[خالدخليفة]

المشاركة الأصلية كتبت بواسطة salmonkalou يعني قول 400 ج طيب فترة اسبوع فترة ممكن ابقي فيه مية المية لو حسبت الساعات 14 ساعة

شوف
السواقة دى مش كيميا وانا شخصيا اتعلمت السواقة فى اقل من نص ساعة وكانت عربية شاهين تيل فراملها متاكل وحالتها حالة
بعد كده روحت مكتب تعليم لقيته جابلى عربية128 لافيها مارشدير ولاكلاكس ولا فرامل انما فرامل اليد بس شغالة ومع ذلك كنت بتعامل مع الطريق عادى
لكن
السواقة زيها زى اى حاجة فى الدنيا محتاجة ممارسة وكتر الممارسة هيعودك على
1 - سرعة رد الفعل مع مشاكل الطريق
2 _ هتحفظ جميع مقاسات العربية وبالتالى تقدر نظريا تحسبها اذا كان المكان يكفيك او يسمحلك بالمرور او تقدر تركن او تحسب المسافة بينك وبين اللى حواليك
3_ و دى مهمة جدااااااااااااا اهم مافى السواقة مش الفرامل والبنزين واطلع وتعال واركن وهات ورا والكلام ده لكن
اهم مفيها رؤيتك ونظرتك للطريق وحساب المسافات بينك وبين اللى حواليك والكلام اللى بقوله ده هتقراه فى 20 ثانيه وانا كتبته فى 50 ثانية لكن وانت بتسوق لازم تعمله فى جزء من الثانية
4 --- فى مجموعة من الحركات والتصرفات انت بتعملها وانت سايق فى الاول ممكن تبقى كتيرة وتحس انك فى معركة لكن كتر الممارسة هيخليك تعملها بدون م تاخد بالك بعد كده
زى النظر فى المرأة الداخلية والمرايات الجانبية وتقدير المسافات والغيارات
والغيارات دى بالذات نكتة لانك كل م هتنقل السرعة للسرعة الأعلى او الأقل هتلاقى نفسك هتسيب الطريق وتبص على الفتيس (دراع نقل السرعات )
فى الاول هتحس ان دول مجموعة عمليات محتاجة 3 يعملوها والناس دى بتسوق ازاى (اوعى الأحساس ده يجيلك لانه ممكن يخليك نصف متعلم او متتعلمش وتحس ان السواقة دى حاجة صعبة)
وتذكر انى قلتلك انى اتعلمتها فى اقل من نص ساعة والباقى كان ازاى اقدر المسافات والرؤيه للطريق والتصرف فى المواقف و رد الفعل المناسب
تذكر دااااااااااااائما
هدووووووووووووووووووء الاعصاب ومقابلة السيئة بالحسنة
اوعى و على الله واياك حد يشتمك و ترد عليه
العربية اما منجم حسنات او حفرة سيئات وانا شخصيا اول يوم ركبت عربيتى الجديدة (أيامها) وانا ماشى طول الوقت ده يشتمنى وارد عليه وده اشتمه وده مش عارف ايه روحت البيت وحسبتها لقيت العملية مخسرة مروح وعلى دماغى جبل سيئات وعودت نفسى على كلمة متشكر ولقيتها بتحل 99% من مشاكل الطريق وحتى اللى شتمنى 99% منهم بينكسف من نفسه ولو غلطت مش عيب انى اقول آسف واعتذر
اخيرا
(معلش طولت عليك لانى انا نفسى مكنتش لاقى اللى يقول لى الكلام ده)
انت اتعلمت على عربية لانوس طيب نفترض اشتريت عربية ماركة تانية يبقى لازم حد يركب معاك فى الاول لحد متحفظ مقاسات وتصرفات العربية الجديدة لكن لو اشتريت لانوس مفيش مشكلة وانا شخصيا عملت كده لانى كنت بتعلم على 128
ولما اشتريت نيسان صنى طبعا العربية مختلفة فى كل حاجة وطبعا الحكاية مش سواقة وخلاص ولكن جبت واحد معايا مدة اسبوع من الصبح لبليل راكب جنبى لدرجة انه كان زعلان من الفلوس اللى بياخدها وراح لللى جابه ليا وقال الراجل ده صعبان عليا لانه بيدفع فلوس وهو بيعرف يسوق ولما جالى صديقى قلتله انا عارف لكن النيسان مختلفة عن ال128 وانا عايز احفظها
انا مش بطلب منك كده لكن على الاقل ساعتين يوميا لمدة اسبوع لاستيعاب والتعود على العربية الجديدة
وربنا يكرمك والف مليار مبروك مقدما