[sam ram]

تقرير ممتاز ...
تسلم ايديك و شكرا على مصداقيتك لما كتبت انه منقول ..
لكن ده ميمنعش اننا نشكرك على مشاركاتنا ليك في التقرير الرائع ده ...
انا شفت السيراتو على الطبيعه (مجربتهاش للأسف ) لكن العربيه فعلا من حيث الوصف زي ما صاحبها وصفها ...
اما من ناحيه الاداء مقدرش اتكلم .. لكن في نقطه واحده بس عايز اعلق عليها

المشاركة الأصلية كتبت بواسطة hamdymsr خامسا: عوامل الأمان... الABS فعاااال بشكل ممتاز, ربنا ستر و كنت هعمل حادث و انا نازل من على الدائري بتاع 6أكتوبر, و مهدي في منطقة مطبات و طلعت و واخد الحارة بتاعتي و واحد بربع نقل راح داخل قدامي فجأه فرحت واخد شمالي و فاديته و ملقتش الا الرصيف بتاع اليو ترن قدامي, و الأرض كان فيها رمل كتير و كثيف والله, المسافة بيني و بين الرصيف كانت حوالي 5 متر او أقل, ضربت فرامل جامد و حسيت بالفرامل بتزق رجلي و بتكتك و حودت الدركسيون يمين و العربية وقفت قبل الرصيف بالظبط الحمد لله بالعرض شوية, كنت وصلت سرعة 80 تقريبا ساعتها, يعني من 80كم لـ 0كم و في مسافة 4-5 متر (أرض فيها رمل كثيف) في زمن 3 ثواني تقريبا و ربنا ستر الحمد لله... الاير باجز (ربنا ما يحوجنا ليها والله) مش عايزة كلام و اكيد كلكو عرفتو الحادث الفظيع بتاع الدائري, الاير باجز انقذت ناس من الموت و والدي كان ساعتها على الدائري و شاف الحادث من اوله قدام عنيه و لقيته بيكلمني بيسألني, هي عربيتك يابني فيها اير باجز؟؟؟ قولتلة 2 , قاللي الحمد لله, العربية منغير اير باج مش عربية والله, و حكالي الحادث... ربنا يبعد عنا كلنا شر الحوادث يا رب....

مفيش عربيه في الدنيا تقدر تقف في مسافه 4 - 5 متر من سرعه 80 كم/ساعه ... و لا حتى بورش او لامبروجيني !!
الا اذا كان راكب عربيه فورميلا وان ...
اي عربيه طبيعيه ( بما فيهم الكيا و المرسيدس والبي ام ... واي عربيه فيها احدث انظمه الامان ) بتحتاج من 10 ل 12 متر (في افضل الظروف الطبيعيه برضو ) علشان تقف من سرعه 50 كم /ساعه ... و المسافه دي بتزيد اربع مرات مع زياده السرعه الضعف...
يعني لو محتاجه 8 متر علشان تقف من سرعه 40 كم/ساعه
تحتاج 32 متر علشان تقف من سرعه 80 كم/ساعه ....

للأسف مش عارف احنا ليه دايما احساسنا بالفرامل و مسافه التوقف بيبقى عجيب و غريب ...
وبنتصور في لحظات الخطر ان المسافه دي و لا حاجه ...
صاحب العربيه بيقول انها وقفت في 3 ثواني ...
العربيه اللي سرعتها 80 كم/ساعه يعني بتقطع 22 متر في الثانيه الواحده ..
يبقى ازاي اخدت 3 ثواني علشان تقف في 5 متر !!!
العربيه نفسها طولها 4.5 متر .. يعني احتاجت مسافه ادها علشان توقف ..
يعني الاكصدام الوراني وصل مكان الاكصدام الامامي من سرعه 80 كم/س للسكون في 3 ثواني !!!!

ABS - ESP - SRS - Air BAgs - traction control - Whatever
الكلام ده كله عمره ما حيغير قوانين الطبيعه اللي خلقها ربنا ...
والفيزيا مش حتتغير علشان خاطر عيون تكتكه ال ABS
ده موضوع عن مسافه التوقف ...
http://www.masrmotors.com/vb/showthread.php?t=3577

انا اسف للأطاله ... لكن فعلا النقطه دي دايما بتستفزني و بحس انها بتشجع الناس على التهور و الامبالاه ..
واسف مره كمان على المداخله ... ومقصدش اشكك خالص في كلام صاحب الموضوع ...

لكن للأسف ...
واضح ان كتير مننا ساعه الخطر مبيعرفش يقدر المسافه او السرعه صح .... او حتى بالتقريب ...

فيما عدا ذلك ...
تقرير اكثر من رااائع ... والف الف شكر ptmnlo123per171