المقالة ( 20 )
سياسة ولعها ولعها (2 )
من قلب الأحداث
ولقيت نفسى قاعد فى البيت زى الولايا .....و فاضى ولاشغلة ولامشغلة ..... وقناة الجزيرة كل شوية جايبة اخباااااار وصور وتحليلات ....ومولعينها حريقة ....وقناة النيل فرسونى ونازلين رغى على لبنان وكأننا معندناش حاجة
قلت ياواد انزل من البيت شوف بنفسك ايه اللى بيحصل
واهو...... لو جات فيك طوبة والا حديدة اهو تربط دماغك وتعمل فيها بطل قومى يمكن يعملولك تمثال فى وسط الشارع عندكو
وقلت خد مواقع الأحداث من اولها
ونزلت من البيت الساعة 5 قبل المغرب
واخدت الطريق الدائرى من مدينة السلام حتى مخرج ميدان لبنان ونزلت منطقة المهندسين كلها
ومفيش ولاحاجة ....
الطريق الدائرى فاضى لدرجة انى وصلت المهندسين فى اقل من تلت ساعة
وقلت ياواد دول اولاد ذوات واخرهم واحد شيشة تفاحة بعد المظاهرة واسمهم عملو اللى عليهم
وقلت انزل على المناطق الاكثر سخونة وركبت امتداد كوبرى 15 مايو من المهندسين ومفيش ولاحاجة حتى عبرت النيل والكوبرى له مخرجين بعد النيل واحد مؤدى الى ميدان التحرير ولمحته بعينى فاضى فكملت على الكوبرى على شارع 26 يوليو ولمحت الطريق واقف وعساكر كتير واقفة بالمدافع
وقلت فى بالى / قشطة يا ابو خالد المعمعة بدأت والجزيرة عندهم حق والتليفزيون بتاعنا بيهرج
وروحت داخل وسطهم بالعربية ولقيت طوبة نزلت قدام العربية وزجاج مكسر بينزل من اماكن متفرقة
والعسكرى اللى كان واقف جنب العربية بالمصادفة .....راح ضارب كام طلقة فى الهوا جنبى
وقلت / حلو...... اهى هتولع اهى
وبضرب بعينى .....وصعقت
ويالخـيـبة الأمل اللى راكبة 140 جمل
دى مظاهرة كل اللى فيها حوالى 20 او 30 واحد وشارع 26 يوليو فاااااااااااااااااضى خالص بعد كده
وقلت ياواد مينفعش كده
فنزلت من الكوبرى ولفيت عكس الاتجاه تحت الكوبرى ولقيت أثار طوب مكسر كتير ووصلت الكورنيش والدنيا فاضية ورجعت من امام مبنى التليفزيون
وجدت امام مبنى التليفزيون كمية جنود رهيبة ولكن ولاحاجة بعد كده
واتغظت وكملت حتى ميدان عبد المنعم رياض ولم اجد شىء ثم وجدت كمية جنود اخرى رهيبة امام المتحف المصرى...... وميدان التحرير هاااااااااااااااااااااااا اااااادى
يادى النيلة السودة ...... اومال الحريقة اللى مولعاها قناة الجزيرة وقناة العربية دى تبقى فين ؟؟؟؟؟؟؟؟
وكنت هركب كوبرى اكتوبر من غيظى لكن لمحت تجمهر فى اول شارع رمسيس عند الرواس كده يعنى قبل نقابة المحامين وميدان الاسعاف بحوالى 200 متر
فغيرت رأيى وقررت الدخول وسط هذا التجمهر
ولأجل القدر.....سواق تاكسى بارد وقف يركب زبون وانا بعد منه بحوالى 3 سيارات ووجدت نفسى واقف بسيارتى وسط هذا التجمهـر واعصابى تلفت خوفا على السيارة لكن فكرت بسرعة وقلت دول عايزين رجال الشرطة .........مش عايزيننى انا
ووجدتهم حوالى 30 او 40 واحد وطبعا فيهم كام واحد مباحث اكيد علشان يـشتـتـو تفكيرهم
وقد كان
واحد منهم / يالا نروح على القصر العينى
التانى / الدنيا مقـفـولة....هنروح ازاى؟؟؟؟
التالت / نطلع على مبنى المحافظة
وابتدو يتـفـقـو
لكن طلع واحد رابع وقال / لأ خلينا هنا
وبدأو يتناقشو من جديد
وفهمت ان هذا الرابع احد رجال المباحث يؤدى دوره فى تعطيلهم مكانهم اطول وقت ممكن
وافقت من تفكيرى ومن الفرجة على هؤلاء على صوت كلاكسات السيارات خلفى
سواق التاكسى مشى بعد م أخد الزبون وانا م أخدتش بالى
واتـــفـرسـت
اومال ايه الحريقة اللى مولعاها قنوات الجزيرة والعربية دول ؟؟؟؟
ومشيت باتجاه ميدان الاسعاف وأبطات السرعة امام نقابة المحامين فهى قبل دار القضاء العالى وميدان الاسعاف
ووجدت حوالى 200 واحد واقفين داخل سور النقابة بيغنو .....بلادى...... بلادى بلااااااادى ........ لك حبى وفؤادى
أيه ده ؟؟؟؟ هو طابور الصباح فى المدرسة ؟؟؟؟؟
ومن خارج النقابة حوالى عدد من الجنود يساوى 3 اضعاف هؤلاء وشارع رمسيس المرور فيه جميييل حتى انى نسيت نفسى بعد عبورى المناطق اللى مفروض انها ملتهبة وتجاوزت سرعتى من ميدان الاسعاف وحتى غمرة ال 100 كيلو فى الساعة مرورا باشارات احمد عرابى وعماد الدين وميدان رمسيس وغمرة حتى وصلت شارع مصر والسودان بلا اى مشاكل
اومال ايه الحريقة اللى عاملاها قناة الجزيرة وقناة العربية ؟؟؟
ايه النصب الاعلامى ده
ده انا كنت خايف اخرج من البيت ...... وغيرى كده كتـير .....ووالدى نفسه فتح تحقيق معايا واضطررت للكذب عليه وفهمته انى رايح عين شمس بعيد عن الأحداث خالص علشان يوافق انى اخرج من غير زعل
وانا اللى كنت معـشـم نفسى بحـبـسة جـديـدة
للاسف الحكومة نجحت يارجالة .........والأمل فى الله أولا ثم يوم الجمعة ثانيا
لان المنظر اللى شفته يقول ان بكرة سيكون أهدأ نسبيا من اليوم والمسألة مسألة وقت فقط
لا اله الا الله