[خالدخليفة]

المشاركة الأصلية كتبت بواسطة lol64 انا هاحكى على موقف حصل لى وانا راجع من الغردقه على القاهره (اجازه) تقريبا اللى انا فاكره ان كنت سايق مابين راس غارب والزعفرانه وانا سواقتى كلها بالليل ولقيت واحد واقف على الطريق وبيشاور والجو كان برد تلج فى الوقت ده قلت اخده معايا وسالته رايح فين قاللى السويس وحط شنطه هادنباج على الكنبه الورانيه وركب جنبى وسالته قاللى انه مجند ونازل اجازه وبعد حوالى 50 او 60 كيلو قلتله انا مزنوق مش قادر ونزلت من العربيه ودقيقتين ورجعت وكنت مشغل الانتظار وركبت تانى ابص جنبى مش موجود ذهلت وبصيت على شنطته ورا مافيش ونزلت تانى انده فى الصحرا وفى الضلمه مافيش وقعدت فى العربيه مذهول وجريت بالعربيه بسرعه والله ام احفظنا وده كان موقف صعب جدا واول مره اتعرض لحاجه من دى عموما سكه الزعفرانه دى مشهوره بحاجات من النوع ده كتير من حكاوى اصحابى فى الشغل

كويس انك قلت الموقف ده ادامى
فى الطرق السريعة علشان تركب حد
اولا لازم يكون اول واحد شخصيته معروفة ظابط جيش او شرطة /امين شرطة/ عسكرى لابس ميرى / غير كده سيبهم لبتوع النقل يركبوهم لان النقل بيخليهم ينطو فى الصندوق يعنى مفيش خطر عليه هو نفسه بيقفل الكابينة ويركبهم
ثانيا اى شاب وانا بقول شاب او راجل كبير او اى حد او بنت او ست طالما معاه شنطة او شوال او اى حاجة متركبوش
طبب ليــــــــه
لان الكارثة غالبا فى الشنطة دى
اما مخدرات وواخدك انت توصيلة علشان يعدى من الكماين و فى اقرب كمين لو حصل تفتيش لاقدر الله هينكر تماما ان دى شنطته والظابط مستحيل هيصدق غير عينيه يعنى دى بتاعة صاحب العربية مش حد تانى
و ده كلام حصل بس مش معايا قال عليه ظابط مباحث ركبته مرة معايا لما لاحظ انى بركب اى حد من غير تمييز فحكى لى الآتى
1 / جماعة اجرو بيجو مخصوص وطلعو بيه من اسكندرية وكان معاهم شنطة رموها تحت كرسى السواق لانهم قاعدين وراه وفى كمين ايتاى البارود العربية اتفتشت فلقو الشنطة صاحب العربية قال معرفش حاجة والناس دى قالت احنا ركاب عاديين ومعندناش فكرة عن الشنطة دى والمعلم انطس 5 سنين
2/ سواق نص نقل طلعو عليه جماعة بالسلاح وقالو له ودينا لحد كوم حمادة
وهننقل شوالين المخدرات دول معاك و فى اقرب كمين هتهيص هنقول مش بتوعنا الظابط بيقول لى الواد طلع جدع وراح داخل على الحواجز بتاعة الكمين وفتح الباب ورمى نفسه وصرخ الحقووووونى
بيقول لما دخل علينا بالعربيه ده طبعا اقتحام كمين وكلنا سحبنا الاسلحة والناس اللى معاه جريو وهو فضل يصرخ واحنا جرينا وراهم جبناهم
وانا شخصيا جاى من المنصورة 2 بالليل وعند ميت غمر كده لقيت واحدة خرجت من وسط الشجر فى الجزيرة اللى فى النص ورمت نفسها ادام العربية وراحت رامية نفسها بعيد عنى وكنت هقف لان ممكن تكون عندها حد عيان وعايز يروح مستشفى او حاجة ومش لاقية مواصلات وفكرت لثوانى بسرعة وبعد م وقفت بعيد عنها بضرب عينى على يمينى لقيت ناس طالعة من الغيطان ومعاهم شوم ودوست بنزين وجريت طب ده على الطرق الزراعيه فمبالك بالطرق الصحراوية وغيرها
واما موضوع العسكرى ده غالبا كان عايز يسرق حاجة وملقاش حاجة تستاهل او سرق حاجة وانت م اخدتش بالك