[ابو هيما]

المشاركة الأصلية كتبت بواسطة تامر ديزل سلامو عليكم احب اوضح شويه نقاط بسيطه على حسب معلوماتي الزيت التخليقي هوه زيت معدني برضه من مشتقات البترول ولكن بيتعمل له تنقيه للشموع اللي بتيقى فيه احنا عارفين ان من مكونات البترول الخام هيا الشموع ودي بتعمل طبقات من الشمع جوا الموتور وعندها قابليه للالتصاق بجسم المحرك من الداخل وعلى السبائك بتاعت الكرنك والبيلات طبعا الطبقه دي بتقلل من كفاءة دورة التزييت فالشركات توصلت الى طريقه تتخلص بيها من اكبر قدرممكن من الشمع اللي ف الزيت والمعامل دي كلها بره مصر علشان كده بيقولك ده زيت مستورد لانه فعلا مستورد سواء كان موبيل او شل الزيت ف العربيه له عدة وظائف التزييت والتبريد والتنظيف التزييت معروفه لتقليل الاحتكاك بين الاجزاء المتحركه والتبريد لانه بيعدي على اماكن دورة التبريد بالميه ما بتوصلهاش زي التاكيهات والبيلات من تحت والتنظيف لانه بيستوعب جواه جميع الشوائب اللي بتبقى جوا الموتور وناتجه عن الاحتراق وبيفتتها جواه علشان ماتتكومش وتعمل ذرات صلبه ممكن تسد مجرى زيت او تبوظ سبيكه ولعلمك الزيت الكويس هوا اللي اول ما تحطه يلم الشوائب جواه ويغير لونه ده لو الموتور قديم مثلا انما الكلام اللي بنسمعه ان الواحد يقولك انا منزل زيت المكنه اخضر زي ماهوا بعد 3000 كم ده زيت تعبان لانه ما بينضفش المكنه من جوا فاضل معلومه الارقام بتاعت 50w20 معناها خواص اللزوجه للزيت يعني اقل درجه 20 واعلى درجه 50 على مقياس اللزوجه ودي درجات مصنفاها الجمعيه الامريكيه المختصه بالزيوت والمعلومه التانيه ودي مش متاكد منها اوي ان الزيت اللي مكتوب عليه 20w50 بيكون درجة لزوجته 50 وهوا سخن و20 وهوا بارد ازاي مااعرفش رغم ان اللزوجه بتتاثر عكسيا بالحراره وياريتلو حدمن المتخصصين يشرحهالنا لان انا بقالي عشر سنين بتعامل ف الزيوت وكل مره اسال بتوع الزيت يقولولي هيا كده معلهش انا اسلوبي عامي شويه لاني دايما بحب اتكلم اللغه اللي يفهمها الكل ويتجاوبوا معاها ويارب اكون افدتك بمعلومه وشكرا لموضوعك الجميل

وعليكم السلأم ورحمة الله وبركاته
برده نفس النقطة اللى أثارتها مع الأستاذ elmenahary وهى موضوع الترسيبات التى يتركها الزيت المعدنى على الموتور لأنه مش معالج زى الزيت التخليقى لمنع هذه الترسيبات ...كده أنا فهمت صح كلأم حضرتك ولأ لأ؟!!!!
طب لو كده صح وهو ان المعدنى بيترك ترسيبات على الموتور ,طب يبقى أذاً كتر أستخدامه على المدى الطويل والثبات عليه زى ما أنا ما بعمل مع عربيتى يبقى كده مش كويس .ولأ أيه رأى حضرتك فى الكلأم ده .
برده بخصوص الأرقام اللى مكتوبة على العبوة .. هى خمسين ديه درجة اللزوجة يعنى أقصاها رقم 50 ولأ فى كمان 60 و80 و90و100.طب أيهما أحسن درجة لأزم الواحد يثبت عليها ويشتريها .ولأ ديه معناها درجة الحرارة اللى ممكن يعيش فيها الزيت , أصل لو كده يعنى تبقى الدرجة ديه قليلة أوى وخصوصاً أن الماتور بيبقى هايولع من السخونية فى الحر ..ولأ أيه؟!!!!!!!
أشكر ك مقدماً وجزاك الله خيراً وعلى فكرة خد راحتك فى الأسلوب العامى فى الكلأم أصل أنا بفهمه أكتر