[حازم فخرى]

مساء الفل يا هبة .. أنا برضة من رأيك إن الواحد في مصر وزحمتها لازم يركب هايدروماتك .. خاصة لو مكان العمل بعيد زيك .. أنا كمان عملي يبعد 40 كم عن بيتي وكان عندي لانوس 99 هايدروماتيك مستعملة ولا أحب المانيوال .. وبعتها بعد ماصرفت عليها أكثر من 20000 جنية في 6 سنوات ده غير البنزين يعني في الشهر 333 جنية وحطي عليهم 600 جنيه بنزين في الشهر يعني قربت من 1000 جنية .. أنا مش بخيل والله بس أنا كنت بكتب كل حاجة بصرفها وعملتها في حياتي علشان أعرف آنا عايش إزاي .. يعني لو كنت إشتريت جديد ودفعت أقساط شهرية كان هيبقي أحسن بكتير من البهدلة عند الميكانيكية .. وأشتريت سبرانزا A620 أتوماتيك موديل 2007 بعد تفكير شهور كتير وتردد .. بصراحة بسم الله ماشاء الله كإنك راكبة مرسيدس .. وما شوفتش حد من أصحابي إللي راكب صيني إشتكى من الصيني .. وقطع غيار الصيني متوفر في كل مكان وكل الميكانيكية بيفهموا في الصيني زي أي عربية .. أنا مش بقولك كدة علشان تشتري صيني .. طبعا براحتك .. بس أنا بطمن كل إللي عايز يشتري سيارة صيني وخايف وأنا شخصيا بروح لميكانيكي مش مركز صيانة .. لإن مع الميكانيكي الواحد بيشوف ويتابع كل حاجة بعنيه وبيشتري قطع الغيار بنفسه من المكان اللي يعجبه .. ده رأي الشخصي .. معلش أنا بعدتك عن موضوعك شوية .
رأي يا هبة إنك تشتري سيارة جديدة ومش لازم تكون كبيرة قوي يعني ممكن تكون هاتش باك مثل سوزوكي ألتو هايدروماتيك وبالنسبة لبقية سعرها ممكن تقسطيها أحسن بكتير من المستعمل .. لإن محدش بيبيع عربيته إلا إذا كانت تعبته أو فعلا كان محافظ عليها ودي صعب تلاقيها بسهوله .. والألتو سيارة مناسبة جدا للسيدات في حجمها وإستهلاك البنزين والراحة وسهولة الركنة وهي أصغر من السيفيا بس الفرق في الزيرو .. ومش لازم الألتو بالذات أنا بأعطيكي مثال وأنا كان عندي سوزوكي ماروتي زيرو وفضلت معي 8 سنوات بصراحة كنت مبسوط جدا ومريحاني جدا وسريعة وموفرة في البنزين بس للأسف مافهاش أتوماتيك .. فخليكي أحسن في الجديد وسيبك بقى من المستعمل ومشاكله ومفاجآت أعطاله التي لا تنتهي .. والبتوفيق .. والسلام ختام