[m.genedy]

طبعا انا اتسمرت مكانى لا قادر اتحرك ولا قادر ابص يمين او شمال
وكل اللى معايا فى السيارة سمع هس ولا كلمة بعد ماكنا بنضحك ونهزر ...
ابو العريف اللى كان معانا قاللى خلليك قاعد مكانك اوعى تنزل -همه ح ييجوا لغاية عندك !!
سألتة - انت متأكد ولا اية بالظبط قاللى -طبعا هو احنا فى مصر ح تنزل تتحايل على الظابط هنا فى نظام. وبالفعل بعد لحظات مرت كالدهر جاء احد ظباط الشرطة وبكل ذوق وادب -كان هذا الحوار
الظابط-مساء الخير وهو مبتسما
انا -اهلا مساء الخير وحاولت ان ابتسم
الظابط- انت بوليس
انا -لا
الظابط-انت سائق ترام
انا-لا
الظابط-انت مطافى او اسعاف
انا -لا (زادت حيرتى)
الظابط- انت سائق تاكسى محترف
انا - لا اكيد لا انا معايا سيارة عادية
الظابط- طالما معاك سيارة عادية ولا هى بوليس ولا اسعاف ولا مطافى ولا تاكسى ولا انت سائق ترام لية ماشى على طريق الترام-هذا الطريق مخصص فقط لمن ذكرتهم لك
انا- وشى جاب 100 لون ونفسى انظر للخلف وعينى تيجى فى عين ابو العريف اللى حطنى فى الموقف دة
وعاجلنى الظابط مطالبا بالرخصة وجميع اوراق السيارة-بالفعل اعطيت لة كل ما املك من اوراق وطلب منى ان اقف فى جانب الطريق-وقد حدث واخد هو يتصفح الورق ويكشف علية وانا ابحث عن صديقى ابو العريف ولم اجدة اختفى اختفاء تام-سألت علية بقية الاصدقاء وكان جوابهم انه فتح الباب وفلسع لانة خايف من عباس!!
عباس مين ياجدعان؟ عباس دة الاسم الحركى للبوليس هنا وصاحبنا دة هرب لانة خايف يسألوة عن الاقامة وهو وجودة غير شرعى
وبالتالى لو مسكوة ح يرحلوة على مصر... الله الله -الموضوع كبر
طيب وانتم ظروفكم اية كان جوابهم انهم تمام ومش ح يسيبونى الا لما يشوفوا البوليس ح يعمل اية. رجالة بصراحة... لكن كان نفسى اشوف ابن الأرندلى اللى دبسنى وخلع وهو الوحيد اللى ماعندوش اقامة ومايعرفش حاجة --
رجع ظابط الشرطة وابتسامتة تملاء وجهه-وقاللى
انت عندك مشكلة هذة الرخصة غير صالحة هنا والسبب انك تحمل اقامة ومر عليها اكثر من عام وعليه لابد من حصولك على رخصة قيادة هولندية -هذة النوعية من الرخص تصلح فقط
لمن وجودة هنا مؤقت وغير مقيم بصفة دائمة--
انا- طيب والحل اعمل اية؟
الظابط- انت تحصلنى بسيارتك على قسم البوليس!!!! وبالفعل بعد ان انصرفت جميع سيارات البوليس التى كانت تحاوطنى ولم يتبقى الى السيارة التى
سوف اتبعها---
وفضلت ماشى وراها لغاية قسم البوليس ركنت ودخلت مع الظابط وتركت اصدقائى فى السيارة
وكانت مفاجأة ان يقوم الظابط بسؤالى -تحب تشرب اية؟
المفاجأة لجمتنى وشكرتة وقلت لة انى مستعجل وعندى شغل . قاللى انت لازم تدفع مخالفة قيمتها 400 جيلدر (( يالهوى يامة )
400 جيلدر لية دية السيارة كلها ب 300 جيلدر وبالتقسيط-قاللى
الغرامة لانك لا تملك رخصة غير صالحة وقد تغاضينا عن غرامة السير فى طريق مخالف
لاننا تأكدنا انك لا تعرف
تمام هى خربت كدة يعنى مافيش مجال للمقاوحة الناس عملت واجب من عندها وانا طبعا باللغة اللى بتكلمها الضعيفة جدا مش حمل حوارات لكنى سألت الظابط - يعنى مافيش حل اخر لانى ماقدرش ادفع المبلغ دة كتير جدا!!
قاللى بالظبط فى حل تانى....هيييييييييييييية فرحت .. اللحقنى بية ربنا يسترك
مسك الرخصة الدولية وكان مايزال محتفظ بها ومعها وصل الغرامة وقاللى
شوف ممكن نقطع الاتنين مع بعض مقابل ان لا تقود هذة السيارة مرة اخرى ولابد ان تحصل على رخصة هولندية-والان تأخذ هذة السيارة وتذهب الى بيتك وممنوع منعا باتا ان تقودها مرة اخرى بدون رخصة-
قلت لة انا موافق-يعنى امشى؟ قاللى ح تمشى لكن فى زميل لية بموتوسيكل ح يروح معاك ويطمن انك وصلت
الى بيتك بدون مشاكل--زادت فرحتى ح امشى فى موكب ولو بموتوسيكل واحد والمشكلة اتحلت ومافيش داعى اعمل مصيبة جديدة واخويا يعرف ويعيش دور عم الواصي خرجت فرحا ومشتاق اشوف اصحابى علشان احكي لهم ازاى توصلت لحل مع ظابط الشرطة وازاى ان لغتى ساعدتنىوعرفت اقنعهم بوجهه نظر
والمفاجأة انى خرجت مالقتش ولا واحد من اصحابى--كلهم باعونى وطاروا-وتحية لقلة الاصل -ركبت سيارتى والموتوسيكل امامى لغاية ماوصلت الشارع اللى ساكن فية وبتمنى ان مافيش حد يشوفنى من الجيران- اصلا السيارة كانت ملفتة للانتباة لانها احقر سيارة راكنة ف الشارع-وصلنا وركنت - وكلمنى الظابط المساعد وقاللى -احذر من القيادة بدون رخصة -لكنة قاللى شىء اخر اعجبنى فعلا
قال لي -انة امر ليس من الصعب ان تحصل على رخصة هولندية وانا ارى انك تقود السيارة بطريقة جيدة-بصراحة كلمتين حلويين نسونى قلة اصل اصحابى ونستنى ابو العريف-وقدر الله وماشاء فعل-
صعدت لمنزلى وسبحان الله اول سؤال اتواجهت بية هو البوليس كان معاك لية -انت عملت حاجة بالسيارة؟ انا مش قلت لك السيارة دية ح تسبب لنا مشاكل !!
هسسسسسسسسسسسس هسسسسسسسسسسسسسس
مش عاوز كلام كتير خلاص انا قررت ابيعها لغاية ما يبقى عندى رخصة هولندية ((قال يعنى قرار خدتة بمزاجى))
اتصلت بالمانى صاحبى الاسكندرانى وحكيت لة اللى حصل وعرضت علية ارجع له السيارة ولكن كان هذا مستحيل لانة يملك سيارة اخرى ومن الصعب ان يكون هناك سيارتان بأسمة لان هذا يعمل لة مشاكل مع الضرائب-طيب والحل نكتب ورقة ونعلقها على السيارة ونسأل كل الاصدقاء اللى نعرفهم واللى بنقابلهم فى صلاة الجمعة-- مر 4 ايام وانا مللتزم والسيارة مركونة تحت البيت منتظرة عدلها....

