رأيي الشخصي -الميني فان هوجه لن يكتب لها النجاح
هوجة جديدة ،،
اجتاحت السوق المصري ،،
أو التوكيلات المصرية ،،
هوجه الميني فان ،،
و كل وكيل تصفح المواقع الالكترونية لشركته
يبحث عن اي سيارة يستطيع تقديمها للمستهلك المصري
المهم يبقي عنده ميني فان
طبعا السبب الرئيسي
الاعجوبة ماتريكس
سيارة احضرها الي مصر العبقري عمرو الاسكندراني
فئة جديدة لم تكن معتادة من الشعب المصري عاشق السيدان
MPV
شكل غريب غير معتاد
و لكن حدثت المعجزة بدون تفسير منطقي
و البطة القبيحة فقست و حلقت بدون وسام
انتشرت انتشار النار في الهشيم ( حلوة الحته دي )
كشكل – امكانيات – أداء ،،،،،،،،،،،،،،،،،،،،،،،، كلها جوانب سلبيه او عادية في حقها
لكن يشفع لها العملية ، مساحات التخزين المتنوعه ( حتي ترابيزة الشاي المنطبقه في الكنبة الخلفية )
علو السيارة مناسب لكبار السن و الخطوط الحادة التي توحي للمستهلك المصري بقوة الهيكل
و إمضاء المصمم الإيطالي الشهير علي جانبها
و انتبهت التوكيلات الاخري بطيئة التفكير ان المستهلك المصري اصبح اكثر قابلية لتغيير الفكر
و ظهر أقوي منافس ، من توكيل خليجي مملوء بالفلوس و محترف و لا يبخل علي دعاية و اعلان
و بعلامة تجارية يابانية ليست قوية و لكنها تنتمي للجزيرة اليابانية علي اي حال
دايهاتسو ماتيريا
كانت المنافسه حادة و علي ما أظن خفض غبور سعر الماتريكس وقتها ليتغلب علي المنافس الجديد
و لكن باءت السيارة بالفشل الذريع
لم يتقبل المستهلك المصري شكلها الحداثي
رغم انه من الصعب الإعجاب بشكل اي سيارة ميني فان
و لكن الماتيريا بالغت في القبح بشكل صندوقي مبالغ فيه جعلها اشبه سيارة تكريم الانسان
و اضاع فرصتها في النجاح بالرغم من مميزاتها العديدة من وسع و تكنولوجا يابانية و عوامل امان
و ظهر منافس اخر بعلامة اكثر بريقا علامة شركة السيارات الاولي في العالم
و بكرم حاتمي يشمل سبعة ركاب بدلا من خمسة
تويوتا أفانزا ،،
و لكن سرعان ما أدرك المستهلك المصري ان السيارة لا تحمل من تويوتا غير الشعار
و لكن السيارة اندونيسية التصميم و التصنيع
و لم تشفع لها العلامة ،،
و فشلت هيا الاخري او حققت انتشار بسيط مثل سابقاتها الاخري ماتيريا
و لكن بدون ضجة حيث ان توكيلها غير مهتم بها اساسا
بالإضافة ان شكلها ميكروباص رسمي أكثر منه سيارة ميني فان تصلح لعائلة صغيرة
و ظهر منافس اخر ،،
و لكنه كان دون المستوي ايضا
رينو لوجان ،،
و ايضا بكرم حاتمي
سبعه راكب
و بخامات تابلوه لا علاقة لها باوربا و بشكل سبعيني او بالمجاملة ثمانيني
و علامة ذات سمعة سيئة ( رينو تصنيع داتشيا ) عند المستهلك المصري
هذا غير
فولكس سوران البرازيلية ، سوزوكي اس اكس فور ، و بعض الافتكاسات الصينية
بالاضافة لبعض السيارات عالية الثمن ،،
و ظهرت سيارة اخري متميزة جدا
سكودا رومستر
سكودا كتوكيل و كعلامة تجارية سمعتها ممتازة في مصر
شكلها دي اذواق ،، بس عموما كل سيارات الفئة دي شكلها مش عاطفي
و سعرها ممتاز بالنسبة لاسعار السيارات في مصر و بالنسبة لامكانياتها
سعرها انخفض بشدة بحيث اصبحت النسخة المانيوال ارخص من الماتريكس
و الاتوماتيك سعرها 116 الف
و برده محققتشي نجاح يذكر
رغم ان بالعلامة دي و بالمواصفات دي و بالسعر ده ،، المفروض تكسر الدنيا
و بعدين توكيل كيا ،،
دور برده في اوراقه
و جاب الكيا كارينز
و لسه هانشوف هتعمل ايه هيا كمان ،،
و اللي أنا عايز اقوله ،،
ان الهوجه دي مش هتلاقي نجاح يذكر في السوق المصري
و ان تجربة الماتريكس غير قابله للتكرار
ليه ،،،،،،
أولا المستهلك المصري مش غاوي اساسا MPV
الماتريكس كانت حالة خاصة مش عشان MPV في وجهة نظري
كل الحكاية انها كانت مرحلة سعرية متوسطة ما بين الفيرنا- الاكسنت و الالنترا لهواة الهيونداي
و بعدين الخيط كر
دلوقتي سعرها قريب جدا من الالنترا
و انا شايف ان الاتجاه بقه للالنترا لحداثتها و لفرق السعر البسيط بينها و بين الماتريكس
و لو تلاحظوا الشكل الجديد للماتريكس انتشاره ضعيف جدا جدا ،،،
و عشان كده بقول ان تجربة الماتريكس حالة خاصة غير قابله للتكرار
ضربة حظ و توفيق في التسعير
لو سألت أي حد معاه ماتريكس جبتها ليها
هيقولك احسن من الفيرنا او الاكسنت و كان فرق السعر ما بينهم بسيط و ارخص من الالنترا
دلوقتي بقه فيه اختيارات سيدان ( الطلب الرئيسي للمستهلك المصري ) ممتازة و بتحوم حوالين الفئة السعرية للسيارات الميني فان
تاني حاجة تجيب ميني فان ليه ؟؟
اولا شنطتهم عادية جدا ،، معظمهم بياخد خمسة راكب عادي ،، و حتي لو سبعة راكب محدهشي بيجيب عربية يشغلها بالنفر
و كمان بتضحي بالراحة و الأداء من غير مقابل سوي علو السقف و راحة الدخول و الخروج و الاحساس الكاذب بوسع غير حقيقي ،
حتي علو القعده ده ناس كتير مبتحبهوش
ده غير الشكل العجيب ،، اللي مش برستيج زي السيدان لمعظم الناس
الماتريكس ................ كشك
الماتيريا ................... سيارة تكريم الانسان
الرومستر ................ عربية توزيع اللبن
الافانزا .................... ميكروباص و مبيتجملشي حتي
لكن عموما ،،
اي اختيارات جديدة تكون متاحة للمستهلك المصري ،، بتثري السوق ،،
بس الهوجة دي مش هتسفر عن حاجة ،،
و نجاح الماتريكس ....................... غير قابل للتكرار
التعديل الأخير تم بواسطة AbOnOrA ; 08-11-2009 الساعة 04:15 AM
سبب آخر: تم اضافتة للمجلة تحت قسم "حلقة نقاش"
|