[Ahmad Rizq]

السلام عليكم و رحمة الله و بركاته .
ان شاء الله في احسن حال و اتم الصحه والعافيه ,
المواضيع عن السرعات الزياده و الغرز انا عارف انها بتثير حساسيه لدى البعض لانها بتعتبر خرق لقواعد المرور , و لكن بما ان الامر اصبح شئ حتمي فا المفروض بدل ما نتكلم و نقول سوق براحه و ما تغرزش بالعربيه , و لان كتير مش هيسمع و هنيفذ الي في دماغه طب ما تيجي نتاقش عن الاحتياطات الي لو انت خلاص بتحب تاخد غرز ياريت تخلي بالك لعلها و طبعا مش اكيد تقلل شويه من الاخطار المتوقع حدوثها , .
اولا عاوز اقول , مش معنى انك ما بتحبش تاخد غرز و انت سايق ده يكون مبرر انك ما تتعلمش او ما تحاولش , لاء ساعات ممكن تتحط في موقف سئ لقدر الله فا الغرزه تنقذك ممكن عربيه تحدف عليك فا تضطر تاخد غرزه , لا قدر الله حصل حادث اودامك و هتضطر تاخد مناوره صعبه عشان تتفاداه في الوقت الي الفرامل مش هتيج همها معاك , حد فرمل اودامك فجأه , في مواقف حتميه لازم تتصرف فيها بسرعه و ممكن تكون الغرزه سبب في نجاتك .
انا هتكلم عن الحاجات الي بخلي بالي منها لما بقرر اخد غرزه , و طبعا كل واحد و ليه اسلوبه و الهدف مش ان الشباب يتعلمو اسلوب متهور في القياده اكثر من انه باذن الله نحاول نتجنب شرور الحوادث .

- اولا ظبط المرايات , الغرزه بتحصل في ثواني فا ما ينفعش تاخد غرزه و لاقدر الله تلاقي عربيه طلعالك في النقطه العميه و انت ماكنتش شايفها , ف المرايات لازم تتظبط على الوضع القائم بحيث تشكف اكبر بعد من الطريق
- معرفة ابعاد السيارة , ما ينفعش تاخد غرزه و انت مش عارف حدود سيارتك سواء فين بوذ السياره , و حدودك من ورا و من الجوانب ,
- معرفة الطريق معرفه شبه كامله
- لازم تقرا الطريق لأطول مسافه اودام , يعني ارمي بعينك اودام على حارات الطريق كلها اليمين و النص و الشمال بحيث ما تتفاجئش بأي عائق قد يعرضك للخطر
- التأني في حساب الغرزه , و انت بتحسب الغرزه حط في بالك حاجتين اول حاجه المكان الي انت هتعمل فيه المناوره يا ترى هيعدي عربيتك ولا لاء , تاني حاجه سرعات السيارات , تخيل معايا سياره اودامك و سياره شمالك و بينهم مسافه انت المفروض هتاخد فيها غرزه , تخيل كبست انت بقا على العربية الي اودامك و بتاخد الغرزه لقيت العربيه الي في شمالك كبست هي كمان , لازم تكون عامل حسابك ان المكان الي انت هتاخد فيه الغرزه طوله شبه ثابت ما بيتغيرش .
- تابع دايما حالة الطريق ورا لعلك و انت بتاخد غرزه حد يكون جاي بسرعه انت ما عملتش حسابه فا هنا تعرض نفسك للخطر
- حاول تستخدم الاشارات بشكل دائم في الغرز ,
- اعرف انك و انت بتاخد الغرزه لازم تكون عارف انك الوقت الي بتبص فيه على المرايات قليل و قد يكون ممكن ما تبصش , يعني في سواقين بيبص ع الطريق اودام و يقرر ياخد غرزه وخلاص بيلغي المرايه الي في الجنب و هو حاسب المكان قبل كدا , و في ناس بتحب تاخد بصه ع المرايه الي في الجنب قبل ما تقرر تاخد الغرزه .
- تجنب انك تاخد غرزه بغباء , يعني ما تخدش غرز ب 4 حارات مره واحده إلا و انت عارف حالة الطريق ورا , انا بسبب الموضوع ده كنت هعمل حادثه لولا ان ربنا خلاني المح ميكروباص كان جاي طاير في اخر لحظة و عدلت نفسي ,

دي الحاجات الي فاكرها دلوقت و منتظر أرائكم القيمه , و في النهاية دا مش موضوع دعوه انك تسوق بتهور اكثر من انه محاولة لاننا نقلل اخطار الاشياء الخطره , و ربنا هو الحافظ و الموضوع ده مش ضمانه لعدم الحوادث , كل انسان لازم يكون متحمل نتيجه افعاله , و اخيرا و ليس آخرا ليس المخاطر بمحمود و ان سلم .
ربنا ينجي طريقنا و تذكرو دائما دعاء ركوب السياره حفظنا و حفظكم الله