[sayed2077]

السلام عليكم ورحمة الله وبركاته

طبعا الكل عارف ان كان معايا ال 128 وقضيت معاها ايام حلوه وايام مره وزى ما كان للواحد معاها ذكريات حلوه زى ما كان ليه معاها ذكريات مهببه ههههههههههههه

المهم انا هنا هقولكم على بعض النصايح اللى تعملوها علشان تقعدوا مع العربيه بدون اى اعطال مفاجئة وحتى لو قبلتكم اعطال تبقوا جاهزين لها مسبقا وتحلوا العطل فى اسرع وقت

نصائح للميكانيكا
النصيحة الاولى
خلى معاك سلك دبرياج بالصواميل بتاعته (لانه هيتقطع منك فى اى وقت وفى اى مكان وفى اى موقف تتخيله ) فلازم يكون معاك سلك دبرياج علشان لو اتقطع منك تقدر تغيرة ولو مش بتعرف تغيرة لو سواق تاكس معدى جنبك يغيرهولك على طول لانك متضمنش هيقطع منك فين وطبعا تشترى صواميله علشان لما بيتقطع الصواميل بتاعته كلها بتقع على الارض وابقى دور بقى على الصواميل ديه وقعت منك فين

النصيحة الثانية

خلى معاك طقم بوجيهات و مفتاح بوجيهات احتياطى
لان برضوا ممكن فى اى وقت بوجيه يقطع منك ولا حاجه تضيع انت فخلى معاك طقم بوجيهات احتياطى ومفتاح علشان حتى اى ظروف طارئة تغيره انت بالمفتاح اللى معاك

النصيحة الثالثه

لازم قبل ما تمشى من بيتك تفحص الماية والزيت كل يوم ده اساسى لان ال 128 معروف انها بتاكل ماية على طول ومش بتحافظ على نفس مستوى الماية اللى فيها فخلى بالك ولازم تفحص الماية والزيت كل يوم

النصيحه الرابعه

خلى معاك نمرة الميكانيكى بتاعك والكهربائى علشان لو حاجه حصلت تقدر تتصل بيهم فى اى وقت يجو لك او على الاقل يقولولك تعمل ايه (حصلت معايا انها كانت بتعطل وبتصل بيهم يقولى اعمل ايه او يجى يصلحها فى المكان اللى انا فيه)

النصيحه الخامسه

يفضل انك تخلى معاك ابلاتين وكوندنسر احتياطى لان الابلاتين والكوندنسر ممكن يتحرقوا فى اى وقت وخصوصا فى الزحمه فلو كنت ماشى جنب ميكانيكى يركبهوملك علشان ساعات كتيير ممكن يتحرقوا منك ويبقى فيه ميكانيكى بس ميبقاش فيه محل قطع غيار


وديه يعتبر اغلب النصايح اللى اقدر اقولها فى الميكانيكا وبكده تقدر تتحاشى اعطال الميكانيكا

نصائح للكهربا

النصيحة الاولى

لازم تخلى معاك بتاع 10 فيوزات علشان ممكن فى اى لحظه فيوز يضرب فلو كان مثالا فيوز بتاع المروحه او كدا العربيه هتسخن منك لان المروحه مش شغالة وكل الحكاية على فيوز ب 20 قرش فلازم يبقى معاك 10 فيوزات احتياطى للظروف الطارئة ديه

النصيحه التانية

خلى معاك شريط لحام دايما لان ممكن سلك يعمل ماس معاك وانت تبقى شايفه ومش عارف تعزله او اى ظروف طارئة اخرى

النصيحه الثالثه

كل اسبوع فى الليل خلى صديق ليك معاك واعمل فحص على كل الانوار بتاعت العربيه
انوار امامية عالى وواطى و الاشارات فى كامل جسم السيارة وجرب لمبة الفرامل الاتنين يعملوا ام لا وجرب لمبة المارشدير تعمل ولا لا لما تجيب مرشدير

النصيحة الرابعه

البطارية لازم كل اول شهر تروح عند الكهربائى يعملك صيانة البطارية تذويد مياه وكدا ويكشفلك على شحن الدينموا حتى تتجنب الاعطال المفاجئة

وبكدا نقدر نقول اننا قولنا على اغلب النصائح التى تؤدى الى قلة ظهور الاعطال فى الكهرباء

نصائح للعفشة والات الجر

النصيحه الاولى

المساعدين ثم المساعدين ثم المساعدين بمعنى اخر المساعدين فى ال 128 هى روحها بمعنى الكلمه وان المساعد لو بداء يبوظ بس بيشرخ كل جسم العربيه وبيجيب العربيه الارض بمعنى الكلمه
فلازم بايدك تضغط على كل مساعد بقوة متوسطه ولازم تلاقى استجابه من المساعد(تلاقى المساعد بياخد ويدى معاك)مش تلاقية محجر جامد وناشف ومش راضى يتجاوب معاك ولازم تغيرة فى اسرع وقت ممكن

النصيحه الثانية

تروح كل اول شهر تظبط زويا وتربط عفشه وتخلى الراجل وهو بيظبط الزوايا ويربط العفشه يبص ك على القنطرة الخلفية اللى ماسكة العجلتين اللى ورا لان اى شرخ فيها بتلاقى ان العجل اللى ورا بقى واقف مش سليم بتحس انه مايل للداخل او الخرج وطبعا لو القنطرة اتكسرت مش هتعرف تتحرك بالعربيه فلازم كل اول شهر وانت بتربط عفشه وبتزبط زوايا تخلى الراجل يكشفلك على القنطرة زى ما قولنا وعموما اللى بيشرخ القنطرة انك تحمل الجزء الخلفى فى السيارة بحمل كبير وتمشى بيه مدة طويله لانك اول ما تخلص المشوار مش هتلاقى العجل الى ورا بقى سليم ابدا وهتلاقى العربيه ان النص الامامى ماشى فى حته والنص الخلفى ماشى فى حته تانية خالص هههههههههههه


نصائح السمكرة

النصيحة الاولى

هتدخل على الموضوع ده
http://www.masrmotors.com/vb/showthread.php?t=91405
وتشوف هل فيه اى اماكن من المشار لها فى الموضوع فيها شروخ ولو بسيطه ولا لو مفيهاش طبعا خير وبركه ولو فيها يبقى لازم تذهب لاقرب سمكرى يلحملك كل الشروخ ديه ويلمهالك قبل ما تلاقى العربيه عبارة عن شرخ كبير هههههههه
فلازم تدخل على اللينك اللى انا حاطه ده وهتلاقى فيه اغلب ما يخص السمكرة اللى هى طبعا تخص الشروخ اللى بتظهر.

وفى نهاية الموضوع اتمنى انى اكون وفقت فى اعطاء بعض النصائح التى لو اتبعتها مع ال 128 فسوف تجدها قليلة الاعطال الى ابعد حد حتى لو تعطلت بك فسوف تكون جاهز للعطل مسبقا فلن تضيع وقت فى البحث عن قطعة الغيار و هكذا

اللهم اغفر للمسلمين والمسلمات والمؤمنين والمؤمنات الاحياء منهم والاموات
و
كل عام وانتم بخير بمناسبه قرب شهر رمضان
و

السلام عليكم ورحمة الله وبركاته

ملحوظه

هذا الموضوع حصرى لمصر موتورز ويجوز نقله بشرط ذكر مكان الموضوع الاصلى والدعاء لى ولوالداى وللمسلمين اجمعين