[borio1704]

المشاركة الأصلية كتبت بواسطة jojo0a اولا شكرا على الموضوع فوق الرائع انا عاوزه اشترى عربيه وموضوعك فادنى جدا وبعد اذنك انا محتاجه مساعدتك لانى مش بفهم فى العربيات او حاجه العربيه تكفى اسره وتكون صالونها واسع ومرتاحين فى القعده العربيه مشاوير جوه القاهرة وممكن مره فى الشهر نروح بيها اسكندري موفره للبنزين تستحمل شقى الشوارع هنا وكمان برستيج جدا لانى شغاله فى الجامعه وجوزى مدير انا اول مره اسوق انا وجوزى فمش عارفه جديد ولا مستعمل (احنا قولنا مستعمل لان الجديد خربشته صعبه جدا واحنا لسه فى الاول) اعتقد سيدان ولو ممكن حضرتك الهاتشباك الى يناسب ايه حجمها متوسط مش ضخم علشان الركنه ما تكونش صعبه وكمان نكون مرتاحين فيها الحاجات الاساسيه تكيف - باور - اتوماتك - شبابيك كهربا - abs - ايرباج - جنوط سبور - gps - ويفضل كراسى جلد لو ممكن علشان الولاد السعر لحد 150 الف لا اكثر ممكن اقل طبعا الصيانه لا اعلم شى عن اى نوع المصنع : احنا ما يلين للالمانى بس انت لو شايف حاجه تانيه ياريت تفيدنى مع العلم ان جوزى شغله بره القاهره يعنى لو حصل حاجه فى العربيه عطل او خلافه محدش حيكون معايا وانا معايا ولادى صغيرين معلش حتعبك معايا بس انا مش لاقيه حد يفيدنا وشكرا جدا

أولا.. شكرا على ثقتك... وأكيد مفيش تعب ولا حاجة... يا رب تلاقو حاجة مناسبة وتنفعكو إن شاء الله


بالنسبة للمتطلبات اللي حضرتك قلتي عليها.. فقدامك مجال واسع نسبيا للاختيار.. وهنحاول نقلله مع بعض:

أول ملحوظة ... ما دام أول مرة حضراتكم تسوقوا يبقى توجهنا على طول للمستعمل... لإنه ببساطة المتوقع إن غلطات السواقة هتكون كتيرة نسبيا في أول سنة أو سنتين بالكتير.

ميزة السيارة المستعملة حاجتين:

1- الفرق بين سعر الشرا وسعر البيع قليل.. وده هيقلل الخسارة لما تيجو تبيعوا العربية وتجيبو الجديد إن شاء الله... خصوصا إن سعر العربية ما بيختلفش كتير ما بين العربية اللي حالتها كويسة واللي حالتها تعبانة.
2- الأعطال في السيارة المستعملة أكيد أكتر من الجديدة... وده هيدينا شوية خبرة في التعامل مع العربية الجديدة ويخلينا نحافظ عليها أكتر

عشان كده أفضل إننا نشوف حاجة متوسطة موديل ما يبقاش أقدم من 2008.. كده حالتها تبقى معقولة وسعرها كويس كمان.


من ناحية المصنع... أنا شخصيا أفضل الياباني والكوري... لكذا سبب:

1- أعطالها أقل من الأوروبي (حتى الألماني) بشكل عام
2- قطع غيارها أرخص من الأوروبي .. وبالذات الكوري، ومتوفرة في معظم محلات قطع الغيار.
3- صيانتها أسهل ومعروفة لمعظم الميكانيكية
4- سمعتها كويسة في السوق وسوقها ماشي... يعني يمكن إعادة بيعها بسهولة

بالنسبة للحجم... كلمة متوسط دي في مصر ممكن يكون مقصود بيها فئة غير المتعارف عليه في بقية العالم لإن سوقنا الفئات فيه محدودة شوية... فمحتاج من حضرتك مثال لعربية من الحجم المتوسط في رأيك.

بالنسبة للتجهيزات الأساسية: كل التجهيزات اللي حضرتك قلتيها موجودة في معظم العربيات... يمكن الـGPS فقط هو اللي صعب شوية... وده ممكن نستعيض عنه إما عن طريق موبايل سمارت فيه GPS... أو نشتري شاشة مع GPS من محل أكسسوار عربيات محترم.. بس ده تكلفته ممكن تدخل في حوالي 2000-3000 جنيه.


أتوقع بالكلام اللي فوق ده ممكن نلاقي حاجة ممتازة بسعر حوالي 60-80 ألف


ومستني الرد بالنسبة لحجم السيارة


...