[Ahmed_lol2007]

تسلم إيدك يا باشا
ولو إن الموضوع دة مش موجود عندنا
أنا رحت لوحدة مرور فيصل ( يارب إبعد كل الناس عنها )
قدمت ورقى عادى خالص من غير أى مشاكل وهو كالتالى :
2 صورة شخصية
2 شهادة طبية ( رمد - باطنة )
نماذج استخراج رخصة قيادة خاصة من خزانة وحدة المرور التابع لها.
ملف ورقي لحفظ الأوراق فيه ، مهم جداً ورقك يترفض من غيرة!!
البطاقة وصورة البطاقة
انا لم احتاج لاصل المؤهل لانى مكتوب فى البطاقة طالب
الموظف خد منى الورق بكل إحترام وقالى إمتحان القيادة الساعة 10 بالظبط ما تتأخرش المهم المتحان بدأ الساعة
12 قلت مش مشكلة نده على إسمى أخر واحد طبعا كنت إرتبكت وركبى بتخبط فى بعضها من اللى شوفتو من اللى كانو بيختبرو قبلى (كلو سقط معادا اللى كان داخل قبلى)
المهم ركبت العربية اللى عندهم فى المرور ومشيت ادام ورجعت بدهر العربية ميت فل وعشرة قالى روح للباشا عشان تمضى الورق بتاعك روحت للباشا المهندس راجل فى منتهى قلة الادب والسفالة (أسف على التعبير)
قالى إفتح إيدك وإقفلها وبعد كدة كتب لى لائق
طبعا فرحت وقلت نصف المهمة عدت
وقالى إطلع على إمتحان الكمبيوتر
جريت على فوق وبسأل العسكرى اللى واقف على الباب قالى الامتحان النهاردة خلص تعالى بكرة قلت مش مشكلة سألتو الامتحان بيبدأ الساعة كام قالى 8.30 بالظبط ماتتأخرش
تانى يوم الساعة 8.00 كنت هناك سالت العسكرى بتاع إمبارح قالى شوية إستنيت لغاية الساعة 11.00 لغاية ما الامتحان بدأ طول الفترة دى الباشا الرائد عمال يمضى ورق لناس جاية تبع وسايط من غير ما يمتحنو خالص طبعا انا اتنرفزت كان أكتر من 50 طلب كلو يخش يتمضى ويخرج يتصور قلت لما أشوف أخرها وبدأ فعلا الامتحان كنا ستة أشخاص المفاجاة إن من وسط ال 6 دول واحد من اللى سقطو إمبارح فى القيادة وهو الوحيد اللى نجح برده فى الكمبيوتر بدأ ينده على الاسامى كل اللى يدخل يخرج قالب وشه لغاية أما أنا دخلت الامتحان عبارة عن ورقة محطوطة على مكتب الرائد اللى بيمتحن وماسح الاسماء اللى تحت الرسمة بعد ما دخلت بدأ يشاور على الرسمة على ما أقولو على اسمها اللقيه قلب على غيرها المشكلة كنت عارف معظم الاشارات دى يعنى مش مثلا مكنتش عارف الاجابة لأ كنت عارف بس هو كان رخم جدا المهم خلصت كان 7 أسئلة وكنت جبت 3 صح و3 غلط قالى اللى جاية هيا اللى هتحدد يا ناجح يا لأ المهم جابلى إشارة عمرى ما شوفتها فى مصر وطبعا سقط فى الاشارات عشان الكوسة وقالى أنا مش هخليك تيجى كمان 3 شهور لأ تعالى كمان شهر بس أوكى رحت رادد عليه قلت له أوكى ومستنى لغاية يوم 19/12 الامتحان اللى جاى وربنا يستر