[Injection]

المشاركة الأصلية كتبت بواسطة احمد على 1999 اول ما روحت اجيب العربية (لانوس) سنة 2002 (انا من اسكندرية) استلمتها من المعرض بتاع دايو الى فى المعادى و كنت سياقها اوديها مدينة نصر نبيت عند اخت المدام و بعدين نرجع اسكندرية ففى السكة من المعرض لمدينة نصر(العربية لسة زيرو بتبرق و معليهاش نمر) لقيت عربيات قدامى واقفه بس من على يمينهم سالكه قولت اخدها من اليمين قوم و انا لسة بعدى من يمينهم لقيت خير الله ما اجعله خير ترماى بيعدى اتاريه مزلقان و هما واقفين علشان الترماى يعدى طبعا جالى سكتة قلبية و الحمد لله وقفت و فضلت واقف شوية (انا بسوق من سنة 90) و الحمد لله عدت على خير بس معرفتش اسوق العربية تانى خدت عربية حمايا و هو خد عربيتى و مشيت وراه و طبعا سقت عربية حمايا عادى جدا من غير اى عقد المهم الموضوع ده خلانى معديش من جنب حد الا لما اتاكد هو واقف ليه

المشاركة الأصلية كتبت بواسطة احمد على 1999 و فى مرة وقفت ورا اتوبيس فى اشارة على اليمين و الاشارة فتحت و هو فضل واقف و انا مبحبش ازمر فين و فين نزلتله لقيته اتوبيس عطلان مفيهوش حد!!!

الحمد لله ربنا بيستر, موضوع التعدية من اليمين أو الشمال حتى بقى خطر جدا, بسبب الأوتوبيسات والميكروباصات اللى بتقف تحمل وسط الشارع والناس اللى بتعدى الطريق فى شوارع كبيرة وحيوية وممكن تلاقى واحد منهم قدامك فجأة متعرفش تعمل أيه؟

وأرذل حاجة أنك مبتكشفش الطريق قدامك بسبب الميكروباصات والأوتوبيسات, وكتير بتضطر تعدى بتخيلك لحالة الطريق فقط, وربنا الحمد لله بيسترها.

والقصة التانية دى جامدة أوى, أنا لما حاجة بتقف قدامى بستناها ومبحدفش على اللى جنبى أحتراما ليهم, وكتير السواق لايبقى عنده ذوق أو دم ويقف براحته ولا هامه اللى ملطوعين وراه, وبيقف من غير أشارة كمان.

وشكرا على مشاركتنا تجربة حضرتك.