رد: أدعو كافة الاعضاء للقراءة بعقلانية و دون هجوم بدون مبرر
السلام عليكم، أتفق مع أولد مان بإن العربيات الصينية هايتحسن مستواها الفني والعربيات الهندي كمان وهاتزيد مبيعاتها، ده بحكم اكتساب الخبرات من دروس المبيعات في العالم نتيجة التغيرات الإقتصادية ونتيجة لتبدل أذواق المستخدمين، ده بينعكس تقدم في التصميم وخامات وتكنولوجيا التصنيع اللي بتؤدي إلى خفض الكلفة وبالتالي خفض قيمة السلعة (العربية)، بس أحب أضيف إن لازم ناخد على محمل الجد قدرة الدول الصناعية الكبرى على فهم الدرس القاسي اللي تعلموه من الصين في الفترة القليلة اللي فاتت. الدول الصناعية دي ممكن برضة تطور تكنولوجيا تنافس فيها رخص أثمان المنتجات الصينية بل يمكن تنافسها في السعر دون التضحية بالجودة المعروفة عن منتجاتها (الأوروبية والأمريكية). الصين بتنافس بسبب ضخامة حجم إنتاجها اللي بيعوضها عن انخفاض أسعار سلعها. أمريكا والإتحاد الأوروبي لإنهم بيطبقوا قوانين عمل صارمة تخضع لنقابات عمال فعالة، الدول دي لغاية دلوقتي مش قادرة تنافس الصين لإنها ما بتقدرش تخفض أجور العمال وتزيد ساعات عملهم بسبب قوة النقابات العمالية، بس ما نضمنش يفيض بيهم ويقولو عليا وعلى أعدائي ويشرعوا نظم عمل جديدة تحد أو تلغي قوة النقابات العمالية، أمريكا فعلا بدأت من فترة تعمل كدة والعمالة المكسيكية الرخيصة من فترة غزت الولايات المتحدة الأمريكية غير إن سوق العمل الخاص (القسم اللي مش خاضع لأي نقابات عمال) في أمريكا فيه منافسة شرسة للحصول على الوظائف والعمالة فيها ممكن تشتغل ساعات طويلة وبأجور برضة تعتبر متدنية بمقاييس أمريكا، الحكومة الأمريكية مش شكلها زعلان أوي من الحكاية دي ومش بعيد تسمح بتعميمها (أو تغمض عينيها حبتين)، الإتحاد الأوروبي الأمور فيه أصعب من أمريكا في مجال التنافس الصناعي بس برضة ما نضمنش الناس هناك تتخنق إن آجلا أو عاجلا وهي اللي تطلب التغيير، أتوقع في غضون السنين العشرة الجاية هانشوف (لو عشنا إن شاء الله) تطورات كبيرة جدا من كل أطراف الصناعة العالمية (الصين - الهند - الولايات المتحدة - البرازيل - الإتحاد الأوروبي - روسيا - كندا - اليابان - كوريا الجنوبية) ولا دولة عربية طبعا. الصيني متفوق حاليا بس برضة على حساب الجودة، ما نقدرش نقارن الصيني بالأمريكي أو الأوروبي أو الياباني. المستهلك طبعا بيقرر نسبة الجودة اللي تلزمه حسب إمكانياته المادية، بس في العموم الأوروبي والأمريكي من ناحية الجودة يكسب والصيني من ناحية السعر يكسب. رأيي خطأ يحتمل الصواب، وآرائكم صواب تحتمل الخطأ.
تحياتي.
|