[rockana9112007]

معلش فى تعليقى دة وارجو ان الجميع يتقبلوة بصدر رحب

هو لية دايما الانسان المصرى بيحلل الغلط لنفسة ولية دايما بيعذر نفسة لكن ابدا منعذرش غيرنا

انا هحكيلكم قصة مشابهة بس من الجانب الاخر وياريت تفهمو

اولا انا مرة من المرات كنت راجع من سفر وسايق من الساعة 7 صباحا وراجع باليل مش عارف الساعة كام بالظبط ومعايا عمتى وهيا ست كبيرة برضة ومرهقة جدااا من السفر وعاوز اروحها بيتها عشان انا كمان لسة هروح بيتى وقسما بالله كنت خلاص نايم على الدركسيون من كتر التعب

اقوم الاقى قصادى زفة برضة وقافلين الشارع وتيت تيت وماشيين ببطء شديد واحنا فى 6 اكتوبر والشارع عريض ويعدى 5 عربيات

انا متنرفزتش خالص بالعكس قعدت ازمر معاهم حوالى دقيقتين وبعدين خلاص بقى عدونى ياجماعة اشوف حالى واروح بيتى انتم ناس معلش رايقيين وفرحانين وعلى مهلكم خالص انتم لية حاجزنى وراكم وكل ما احاول اعدى الاقى اللى بيقفل عليا ومش عاوزنى اعدى

وبرضة ماشيين على سرعة عشرين وتيت تيت ولا اكنى موجود
المشكلة ان اللى كان بيعمل دة واحد بعربية اكسنت خضرا وباين علية محترم وسنة معدى الاربعين
والتانى بعربية افيو لسة زيرو وراجل كبير وشعرة ابيض ومعاة العريس والعروسة والفالح حاطتلى بدج النيابة قال يعنى هيخوفنى
لو كانو عيال صغيرة او مراهقين كنت قلت فرحانين بشبابهم بس اللى كان بيعمل كدة ناس المفروض تبقى قدوة وميعملوش شغل العيال دة

انا بصراحة اتجننت وقلت هعدى يعنى هعدى

طبعا انا استغبيت عليهم ودخلت بكل غشومية مابينهم وزنقت على عربية العريس والعروسة وكنت هقلبلهم الفرح غم لولا عمتى الى كانت جنبى قعدت تصرخ

طيب لية دة كلة ..ياعم انتا فرحان الف مبروك افرح بس متقعدش تستفز الناس اللى اصلا اللى فيها مكفيها
وربنا اعلم باللى فيها
لية تقفل الشارع وتعطل اللى وراك عن عمد هيا البلد ناقصة عطلة

وفى النهاية انا عاوز اقول لابو نورا مع عظيم احترامى لحضرتك موضوع الزفة دة كان غلط وترتب علية غلط سواق التاكسى وترتب علية برضة غضبك الشديد وبحيى ضمير حضرتك الصاحى اللى مستنكفش انة يعلن عن احساسة بالذنب على العام

وبالنسبة للناس اللى ايدت اللى عملة ابو نورا فى سواق التاكسى انا بدعوهم انهم يراجعو نفسهم لان مش كل التكسجية بلطجية فيهم ناس بتجرى على اكل عيشها زى مش كل اصحاب الملاكى محترمين فيهم تجار مخدرات وعربجية وراكبين اغلى الموديلات

تقبلو تحياتى