[Injection]

الحركة دى يارجالة بتأثر على مليون حاجة فى العربية من ضمنها الموتور, الكبالن بتبوظ علشان بتحمل عليهم, الفتيس فيه حمل كبير جدا على التروس, والكاوتش ومسامير الجنوط, فيه أيه يارجالة أنتوا بتهزروا ولا أيه.

أنت بالحركة دى بتحاول تخلى العجل يسيب الموتور ويلف لوحده, ومع أحتكاكه بالأرض بيتأكل وبيحمل جامد على كل الأجزاء اللى بين العجل والموتور, كأنك واقف على مطلع 60 درجة ودايس بنزين, العربية مش هتتحرك لأنها مش قوية كفاية والمطلع بيحمل وزن زيادة على الموتور بيخليه مش قادر يحرك العربية.

وده كمان غير أنك بتحمل على مسامير الجنط برضه وبتضعفها.

وأحنا عربياتنا دى عامة عربيات لعبة متنفعش للحاجات دى, والصور اللى صاحب الموضوع حاططها خير دليل

وحاجة مهمة, وهتعجبكوا أوى, الحركة دى بعربية دفع أمامى اوتوماتيك أو مانيوال سهلة جدا, فرامل يد, بنزين الى 4000 لفة, وسيب دبرياج.

دفع خلفى لازم تعديل على نظام الفرامل, فيه ناس بتقفل خطوط الفرامل اللى رايحة على العجل الخلفى, بحيث لما تدوس فرامل العجل اللى ورا ميقفلش لكن اللى قدام يقفل, وتأمرك براحتك.

ودى ممكن تعملها حتى بمشبك غسيل, أو تعمل نظام متكامل علشان تعمل الموضوع ده بضغطة زرار من جوه عربيتك.

أنما الطريقة المذكورة أعلاه دى زى مالعضو الفاضل أستاذ حسام قال متنفعش للمواتير الضعيفة, و 2000 سى سى ضعيفة برضه, الموستانج 4000 سى سى يارجالة يعنى تزق حيطة مش تأمرك بس

اللى عايز يلعب يجرب فى رمل أو ميه, كده مش مشكلة ومفيش ضرر على العجل أو أة حاجة تانية, وتجربة لمرة أولى, أنما الأسفلت بلاش.

وده فيديو ظريف ك finale للرد:-

http://www.youtube.com/watch?v=xgePtgZlUhE