[AbOnOrA]

انا عن نفسى مقتنع بفكرة صاحب الموضوع جداً وحصلتلى مواقف كتير بلاقى نفسى اما اخد الغرزة واما بالسلامة هلبس وش

والناس اللى رايها ان الغرز ممكن متكونش ليها لازمة لو الواحد ماشى على مهلة برضو عندهم حق بشكل كبير لكن مش على الاطلاق لان الطرق بتاعتنا مهياش عدلة ابداً وبيحصل وانت ماشى تلاقى واحد ماسك الشمال وبطىء على مهلة فبتضطر تعدى منه يمين وبيحصل وانت ماشى تلاقى حفرة مميتة على جنب من الطريق لو اخدتها هتقلبك او صندوق زبالة او بقعة مية فالخلاصة الاصول حلوة مفيش كلام بس لما تبقى ماشية على الكل طريق ومستخدمى الطريق

نيجى بقى لاصل الموضوع اولاً تسلم ايدك على النصائح المهمة واحب أأكد بشدة على ظبط الكاوتش سواء حالتة العامة او مستوى ملو الهواء لان لو فيه فردة نايمة شوية حتى ولو ورا مش هتظبط الغرزة خالص وهتخلى العربية تعوم

طبعاً العفشه لا تقل اهمية عن كل ده وبالاخص ظبط الزوايا وحالة المقصات والمساعدين والسوست وبرضو علبة الدريكسيون ميكونش فيها بوش

كمان حالة العربيه اذا كانت محملة (وزن او ركاب) بتفرق جامد لان العربيه لو كانت محملة الاستجابة بتاعتها بتبقى ابطاء سنة والفرامل بتبقى اضعف والسحب كمان ويفضل عموماً متعملش غرز وانت مركب حد معاك

تسلم ايدك مرة تانية ولو افتكرت حاجة تانى هبقى اكتبها