الحـادثـة ( 2)
مواقـف وطرائــف
النباتشى
بالطبع داخل الحجز حين يدخل أى شخص جديد يذهب اليه الشخص المسئول عن الحجز وهو اقدم متهم موجود وغالبا مايكون مجرما من عتاةالمجرمين (سوابق )ويسمى النباتشى
وجائنى شخص اسمه ابراهيم سنه لايزيد عن 30 او 32 سنة
حمدا لله على السلامة
الله يسلمك
جاى فى ايه ؟؟؟؟؟؟؟
فى عربيتى
هههههههههه كويسة ...... ده انت طلعت قديم اهو ...........مع ان شكلك يقول انك زعنفة
( يعنى شخص عادى مش مجرم باعتبار المجرمين حيتان واحنا مجرد زعانف جنبهم)
ربنا يخليك
المهم يا أخو (يا أخى بس بـ ....لغة تجار المخدرات )
أؤمر
قدر تـتـقـدر
عينى (وطلعت من جيبى 50 جنيه )
اخدها وقال / دى تنومك على الأرض فى مكان مميز
والنومة على المصطبة دى (عدة مصاطب مصفوفة حول الغرفة)
آه تقصد المصلب؟؟؟ ( المصطبة اسمها كده)
ايوه بكام دى
دى هتكلفك شوية ؟؟؟؟
كام يعنى
150 جنيه م ينقصوش شلن
كتير أوى
وغلاوتك دى للناس المميزين بس وبعدين هعمل لك جنبها حاجات تانية خدمة ليك من عندى
اوفرز يعنى ؟؟؟؟
يعنى ايه اوفرز ؟؟؟
ههههههههههه عروض خاصة
هههههههه احبك ياعمنا ....حاجة زى كده شكلنا هنبقى اصحاب
نـتـنور بيك ياعم ابراهيم
ده انا اللى اتنورت بيك ..... اتعشيت ؟؟؟
مليش نفس
والله لايمكن .....لازم تاكل ...
ماشى ياعم ابراهيم
واثناء الأكل اللى جابه
مقلتليش
اؤمرنى
انت جاى فى ايه ؟؟؟
خبطت واحد بعربيتى ومات
ولايهمك فيها سنة مع الشغل ... السجن للرجالة برضه
فى بالى / الله يموع نفسك يابعيد
ثم قلت له / ياراجل فال الله ولا فالك
ياعم ده قتل خطأ والقاضى لو طلع كريم هيرزعك السنة
ولو طلع بخيل ؟؟؟؟؟؟
هيديك 3 سنين
الحمد لله ....سفرة دايمة
مكملتش أكل ليه ؟؟؟
كلامك شبعنى
ههههههههههه ياراجل انت جاى ف قتل خطأ وزعلان؟؟؟؟؟ ده انا من سنة 1985 وانا بتحبس ....اصل انا عقباوى
ليه عندك كام سنة ؟؟؟؟ وعقباوى يعنى أيه ؟؟؟؟
ههههههههه مش بقول لك زعنفة ........ انا عندى 37 سنة وعقباوى يعنى مؤسسجى يعنى خريج مؤسسة الأحداث
ماشى ياعم ....آدى 150 جنيه ....... هنام فين؟؟؟؟
وعلى الفور انـتـفـض واقــفـا
ثم جرى على احد النائمين
وقال / قوم ياد يابن كذا
وراح موقعه على الأرض واخد منه البطانية واداها..لى وفرشهالى علشانى انام عليها وادانى بطانية اتغطى بيها وجاب لى مخدة
وقال / أى خدمة ياباشا........ شفت الزيادات ؟؟؟؟؟
فين دى ؟؟؟؟
البطانيتين والمخدة والعشا..... ههههههههههه
لا ياشيخ ... عموما ماشى
ونمت
كان ابراهيم قليل الكلام معنا ولايختلط بنا كثيرا وكل فترة ليست قصيرة يقوم من مكانه ليختلط بواحد مننا ويهزر معاه هزار خفيف لايزيد عن 30 ثانية ثم يعود مرة أخرى
ومع الوقت اصبح شبه صديق لى
فهو ليس صديقا لأحد لكى لايعشم احد فيه
فهو راجل يصرف على عائلته من داخل السجن
ازاى ياعم ابراهيم
شوف ......انا باخد من كل واحد داخل هنا مبلغ وبنومه على أد مبلغه ولو مدفعش حاجة بنومه جنب دورة المياه وبقرفه وازنقه فى النومة على الارض
وبعدين ؟؟؟؟
ببعت الفلوس لمراتى تشترى بيهم برشام
باستهبال / برشام ليه ؟؟؟ هو انت عيان؟؟؟
ايه ياعم انت ؟؟؟ برشام ...برشام ....برشاااااااااااااااام
باستعباط اكتر من الأول / م انا فاهم انه برشام .... سلامتك عندك ايه؟؟؟
ياعم انت هتجننى ؟؟؟ برشام علشان المزاج
مزاج؟؟؟؟ ونوعه ايه بتاع المزاج ده
الصراصير والفراولة والازرق والاحمر والبنى
باستعباط كاد يؤدى الى خناقة حامية / حيلك حيلك ؟؟؟ انواع البرشام دى تيجى من عند الفكهانى ماعد الصراصير دى مالية اى بلاعة
