[BASSEM BESO]

بعد التحية ومساء الخير لجميع الأخوة الأفاضل الأعضاء المحترمين حبيت بس اطرح موضوع كدة يعنى يخرجنا برة الروتين اليومى الممل ونستعيد كدة الذكريات الأليمة والفكاهية فى النفس الوقت فى سنة اولى قيادة ؟؟
طبعا اكيد كل منا مر بموقف مؤلم وحزين لكن اصبح بعد ذلك ذكرى نضحك علية كلما تذكرناة ....
واطلب من كل واحد منكم ان يصف لنا ماحدث لة فى اكثر موقف صعب تعرض لة اثناء فترة القيادة الأولى واسمحولى ان ابدأ انا

كنت فى 16 من عمرى ومكنش طبعا طلعت رخصة المهم من حبى للعربيات جدا كنت بتحايل على والدى يعلمنى ومكنش بيوافق بس الأخر بعد الزن ووجع الدماغ اللى سببتهولة خلى سواق عربية المصنع بتاعة يعلمنى على سياراتنا الفيات 132 وبعد فترة من التعليم حسيت انى تمام ولا مايكل شوماخر فى مجدة جتلى فرصة من دهب عشان اطلع بالعربية لوحدى بدون تدخل من والدى وياريتها ماكانت جت والموقف كالتالى :
اختى كانت فى المدرسة والباص بتاع المدرسة قال انة مش حيرجعهم النهاردة عشان عطل ووالدى انشغل بأجتماع مهم اتحيات علية ان انا اروح اجيبها بالعربية رفض فى الأول بشدة لكن بعد المحايلة والزن وافق بس بشرط انى اخذ واللدتى معايا المهم روحنا انا ووالدتى واحنا رجعين بقى وانا مبسوط اوى بأخذ ملف على الضيق محستش غير لما لقيت جنب العربية الشمال رايح جهنم مش النا بس ولقيت نفسى اتخبطت فى عربية نقل كبيرة ولولا ان 132 عربية قوية كنت زمانى الله يرحمنى المهم قعدت فى العربية وكنت حعيط خلاص واندب حظى المهبب وبينما امى توسينى اهتديت لفكرة جهنمية وهى انى روحت وبألأتفاق مع والدتى غطيت العربية وطلعت ولا كأنى فى حاجةووالدى نزل الصبح لقاها حالها لا يسر عدو ولاحبيب اتهم فيها سواق المصنع وطرد الراجل فى الأول فرحت ان التهمة بعدت عنى بس منمتش بعد كدة حسيت بتأنيب ضمير شديد لحد ماتوسط عند والدى عشان يرجع الراجل وبالفعل رجع الراجل واقسم ان العربية محصلهاش حاجة وهو ركبها ولحد دلوقتى والدى مش عارف مين خبط العربية ساعتها وكل ماتيجى سيرة الخبطة دى انظر لوالدتى ونضحك ولا يعرف والدى سبب ضحكنا هذا حتى اليوم....
واسف جداا على الأطالة