|
تعالوا نحسبها مع بعض التوكيلات بتكسب اد ايه فى مقابل ايه
تعالوا نحسبها مع بعض التوكيلات بتكسب اد ايه فى مقابل ايه ؟
عنوان طويل معلش بس مجرد فضول بينتابنى دائما كل ما اشوف الاسعار عمالة تنط بدون اى داعى فى كل حاجة حتى العربيات بس انا هتكلم عن العربيات بس علشان ده تخصصنا
هخش فى الموضوع وتعالو نحسب اسعار العربيات المتوسطة اللى بيشتريها اغلب الناس اللى هيا فئة 1600CC مثلا
هوندا سيفيك سعرها فى السعودية 45000 ريال بالمصرى 65000 جنية
قيمة الجمارك المستحقة عليها قد تمنها تقريبا يعنى المفروض توصل هنا ب 130 الف باكتييييير اوى
لما التوكيل يبعها ب 140 واكتر ده يبقى كتير
لان مينفعش نقول ال10000 الزيادة دول تمن الصيانة والضمان لان الوكيل برده واخد تمنهم فى السعر الاصلى ده فعلا
ومينفعش نقول دول مكسبة لان التوكيل بره بيكسب برضو
حسبة السفيك ديه اقل حسبة فى الهيونداى مثلا الحسبة اكبر من 10 الاف فى الموديلات الكبيرة الحسبة اكبر بكتير الكامرى 2008 مثلا المفروض ان جماركها 360 الف جنية وسعرها برة فى حدود 110 الف جنية ازاى تتباع هنا ب 560 الف جنية مش عارف
من الاعاجيب الاقتصادية والله اللى بيحصل فى مصر ده
ولو اتكلمنا عن نسبة الفائدة بالنسبة للى بيشترى بالقسط حتلاقى نفسك مدبوح ومغتصب مليون مرة تانى وكل ده ليه برضو مش عارف
هيا الحكومة مش لاقية غير اللى عندهم عربيات علشان تاخد منهم جمارك بالضعف ما فيه مليون حاجة هابلة بنستوردها ملهاش اي لازمة وبتضر الاقتصاد والجمارك عليها مش اضعاف مضاعفة كده
طيب ياخدو اللى ياخدوه ماشى بس نلاقى مقابل فى الطرق او الخدمات او اى حاجة ميغلوش البنزين حتى ...... اى حاجة طيب ابدا هو كده اذا كنت عايز تركب عربية اساسا
وزى ما انتو عارفين احنا دولة طالعين من مشاكل اقتصادية وعنق زجاجة واحنا احسن من اهالينا اللى كانوا بحجزوا ال 128 من شركة النصر ويستلموها بعد سنة واكتر
ماعلينا طيب ديه الحكومة وامرنا لله التوكيلات المفروض تلمها شوية متبقاش مبهوقة من كل ناحية
واللى يفرس اكتر ان العربية من دول تيجى من برة بسعر ولما تتجمع فى مصر تتباع برده بنفس السعر وساعات اغلى كمان يعنى التوكيل مكسبة بيزيد لان الجمارك بتقل طبعا والسعر الاجمالى بيقل كمان لان سعر القطع المحلية ارخص وبرده نفس السعر
طيب ديه التوكيلات الحكومة شايفانا بيحصل فينا كده من التوكيلات ما تتحكمش فى السوق ليه باى شكل من الاشكال ولا هو خلاص بقى متاح لاى حد عايز يسرق يسرق بدام بقت كلها رجال اعمال ومستثمرين
انا عارف انى طولت عليكم بس حبيت افضفض وافكر معاكوا بصوت عالى فى اللى بيحصل ده والاهم من ده اننا نجتهد فى التفكير فى حلول او طرق للتعبير عن رفضنا للوضع ده
مثلا نقاطع التوكيلات اللى بتبالغ فى اسعار العربيات
اللى معاه فلوس كاش يفكر جديا فى انه يجيب العربية من برة استيراد مباشر
نجتهد فى تقييم تجارب المعارض اللى بتبيع عربيات خليجى بضمان برة التوكيل او بدون ضمان
وخاصة ان التوكيلات لا منها ولا كفاية شرها (الا من رحم ربى ) اسعار صيانة مبالغ فيها وقطع غيار مش موجوده ومواصفات اقل ومعاملة وفكر زبالة للاسف فكلها محصلة بعضها يبقى السعر والمواصفات اهم مليون مرة من انى اشترى العربية من الوكيل
من ايام شوفت فى نايل موتورز مجموعة من الناس بتفكر تشترك وتجيب عربيات خليجى استيراد مباشر لحسابها ووصلوا فعلا لحد (معرض تقريبا) يساعدهم فى كده ووصلوا فعلا لسعر كويس جدا لبعض الموديلات انا شخصيا اعجبت جدا بالفكره ديه واتمنى ليها النجاح لان لو ده حصل فعلا اكيد ناس كتير هتعمل كده وهيبقى ده ابلغ رد من الناس للتوكيلات علما بان مجرد السعى للفكره شهادة واقعية لايمكن انكارها على فشل الكثير من التوكيلات فى اداء دورها فى السوق فضلا عن كسب ثقة العميل
يارب مكونش طولت عليكم اوى اوى يعنى وياريت اللى عنده فكره او وجه نظر يقولها وناقشها مع بعض
__________________
اخر موضوعاتى
قريباً تقرير وتجربة اداء دايهاتسو تريوس * تويوتا راش
|