهات ) اصلى بى 350 جنيه من التوكيل ( لى معرفه ) ثمنها الاصلى 790 جنيه من غير ضريبه المبيعات
5- اربع بوجيهات شامبيون ستوك ارخص حاجه مش فاكر بكام و شكلهم مرطبيين كنت جايبهم من سنه وركنتهم
6- فلتر هوا و زيت + زيت موبيل دلفاك ام كس 3 و معاه علبه STB
رابعا : و اهم شى الكشف على العربيه بجهاز الكمبيوتر
المهندس و هو الى قال ان فى رشاش مكسور و حساس حراره بايظ و الرشاش المكسور هو الى مبوظ الدنيا و هو المهندس محمد رمضان و معرفش اى حاجه ازيد من كده
و فعلا الكلام كان مظبوط
خامسا : المرحله النهائيه
و هى انى رحت جربت العربيه بنفسى و فعلا رجعت احسن من الاول و كانت ممتازه
و فى الفتره دى كل مره بحس انى بتعامل مع اخ و صديق و انسان ممتاز و محترم
و مصنعيته غاليه شويه ( ههههه فعلا يستحق اى حاجه يطلبها انسان فاهم هو بيعمل ايه و تعب جدا فى العربيه و فعلا مفيش حاجه مبصش عليها )
نيجى بقا للصور معلش الصور كانت بليل و فى الظلمه
