هل ستغيب شمس غبور ؟؟
عنوان الموضوع قد يبدوا غريبا ،،
بعض الشئ ،،
فكرة الموضوع جاتلي نتيجة لحواري مع مهندس صديق يعمل لدي غبور
صديقي كان بيقولي ان غبور بيجيب لورا ،،
و بيتخذ قرارات عشوائية ،،
و الشركة مليئة بالمشاكل
و غبور يرفض الإعتراف انه بيفشل بدون عمرو الإسكندراني
لمن لا يعرفه عمرو الإسكندراني كان هوا الشركة
و هوا من صنع اسطورة هيونداي في السوق المصري
لو تفتكروا من اربع سنين كده
كانت هيونداي يدوب الاكسنت القديمة
مرة واحدة البلد بقت كلها هيونداي
و هيونداي دخلت في فئات مكنتش بتذكر فيها
و شوفنا الماتريكس و الالنترا و الفيرنا و الجيتز و الأتوس
بفضل الفكر العبقري لعمرو الإسكندراني
في الوقت ده كان اذكي واحد في السوق و اول واحد استفاد بقرار تخفيض الجمارك عن السيارات 1600 و شفط السوق
و هوب البلد كلها بقت هيونداي
حاليا ، صديقي بيقولي ان الشركة مبقاش فيها الكوادر اللي علي نفس مستوي عمرو الاسكندراني
طيب ايه اللي اتغير ؟؟؟
قرارات غريبة اخدها غبور بالتأكيد هتسحب البساط من تحت رجله
1- رفع اسعار عربياته الفيرنا وصلت 73 الف ، الماتريكس الجديدة هتعدي المائة الف ، الإلنترا اصبحت تبتدي بمائة الف ،، حتي الآي 10 اصبحت اغلي من البيكانتو بدون مبرر
طبعا لكم ان تتخيلوا تأثير هذا القرار علي ماركة معروفة عالميا بانها تقدم سعر مناسب ،،،
قولت لصاحبي ، عادي يعني ما كل العربيات غليت ،، جت عليه
فاللي زمان كان غبور Market Leader و هوا اللي كان بيتحكم في السوق و يجبر الآخريين يخفضوا اسعارهم
دلوقتي بقه ماشي ورا السوق
2- رفع اسعار قطع الغيار ،،
و لا تعليق طبعا علي تأثير نقطة زي دي ،،
3- رفع اسعار الصيانة الدورية ،،
لا تعليق ،،
خصوصا ان المعروف ان نقطة جاذبية هيونداي - غبور هيا رخص تكلفة الإقتناء
أنا ليا صديق يملك اكسنت قديمة موديل 2000 ، حتي الآن بيعمل الصيانة في التوكيل ،،
4- حتي عروضه الذكية المدروسة اصبحت عشوائية
زي حملة صيانة عليك و صيانة علينا
باعتبار الزبون عبيط و مش هياخد باله انه بيدفع اكتر
5- مشاكل خدمة ما بعد البيع ،،
لا داعي لتكرارها ،، يكفي ان تزور مركز صيانة ابو رواش و تشوف السويقة اللي هناك و زباين بتتخانق و زباين عربياتها بتتأخر بدون داعي ووووووو
6- أهم نقطة المبيعااااااااااااات ،،،
مبيعاته مقلتشي ماشي ،،،،
لكن حصته من السوق قلت من 31% ل 19% !!!!!!!!!!!!!!!!
طبعا انا يمكن من المحبين لهيونداي و باحترم غبور كواحد كان بيقدم خدمة ممتازة في صورة منتج جيد بسعر معقول جدا ،
بس كل الحقائق دي ،، تدعو للتفكير ،،،
و هيسيب الساحة خالية و مفيش حد قادر علي ملأها بنفس الذكاء و بنفس القوة و الحجم
و العميل هبفقد خدمة معقولة كانت بتتقدمله
انا مبقولشي انها هتسيب مركزها الأول دلوقتي بسهولة ،،،
لأنه عنده عوامل تؤهله للبقاء في المركز ده لفترة اخري
زي شبكة موزعين مفيش قدها ،، اسم اصبح هناك بعض الإرتباط بيه ، امكايات و حجم مفيش حد قريب منه ،،
و بس كده
لكن التاريخ ده هيفضل مكفيه لحد امتي ؟؟؟ خصوصا مع هذا التخبط الإداري
و ايه البدائل ؟؟؟؟
اول ما يخطر علي البال ،،،
محمد نصير بشقيقة هيونداي ،، كيا ،،،
محمد نصير تاريخه معروف تاجر فقط ،،
يعمل الشركة و يوقفها علي رجلها و يبيعها
باع كوكاكولا ، باع كليك لفودافون ، حتي الكان شركته الأساسية باعها ،،
و ده اللي اتوقعه بعد ماتخانق علي توكيل كيا كام سنة هيبعيها و يكسب كام مليون بعد ما يعملها اسم شوية
و ده واضح حتي في بخله في تنزيل موديلات جديدة
التوكيلات الخليجية ، الفطيم - عبد اللطيف الجميل - اوماترا ،،،، و غيرهم
متوقعلهمشي نجاح باهر هما بيبعوا علي اسم شركاتهم الأم بس ،،
معندهمش فهم لعقلية العميل المصري و احتياجاته و من الآخر مفيش شركة في مصر بتنجح و اصحابها مش فيها --- رأي شخصي
منصور مش قادر ابني رأي محدد عنه ،،
و لكن شيفروليه الكورية و اوبل الألمانية - مالهمشي جاذبية مش عارف ليه في ذهن المستهلك المصري كلا في فئته
بصراحة شايف الساحة مفتوحة للاتنين دول ،،
لأبو الفتوح ،،،
بشركة ام تنمو بسرعة الصاروخ ( شيري ) حتي لو صينية و اسعار سيارات و تنوع
مفيش كلام عليها
و تويوتا ايجبت ،،
توكيل ذكي ، جرئ ، متابع و مهتم بالسوق المصري صح
و علامة تجارية مفيش بعدها
غير كده مش سايف حد تاني عنده القدرة علي ملأ الفراغ المتوقع ،،
بانتظار ارائكم و تعليقاتكم ،،،
|