المشاركة الأصلية كتبت بواسطة mmffor
موضوع شيق و متميز
اعتقد صاحب الموضوع مهندس؟
|
إيه ده؟؟؟ هو باين قوي كده؟؟؟
عايز أقوللك إن حبي للسيارات هو اللي خلاني أدخل هندسة
المهم.... المشكلة في ثبات العربيات هي التحكم في الوزن، ومشاكل ثبات العربيات ما بتبانش إلا لما بنغير اتجاهنا، في الملفات أو في الغرز، أصل طول ما احنا ماشيين في خط مستقيم.. كل العربيات تقريبا معندهاش مشكلة في الثبات.
المعروف إن الكتلة ما بتميلش إنها تغير حالتها (إيه الكلام الصعب ده؟؟) يعني لو الكتلة واقفة لازم يبقى فيه قوة تحركها، ولو هي متحركة لازم يبقى فيه قوة توقفها، مش بس كده، ده لازم يبقى فيه قوة عشان تغير اتجاهها
الموضوع ده بنحسه واحنا راكبين العربية، لما بنفرمل أجسامنا بتحدف لقدام عشان أجسامنا بتبقى عايزة تكمل بنفس السرعة اللي كنا ماشيين بيها، ولما بندخل ملف أجسامنا بتحدف لبرة الملف، عشان أجسامنا بتبقى عايزة تكمل في نفس الاتجاه اللي كنا ماشيين فيه.
الكلام ده بيسموه "عزم القصور الذاتي"
طب دي أجسامنا، أمال العربية ما بتعملش كده ليه؟؟
في الحقيقة العربيات (وأي جسم متحرك) زينا بالضبط (دي حقيقة فيزيائية) وده بيبان في درجة ميل العربية عند الفرامل أو في الملفات، ودرجة الميل دي بتزيد بدرجة كبيرة أوي مع زيادة السرعة، ويا سلام بقى لو الوزن تقيل...صباح الحوادث... (مش عايز أجيب معادلات عشان دمي ما يبقاش تقيل)... شوف الصورة دي كده:
Effect of Speed on Centrifugal Force1.gif
طب ده إيه علاقته بالكلام اللي اتقال قبل كده؟؟
ارتقاع مركز الثقل عامل مؤثر جدا في موضوع درجة ميل السيارة، وعشان أوضح أكتر: جرب تمسك شاكوش من آخر العصاية الخشب بتاعته (بيعيد عن الراس الحديد) وحركه يمين وشمال، وبعدين امسكه تاني بس من عند الراس وحركه يمين وشمال.....
في الأول حتحس إن السيطرة عليه صعبة وإيدك لازم تمسكه كويس... وفي المرة التانية حتلاقي الموضوع سهل قوي
هي دي باختصار المشكلة كلها، المسافة بين مركز الثقل (راس الشاكوش) عن الأرض (إيدك) بتعمل عزم كبير محتاج قوة كبيرة عشان تسيطر على الوزن ده. ولو وصلت زاوية ميل مركز الثقل لدرجة معينة (بيسموها نقطة الانقلاب) العربية بتقلب علطول.
شوف الصور دي:
CG effect & Roll-over 1.gif
Effect of Weight-Height & Roll-over1.gif
Effect of Weight-Height & Roll-over 2.gif
Effect of Weight-Height & Roll-over 3.gif
يبقى دلوقتي قدامنا حل من اتنين
- يا إما نحاول ننزل بمركز الثقل في العربية لتحت
- يا إما نزود القوة إللي بتسيطر على مركز الثقل عشان ما يوصلش لنقطة الانقلاب
كفاية كده عشان ما أنا حاسس إن التركيز قل
وحنكمل بعدين.....