ازيكم جميعا انا طبعا كنت حاجز لوجان مانيوال 2013 من التوكيل بتاريخ 1-11-2012 وبلغوني بزياده الاسعار ابتداء من يوم 1-11-2012
وقالولي اااااه هتدفع الفرق عشان ال24 ساعه دول وانا عامل موضوع فيه القصه بالتفصيل انا طبعا قلتلهم طيب شكرا قوي و رحت لغيت الحجز وقالي المندوب خلال 48 ساعه عمل هتكون الفلوس موجوده ده فرع المهندسين علي فكره واداني رقم المعرض قالي تكلمنا بس قبل ما تيجي تأكد علي وجود المبلغ بتاع حضرتك قلتله ماااشي يا سيدي وكان يوم الثلاثاء الي فات 29-1-2013 قالي يعني علي يوم الخميس كده واكلم المعرض يوم الخميس وجرس محدش يرد عليه من الصبح لحد الساعه 6 المغرب رحت مكلم المندوب علي الموبيل بتاعه دورت علي الكارت بتاعه كان ادهوني ساعه ما حجزت ولقيته وكلمته قالي معلش يا فندم المحاسب النهارده مشي بدري واحنا الجمعه والسبت مش شغالين يوم الاحد بقي ان شاء الله طبعا مكنش عندي اي رد اقوله يعني
وجه يوم الاحد وبرضه الفرع من الصبح تليفونه مبيردش والمندوب كمان قفل موبيله وانا مكنتش عايز اضرب المشوار علي الفاضي وملاقيش الفلوس مكنتش هسيبهم ساعتها
المهم رحت يوم الاتنين الفرع وبرضه مكنش حد بيرد عليه لما اتصلت بيهم بس الصراحه رحت الفرع قالي الفلوس موجوده يا فندم وخدت فلوس الحجز تاني الحمد لله
المهم بقي وبعيدا عن ده كله انا كنت بدور علي عربيه مستعمله بقي تكون في رينج السبعينات قلبت في كونتاكت كار وشويه معارض اعرفهم في الهرم وفيصل واخيراااااااااااااا
جبت نيو أكسنت موديل 2011 اوتوماتيك من واحد في كونتاكت كار عامله 55000 كيلو الصراحه العربيه جميله جدا وفابريكه بره وجوه وشكلها أحلي من اللوجان 100 مره وخلصت فيها ب77000 بعد طلوع الروح مع الراجل وفيها رخصه سنه
بس بجد بقول الحمد لله اني مجبتش لوجان المانيوال لاني كنت خايف من المانيوال خصوصا ان دي اول عربيه ليه وانا جديد في السواقه والاوتو اسهل بكتير طبعا والنيو أكسنت جميله جدا وكله بيشكر فيها والتابلوه بتاعها شيك ومنظم مش زي اللوجان خالص الصراحه وخلصت من مشكله قطع الغيار الي كانت مقلقاني والخوف من سعر اعاده البيع ودي كانت النهااااااااااااااااااايه مع مشوار البحث عن عربية
انا اسف صدعتكوا بس حيبت اوصلكم رساله وهي (وعسي ان تكرهوا شيئاً وهو خيراً لكم )