[AbOnOrA]

طبعا مشكور على نقل التجربة وربنا يعوض عليك الوقت والمال وحرقة الدم انا حاسس بيك بس ارجوك تكمل فى اخد حقك ده رقم جهاز حماية المستهلك اتصل بيهم واعمل بلاغ 19588

فى حالة انك قررت تعمل ده هتثبت الفواتير والعربيه يتعملها فحص فنى لاثبات وجود العيب واسبابه ومدى علاقتها باللى تم تغييرة او اتلافه فى العربيه
خد بالك المركز ساعة الجد ممكن ينكر تلافيات الونش لكن باقى الخسائر هتبقى واضحه وفى كل الاحوال المركز ده هيعمل الف حساب قبل ما يكرر الاداء الفاشل ده تانى

فى حالة انك هتديهم فرصه تانية او بمعنى اصح فرصه كاملة يبحثو فى العيب وميغيروش حاجة غير بعد ما يتاكدو مش بالتخمين ويسلموك العربيه بعد الاختبار اللى هما محاسبينك عليه فى الفاتورة من ضمن المصنعيات يبقى ماشى ومتستلمش العربيه الا والعيب متصلح وتجرب بنفسك وبعدين تدفع وده الصح دائما فى اى شغل مصنعيات ويبقى ليك برضو حق انك ترجعلهم لو ظهر عيوب بعدها فى المصنعيات او قطع الغيار

مراكز الخدمة والتوكيلات زى ما ليها مميزات ليها عيوب برضو واسوائها انهم تجاريين زيادة عن اللزوم فهو شغال يفك ويركب جديد ويعمل فواتير مصنعيات وقطع غيار واللى بعده
لكن ده ممكن ينفع مع العربيات الزيرو لكن بعد كده العربيه بتبقى عايزة صبر وتقييم للعطل مظبوط واختبار كافى بعد الاصلاح لضمان سلامته والاهم شوية ضمير

ومن باب الضمير المفروض الحاجات اللى تم استبدالها يرد مبلغها والتلفيات اللى تمت من نقل الونش يعالجوها او على الاقل مياخدوش حساب الونش ويشوفو العربيه فيها ايه ويتعمل ويحاسبوك على قطع غيار ومصنعيه اللى تم بس ان مكانوش يعملولك خصم كمان ده لو عايزين يصلحو العك اللى حصل