بابتسامة تخفى ورائها غيظ كبير / وانا اللى قلت عليك قديم ومعلم الصراصير دى برشام اسمه باركينول بس هو شبه الصرصار
باستهبال اكبر / هو ليه شنب و..رجلين زى الصرصار
احمر وجهه وكاد ان يخنقنى وقال / شنب ؟؟؟ ورجلين ؟؟؟انت بتهزر بقى ؟؟؟
لأ... بهرج
كنت فاكرك بتهزر
وايه بقى باقى الانواع؟
مش مهم بقى علشان لو كملت معاك كلام هتـنـقـطـنى ... وانا شايل المرارة قبل كده
ماشى ياعم .... هتسيبنى جاهل كده ؟؟؟؟
ضحك وقال / بكره تاخد الأعدادية .....هههههههههههه
خلاص اجيلك بكرة انا هروح فين؟؟؟ ادينى قاعد ؟؟؟
انا همشى قبل م تفرسنى
استنى بس ... وبتعمل ايه بالبرشام
بلفه ف كيس صغير وببلعه
وبعدين
بهربه للسجن
وهناك بحط صباعى جوه بؤى وارجع .... فينزل الكيس
وليه البهدلة دى
قرص الصراصير ب 5 جنيه وقرص الاحمر او الأزرق ب10 جنيه
ليه يعنى ؟؟؟؟؟؟؟؟؟ ده العلبة كلها .......
قاطعنى
الحاجات دى نازلة جدول المخدرات وممنوع بيعها واحنا بنجيبها غالية ونهربها ونبيعها جوه
ودى بتعمل ايه ؟؟؟؟
غيبوبة .............هههههههههههه هههه ..... انا همشى قبل م تـنقطنى
ماشى ياعم
ومشى
واى مسجون نازل من السجن له اهميته واى مكان مريح لازم يوسعوه ليه لان الراجل جاى من رحلة شاقة من السجن الى التخشيبة الى القسم وهى تأخذ حوالى 13 ساعة مرهقين
ويتم تجهيز اكل له غالبا........ لايزيد عن الجبنة البيضا والجبنة النستو
ثم يمشى ابراهيم الى السجن ويتولى المسئولية اقدم مجرم وكان واحد اسمه محمود
وهو شخصية لاتقل سوءا عن ابراهيم سوى انه عين مساعدا له يتولى كل كبيرة صغيرة وحين تحتدم المناقشات بين مساعده والمحابـيـس كان يظهر محمود فى الصور ويصدر فرمانا بوقف هذه المهزلة
واكتسبت صداقة مساعده واقنعته بالصلاة
وحين صلى معنا
قال له محمود بلهجة حادة / انت اتعلمت الصلاة ؟؟؟؟ آدى دقنى لو فلحت .... بكرة يصعبو عليك ومتاخدش حاجة منهم وناكل طوب
وفعلا بطل صلاة
..........شىء عجيب.............
وكان يتم تنظيف الحجز يوميا بالفنيك والأريال ثم يتم جمع سيجارتين من كل شخص فى الحجز لمن قامو بالمسح
وكنت ادفع اى فكة لانى لا أدخن .... ربع جنيه او نص جنيه........ أى حاجة وأحيان لا ادفع لانى ليس معى فكة وكان يطنش حتى لايحرجنى ...لانه لايتهاون فى موضوع السيجارتين ابدا
واذا جاءت زيارة لاى فرد كان يفرض ضريبة علبة سجاير وانا كنت ادفع 5 جنيه بديلة لها
ثم لايشاركه الطعام ابدا حتى لاتصير صداقة بينهما ويعشم ايضا
وكان يقول قولته المأثورة (اللى يصعب عليك يفـقـرك) كلام فارغ طبعا
ثم رحل الى السجن
وجاء مكانه سامى
وهو حرامى ملابس وله شركاء
فهو يصطاد اى كرتونة على الارض بشارع الأزهر او حمام الثلاثاءوبها ملابس غـفـل عنها صاحبها فيرميها فى السيارة المملوكة له هو وعصابته وتمشى السيارة ثم يلحق بها فيما بعد ويلتفت صاحبها فلايجدها
وسامى هذا كان ديموقراطيا فكان كل شىء عنده يخضع للمناقشة والحوار
ولاننا شعب غير معتاد على الديموقراطية فكانت له مشاكل كثيرة وكان الناتج ان ضرب احده الأفراد وفتح شفته وعوره وانفجر الدم كما النافورة واستغـثـنا بالضابط النباتشى وكانت ليلة سودا
ثم ذهب سامى وجاء ناصر وهو شخصية سيئة جداااااااااا
وخرجت وتركته
ومن أقواله الماثورة
(المنغلقين اللى زى خالد دول هما اللى هيرجعونا لعهود الظلام وهيجيبونا ورا )
كان يقولها دائما
وكان حين تكون غزالته رايقة كان يهرج معى ويقول يامنغلق
ههههههههههه
اما امبريالى مستبد صحيح