[محمود حسين المتحدة]

احمد بيه مش هخبى عليك انا مكنتش متوقع ان تقرير حضرتك عن زيارتك لينا هيكون بالشكل الجميل ده وفعلا انا بشكرك لان شهادة حضرتك لينا اكيد هتكون حافز لينا اننا نفضل بنفس المستوى وفى نفس الوقت اكيد هتشجع ناس كتير تتعامل معانا وده طبعا مهم جدا بالنسبة لى بشكل شخصى انت عارف انا راجل بتاع تسويق وخدمة عملاء والمنتج بتاعنا اللى هو ( خدمة وصيانة السيارات ) دى حاجة بتكون مبنية على ثقة الناس فى الخدمة وشهادة حضرتك طبعا اكيد هتدعم ده .
وبالنسبة لدعوة حضرتك لى ان اعرف حضرتكم اكثر بالمركز وسياسة التسعير فالموضوع ده ليه قصة طويلة شوية فعشان كدة انا هستأذن حضرتك - بصفتك مشرف القسم -انا كنت كاتب الموضوع بالتفصيل فى اسبرانزا كلوب وممكن انقله فى موضوع خاص هنا
وبالنسبة لسياسة التسعير فانا هاوضحها من خلال شرح لشعار المركز اللى هو ( لسنا توكيل .. ولسنا ورشة .. لكن حاجة جديدة )
وده معناه اننا من حيث الحجم والامكانيات والتجهيزات والفنين اعتقد نصلح اننا نكون مركز خدمة معتمد يعنى توكيل ولكننا لسنا توكيل
وايضا لسنا ورشة بالرغم من ان اسعار المصنعيات لدينا تعتبر قريبة جدا من اسعار الورش ( اللى بتفهم فى النوع ده من السيارات )
على سبيل المثال مصنعية تركيب الكاتينة فى ال 516 بتكون فى التوكيل 350 ج عندنا هتكون 150 ج
مثال تانى تركيب المساعدين امامية او خلفية فى التوكيل بتكون 180 ج عندنا هتكون 60 ج غير اننا ممكن نعمل خصم فى المصنعيات ولو بسيط فى حالة ان السيارة يكون فيها شغل كتير يعنى مثلا لو حضرتك بتغير الاربع مساعدين المفروض تكون 120 ج وساعتها ممكن نمشيها 100ج فقط وهكذا
بالنسبة لقطع الغيار ممكن العميل يشترى قطعة الغيار واحنا بنركبها له وفى نفس الوقت احنا بنحاول على اقصى جهد اننا نوفر قطع الغيار لدينا وفى حالة ان حضرتك بتشريها من عندنا بتكون تقريبا بنفس الاسعار اللى ممكن تشتريها به من اى محل بتتعامل معاه وبيكون فى فرق بسيط يعنى من 5 الى 25 ج على حسب القطعة فى مقابل توفير الوقت غير اننا بنعمل ضمان بجد على قطع الغيار الاصلية مثل الضمان المتبع من التوكيلات للمسافات والمدد يعنى لو طقم كاتينة بيكون ضمانه 40000 كم او سنتين وبالنسبة لباقى قطع الغيار الاصلية بيكون 5000 كم او 3 شهور ايهما اقرب
باختصار احنا بنعمل شغل توكيلات باسعار الورش
يارب نكون عند حسن الظن دايما وارجو من سيادتكم الدعاء لينا بالتوفيق