[د0تامر محمد]

خـــــــــــــاص بـمـنـتـــــدى مـــصـــــــر مـــوتـــــــــــــــورز و غير مسموح بالنقل او الأقتباس الا عن طريق استئذان كاتب الموضوع ..... و كاتب هذا الموضوع له حق امام الله لو تم نقل او اقتباس الموضوع بدون معرفته ..... و لكم جزيل الشكر ,,,,



الحلقة الثالثة
---------------
ليلة مقتل الراقصة
----------------------
الراقصة مايسة هزاز راقصه مشهورة بشارع الهرم
أختفت لمدة يومين قبل ان تفتح شقتها وتوجد مقتوله بحجرة نومها وعلى فراشها!
وبعد ابلاغ خادمتها شوقيه كفته للشرطة توجه العقيد دهب ومساعده الى مكان الحادث لاستطلاع مسرح الجريمه00 وتبين سرقه أموالها ومجوهراتها وبعض المقتنيات الثمينه0
وبعد سؤال الخادمه قالت:
-انا يابيه من خمس سنين فى خدمة ستى مايسه بآجى كل يوم الصبح الساعه عشرة أروق الشقه واحضر الفطار لستى اللى بتصحى بعد الضهر واروح بعد العشا لان ستى بتسهر طول الليل بره وبترجع وش الفجر
قال العقيد دهب:
-وامبارح كنت فين؟
-انا يابيه خدت اجازة من ستى لانى كنت مسافرة اشوف امى00ياريتنى ماسافرت لو كنت اعرف ان ده ح يحصل ما كنتش سافرت من أصله
قال المقدم فضة:
-انتى متعودة تاخدى اجازة اسبوعية؟
-لأ00بظروفها يابيه
-طيب مين كان بيتردد على ستك
قالت وهى تبكى:
-مفيش يابيه غير سونيا الرقاصة00 وعوض الفحل الفتوة00 ونصه الطبال00 حسونة بيه
وبعد استدعاء هؤلاء00
قال العقيد:
-التقرير بيقول ايه يا فضة؟
-الجريمه سعادتك تمت بين الساعة 6-8 مساءا
عن طريق الطعن بسكين فى القلب
-الموضوع ده شكله معقد
-تمام سعادتك لان الجيران محدش منهم شاف حاجه
-خلى بالك دى ساكنه فى الدور الارضى ومحدش ح يطلع على السلم عشان حد يشوفه
-المنطقه كمان مش مأهوله00يعنى ممكن اى حد يراقب عن قرب ويعرف مين عندها ولا معندهاش حد واكيد لاحظ غياب الشغاله وعدم وجود ضيوف وعمل عملته
-دخلى المشتبه فيهم
ودخلت سونيا وهى تبكى بحرقة
قال العقيد:
-ايه علاقتك بالقتيله مايسة؟
-دى صاحبتى الروح بالروح وامبارح انا كنت عندها بعد العصر 00قعدت معاها شوية اتغدينا سوا وكانت مصدعة عملت لها كوبايه شاى وخدت اسبرينه وبعدين سبتها لما راحت تنام ومشيت روحت الكباريه لان عندى نمرة بدرى
-مشيتى الساعة كام؟
-حوالى الساعه سته
وبسؤال عوض الفتوة قال:
-سعادتك انا مبشوفش الست الا فى الكباريه بعد الساعه عشرة بليل لما آخدها من قدام الكباريه وافضل معاها لما تروّح00 اوصلها لبيتها 00وامبارح مجتش لانه كان يوم اجازتها
قال المقدم فضه:
-انت تاريخك أسود يا فحل00م تعترف أحسن لك
-لا يابيه انا ممكن اعمل كل حاجه الا القتل
-وكنت فين امبارح من المغرب لبعد العشا؟
-كنت00000 فى مشوار سعادتك
-فين يعنى؟
-مصلحة كدة سعادتك
-ماشى يا فحل 00فين يعنى؟
-كنا00كنا00 بنجيب حق زبون سعادتك من واحد بيبلطج عليه
-هوه اللى بيبلطج00على اى حال وقعتك سودة كدة او كدة
وبسؤال نصة الطبال:
-انا سعادتك كنت بحبها مووت مووت00ياروحى عليها زمبلك 00ولعة00 بترقصنى من غير طبله
وانا امبارح كنت سعادتك فى البيت نايم من بعد العصر لنص الليل
قال العقيد:
-فيه حد بينام ده كله
-اللى حصل سعادتك
-كلام مش منطقى
-والله سعادتك كنت مخمود فى البيت
-امبارح انت رحت لها البيت الساعة سبعة تقدر تنكر
-أأنا00 ال000 ساعة ككككام00
محصلش يابيه
-فيه ناس شافتك
-شششافتنى00ازاى سعادتك
انا كنت نايم فى البيت
-ماقولنا موضوع النوم ميدخلش العقل
-أأصلى بصراحة كنت شارب سعادتك وانصتلت نمت سطيحة وصحيت بليل
بسؤال حسونة بيه قال:
-سعادتك انا راجل بحب الفرفشه ومايسه دى صاحبتى بس بالادب والله مفيش بينى وبينها حاجه انا راجل متجوز وعندى عيال وبعدين بينى وبينها شغل
قال العقيد:
-انت بتتردد عليها فى بيتها كتير ليه؟
-سعادتك شوية أنس خصوصى وبينا شغل
-يعنى ايه؟
-هيه سعادتك بينها وبينى مشروع مشغله فلوسها فيه معايا 00حاكم هيه معاها عكمة جامده وانا راجل تاجر وهيه بتشغل فلوسها00ارزاق سعادتك
-وامبارح كنت فين من بعد العصر لبعد العشا؟
-امتى سعادتك؟
-زى ما سمعت
-انا 00انا كنت فى البيت اتغديت وطلعت حوالى سبعة 00لأ سته 00رحت مشواركده لحد اسكندريه أسدد فلوس لتاجر جايب منه بضاعة
وبعد سؤال المشتبه فيهم قال المقدم فضة:
-شىء محير جدا جنابك
كلهم مش صادقين 00انا احساسى بيقول كده
-عندك حق لكن انا عرفت القاتل00فكر شويه يافضة


الى اللقاء فى الحلقة القادمه ولغز جديد مع حل لغز مقتل الراقصه




خـــــــــــــاص بـمـنـتـــــدى مـــصـــــــر مـــوتـــــــــــــــورز و غير مسموح بالنقل او الأقتباس الا عن طريق استئذان كاتب الموضوع ..... و كاتب هذا الموضوع له حق امام الله لو تم نقل او اقتباس الموضوع بدون معرفته ..... و لكم جزيل الشكر ,,,,