[LARA]

السلام عليكم ورحمة الله
بجد منتدى جميل جدا ومفيد وربنا يباركلكم يا رب
انا لقيت المنتدى النهاردة وانا بدور في موضوع التقسيط بسبب المشكلة اللي قابلت زوجي في تقسيط السيارة من بنك ناصر وللاسف المشكلة حصلت في اخر لحظة بعد ما باع عربيته

هو كان معاه سكودا فيلشيا موديل 96 وباعها ب 28,500 وكانت خطته دفع 25 الف مقدم وشراء نيسان صني الموديل القديم اوتوماتيك وراح فعلا بنك ناصر وبدا في الاجراءات بقاله حوالي 10 ايام..واالقسط كان هيبقى 1400 تقريبا والعربية ب 110 الاف تقريبا
هو يعمل طبيب بيطري بشركة ادوية وعشان كده البنك طلب 2 ضامن حكومي ..المشكلة ان موظف البنك شخص غريب جدا ياخذ الورق ويقول تمام ويخليك تكشي في الخطوة اللي بعدها وييجي في الاخر يقولك الورق مش نافع..عملها معانا مرتين..اول مرة مع احد الضامنين حيث انه موظف حكومي في مصلحة الضرائب ولكنه بيقبض من بنك تاني و الموظف كان شاف المفردات من الاول وما علقش عليها غير ف اخر لحظة وللاسف ما نفعش الضامن ده لان المصلحة رفضت تمضي على خطاب ضمان تحويل المرتب لانهم مرتبطين ببنكين حكوميين تانيين وقالوا ما ينفعش

دخلت انا ضامن بدل الشخص ده ,انا موظفة حكومية(طبيبة) وجبت مفردات مرتبي وخد مننا كل الورق وادالنا ورق اخلصه من الادارة الصحية اللي انا تابعة ليها وكل حاجة مشيت تمام , وراح فعلا زوجي البنك وخلاص كان الموظف هيفتحله لحساب وتقريبا مضى على عقد التامين على الحياة وهنا " اكتشف" الموظف ان مرتبي 1100 وهو اقل من قيمة القسط , ومرتب الضامن التاني حوالي 1500 وبكده مش هينفع..وده كان في اخر لحظة والمفروض انه الورق كان معاه من قبلها بايام يعني...

للاسف مش عارفين نلاقي ضامن تالت زي ما اقترح الموظف, وبصراحة اتقفلنا من البنك وموظفينه لان بعنا عربيتنا القديمة فعلا ودلوقت مش عارفين ايه الحل..ومينفعش حد من زمايله يضمنه لانهم مش موظفين حكوميين! وكل موظف حكومي من قرايبنا عنده او.. والموظف بيقول مينفعش ضامن ع المعاش ولا ينفع ان زوجي يحول معاش والده ع البنك
هو الفكرة ان بنك ناصر بيقسط على 7 سنين بفايدة 6% فقط ودي ميزة كويسة طبعا..لان مش هنقدر نجيب نفس العربية على 5 سنين من بنك تاني لان القسط هيكون كبير جدا


اتمنى اسمع اقتراحاتكم بالنسبة لبنوك تانية تقسط على 7 سنوات, ولو تعرفوا حاجة عن تقسيط السيارات من نقابة الاطباء او اي جهة اخرى..او اي اقتراح مناسب حتى لو لعربية تانية بامكانيات قريبة
ومتشكرين جدا ليكم