[memo_sms]

اللى حضراتكوا بتتكلموا فيه سبب رئيسى انى مش بأجر عربيات لما بنزل اجازات, لانى مش مقتنع انى اكتب وصل امانه على نفسى بتمن عربيه هلكانه وموديل 4 او 5 سنين فاتوا وخلونى اوضح اكتر

اولا: فى الخليج الايجار بصوره الرخصه
ثانيا: بيكتب عقد ويدينى العربيه
ثالثا: العربيه بيبقى متأمن عليها طبعا, لكن بيديك اختيار يخلى التأمين شامل ولا جزئى لصالح الغير فقط.
رابعا: موديل العربيه بيبقى سنه ورا بالكتير.
خامسا: الكلام ده سارى على اى عربيه من اى فئه او سعر.
سادسا: فى حاله الحوادث بتبلغ المكتب, وبعدين تبقى تروحله ولما المرور يقدر تكاليف الصيانه يدفعك نسبه من تمن الصيانه ووقف العربيه, لكن الموضوع مش كبير ولا وصلات امانه ولا الكلام ده العقد هو اللى بيحكم العمليه, حدث بالفعل والعربيه اتقلبت مرتين وفضلت على ظهرها وجه ونش شالها للمرور على بعد حوالى 200 كم من المكان اللى اجرنا منه, واحنا مالناش دعوه لا بشيل ولا حط انما مضينا على محضر الشرطه وفى الاخر دفعنا 1500 ريال تقريبا,

نيجى بقى لمصر طبعا بعد المرمطه

المشاركة الأصلية كتبت بواسطة محمود36 تم الايجابة عن الموضوع دة مستحيل تاخد عربية من غير وصل امانة ولو مش عايز تكتب وصل امانة خدها ب السائق افضل

واكيد جنب وصل الامانه فى عقد بردوا وتصوير ورق واحتمال يسأل عليك فى المنطقه

مع ان الاستاذ محمود نفسه هو اللى قال

المشاركة الأصلية كتبت بواسطة محمود36 وبتعمل مع اصحاب السيارات عقد ايجار بيكون عادة من سنتين الي ثلاث سنوات وبتديلو صورة من السجل التجاري ومن البطاقة الضريبية ومن البطاقة الشخصية واياك من اعطائة وصل امانة لان العقد بيلزمك بالسيارة

يعنى اللى فهمته من كلام حضرتك ان انت بتضمن حقك تالت ومتلت سواء الزبون او مع اللى مأجر منه العربيه, وطبعا انت بتعمل اللى انت عاوزه مع الراجل اللى عايز يديك عربيته لان ممكن يكون جايبها قسط وعايز يكسب قرشين او مزنوق وجه برجله يبقى اللى يتقاله هيعمله

ارجو محدش يزعل من كلامى, ومحدش يقولى الخليج العربيات ببلاش مش زى عندنا
الموضوع من اوله لاخره تجاره, ولازم يبقى فى عدل مش انتهازيه