وانا غير مهتم وكنت اذهب لعملى سيرا على الاقدام وفى اليوم الخامس لعب الشيطان لعبتة وقلت ادور السيارة علشان البطارية ماتنمش( اهى حجة والسلام)
وبالفعل دورت السيارة وفجأة لقيت دخان كثيف منبعث من الموتور واصوات غريبة وشرارات
لقيت نفسى طلعت اجرى بعيد عن السيارة قلت دية ح تنفجر فى اى لحظة واستمر هذا الوضع طيلة 10 دقائق كانت كفيلة ان تعبىء الشارع بل والمنطقة بدخان اسود وكثيف-ولم يوقظنى من حالة الذهول التى اصابتنى الا صوت سيارات الاسعاف والمطافى والتى بدت لي انها بعيدة ولكن واثق ان الصوت يقترب اكثر فاكثر وبينى وبين نفسى اتمنى بل وادعوا انهم يكونوا رايحين لحد تانى
مش علشانى انا--طبعا ناس كتير اتلمت لكن عن بعد وانا كنت اقرب واحد للسيارة وبصراحة نظراتهم لي كانت تحمل الكثير من الغيظ على الشماتة كل هذا وصوت سرينة الاسعاف يقترب
حتى فوجئت بسيارة اسعاف وسيارة بوليس وسيارة مطافى تقف امام السيارة
وانا لا حول لي ولا قوة.......
يتبع

<!-- / message --><!-- sig -->