نبدأ باول نقطة
تاريخي مع العربيات...
و ده انا شايفه مهم لاني ركبت عربيات كتير الصراحة..و اظن انه ده خلى المقارنة صعبة
والقرار اصعب
وانا و بحمد الله لا افقه في الميكانيكا شيئا
و معظم العربيات اللي انا ركبتها كانت زيرو و بتتباع لما يعدي عليها 5 او 6 سنين
لأن دي نظرية والدي في العربيات ..بيشتريها زيرو و اول ما يسمع صوت في العربية بيبعها
صح و لا غلط هو مبسوط كده
و بطبيعة الحال فانا توكيلاوي حتى النخاع .. مليش في الشغل بره
فانا اقدر اقارن بين العربيات من حيث السواقة و قدرة الاحتمال و التوكيل و خدمة ما بعد البيع..
غير كده انا شكرا
موش هاطول عليكم
اتعلمت السواقة في تانية ثانوي سنة 97 على 128 نصر موديل 86
و بابا اداهلى هدية في تانية كلية لما اتزنق و خدوا منه عربية الشغل (اللي كان ممنوع على اركبها حتى
) و كانت نيسان صني الياباني موديل 96 الياباني الاصلية ( و كانت عربية سباق و الله العظيم حاجة تانية خالص غير الصني بتاعت الايام دي) ..المهم اتزنق و معرفش يعمل اي مشوار بال 128 فنزل و اشترى ارخص عربية في السوق دايو لانوس الكوري 99 زيرو
و كانت نقلة هائلة بالنسبة لي من ال 128 للانوس يا نهار سواااااااقة
و طبعا في رابعة كلية عملت ثورة على المسكينة 128 لغاية لما الحاج افرج عني و جابلي اعز عربية في حياتي الابيزا 2002 الالف السي السي الالماني الزيرو
انا لم احب عربية في حياتي اد الامورة دي حبيبة قلبي
عشت بيها احلى ايام و لفيت بيها مصر كلها من الساحل لشرم لدهب للسخنة لكل ما يمكن الوصول اليه ..
سواقة و اوبشن و توكيل و كل حاجة ( علما اني شايف توكيل اللانوس اللي هو توكيل الاسبرانزا الان كان احسن بكتير في المعاملة من توكيل السيات رغم انه توكيل السيات هو هو توكيل مرسيدس و توكيل البورش كمان )
ثم سمع ابي صوت في اللانوس و قرر يغير في سنة 2006
و كان نازل يشتري لانوس تانية و اخويا الصغير هو اللى اقنعه طالما لانوس بلانوس يبقى افيو اجدد و اشيك
و اشترى الافيو 2006 كوري..
و ده كان اول مقلب لبسناه ...
من اول يوم سوقت فيه الافيو و انا حاسس بمقلب كبييير و باحمد ربنا على الابيزا حبيبتي
و بعدين والدي اتزنق في الفلوس ..و انا كابن مصري اصيل طبعا بعت عربيتي في 2007 علشان اقف جنب والدي في زنقته
و بعت الابيزا بعد خمس سنين حب و هيام ( رغم خراب بيتي في قطع الغيار)
و مقدرتش اقعد من غير عربية و استلفت و عملت جمعية علشان اجيب اي حاجة
و اشتريت سكودا فيليشيا 98 (لاحظ تأثير الابيزا) لمدة يوم واحد و طلعت كانت جايبة وش سلندر و رجعتها لصاحبها
و بعدين جبت الاكسيل 95 الكوري و دي كانت تجربة ليا في المستعمل و كانت حالتها نضيفة و قعدت معايا لمدة سنة و بعتها و مخسرتش فيها الا اللي صرفته عليها طبعا
و بعدين في 2008 بابا سمع صوت في الافيو (لاحظ بعد سنتين بس و كانت عاملة 29 الف كيلو بس ) و افتكر وقفتي جنبه فاشفق على و اداني الافيو و اشترى لانسر 2008 اتوماتيك زيرو 1600 خليجي لنفسه
و من الاخر كده اللانسر دي عربية بجد
ومن 2008 لحد دلوقتي ما شاء الله موش راضية تطلع و لا صوت
و توكيلها لا يعيبه الا انه زحممممممممممممممممممممممم ممة جدا ...بلدنا كلها لانسر ماشاء الله
و اخدت انا الافيو..
المقلب ..
و بعتها بعد رحلة عذاب و غتاتة في 2011 ... لظروف مادية برده
و اديت كل فلوسها لوالدي( عربيته) وبدأت رحلة البحث عن عربية ليا
زهقتوا,,,,لا لا ,,,الرحلة لسه مخلصتش
اصل في النص
جوز اختي اشترى نيسان صني مانيوال 2010 و سافر و سابها مركونة عندي لمدة سنة
عربية لا ترقى للمتوقع منها .. و خصوصا اما تنزل من لانسر
و ركبت كتير بيكانتو 2008 مانيوال زيرو عادية جدا ..
و هيونداي جيتز 2007 مانيوال زيرو جامدة بس موش اوي ..(كانوا عربيات قرايبي)
و مرة كنت خلاص هابدل الافيو ب ميجان 2006 هاي لاين كانت عاملة 26 الف كيلو بس ..بس والدي و مراتي وقفولي البيعة الحمد لله من الخوف من الميجان..
يعني الصراحة ركبت .. و سوقت .. وانا بحب السواقة جدا و بسوق لمسافات طويلة ( من سكان اكتوبر من 94 ) و جربت و اتزنقت في شرا العربية و بدأت دوامة شرا العربية
و شكرا على صبركم و نكمل بعدين
- يتبع -