الاخوة الكرام السلام عليكم . النهارده هحكى تجربتى فى تغيير اولسيل كوبلن البيكانتو بس الاول عاوز اقول حاجة .
لاحظت فى الفترة الاخيرة تذمر بعض الاعضاء من عدم الرد على تسأولاتهم وعدم وجود تفاعل مع الاسئلة وكتير بيدخل يقرا وياخد الفائدة ويبخل بانه يحكى تجربته وده طبعا لايصح انا شخصيا باستفيد كتير من مشاركات الاعضاء فى المنتدى
المهم انا لسه شارى البيكانتو 2011 العربية ماشاء الله ممتازة وعجبتنى جدا لكن امبارح لقيت نقطة زيت على ارضية الجراج والزيت زيت باكم وكنت عارف وانا بشتريها انها عاوزة اولسيل كوبلن
المهم قلت مبدهاش رحت لمركز خدمة بتاع عفشة بس عندنا بس ماشا الله ممتاز وعنده عمال شاطرين قوى وفيه حوالى 4 كوريك كهربا زى اللى فى التوكيل بالضبط بس عيبه زحمة المهم رفعنا العربية نتاكد قالى اولسيل كوبلن يمين روح هات واحد وتعالى . خدت العربية وكنت فاكر الموضوع سهل لكن للاسف محدش عنده . طلعت على المنصورة فى الحسينية قالو عند الخضرى رحت له برضه مفيش والعراقى والزعيرى مفيش ومركز خدمة العدوى مفيش بقيت مستغرب ان عربية منتشرة كده ومش لاقى امال لو بونتو ولا ماركة مش منتشرة كنت عملت ايه وبعد ما يأست لقيت محل اسمه كوريا قالى موجود ب 65 ج مبقتش مصدق نفسى الصراحة وقلت اكيد مش هو رجعت تانى للورشة وحلينا القديم طبعا القديم لازم بيبوظ وهو بيفكه ودى المشكلة انك لو فكيت متعرفش تمشى بالعربية لكن الحمد لله طلع هو نفس المقاس ركبناه ورحت بسرعة على اقرب بنزينة كملت زيت الفتيس وبقت تمام والحمد لله