[ESL NSR]

المشاركة الأصلية كتبت بواسطة corsair حبيت اني اخدم اعضاء المنتدي الجميل ده بشوية نصايح ومعلومات ممكن تفيدة قبل ما يروح يشتري عربية مستعملة علشان بجد النصب دلوقتي بقا للركب 1:اول حاجه تعملها صلى ركعتين لله قبل ماتنزل وادعى ربنا يكرمك 2:حاول تاخد معاك مبلغ صغير تربط بيه كلام عشان ماينفعش تخرج عربيه من السوق الا لما تكتب عقد ابتدائى وده بعد ما العربيه تعجبك وحاول تخبى المبلغ ده كويس عشان لاقدر الله السرقه 3:حاول تاخد لفه تمام ولو عجبتك حاجه برضه لف تانى عشان هاتسمع اسعار مختلفه 4:لو عايز تعرف العربيه بتاعت تاجر ولا خرج بيت (يعنى من مالكها) اساله رخصه ولا توكيل لو قالك رخصه تبقى العربيه بيتى لو توكيل اعرف انه تاجر وده عشان التسجيل بيبقى غالى والتوكيل ارخص فالتاجر بيعمل توكيل ويبيع بيه 5:التجار بيبقى ليهم شكل مميز ولغه مميزه مثلا هاتلاقيه لابس طاقية الصيادين وليهم الفاظ مميزه مثلا (ياباشا الاتومبيل ده ايه وان مافيهوش كلمه) (ياباشا العربيه دى دواخلها الماظ) (بص ياباشا انا هاقولك ناهيتها) وشوية كلام تانى وعايز اوضح حاجه مش معنى كلامى ان التجار كلهم نصابين فى منهم كويس بس انا شخصيا مش بثق فى التعامل معاهم عشان بيبقى فى عربيات متبهدله وبيشدوها شده محترمه فانتا لو عايز تاخد من تاجر هات معاك عوكل الجن يتفرج على العربيه 6:وانت فى السوق اول ماتقرب على عربيه هتلاقى اتنين تلاته جم جنبك والاشتغالات تبتدى ودول اغلبهم بيكون تجار لو العربيه عجبته هتلاقيه بيقولك (يالهوى العربيه مغيره عربيه)سيبك منه طبعا انتا ليك نظره ولو عايز يطمعك فيها هايقولك(العربيه دواخل الماظ)برضه سيبك منه وممكن تلاقيه بعد مانتا تسمع السعر ويعجبك مثلا 30000 تلاقيه يقول لصاحب العربيه انا هاخلص ب30500 طبعا انتا العربيه عجبتك فهتدفع اكتر وفى الاخر تكتشف ان الى قال السعر ده مع صاحب العربيه (قديمه) 7:لو نازل لوحدك ماتخليش نضافة العربيه من بره تخدعك تلاقيها مش مكلفاه عشين جنيه تمن الكومبوند(ملمع السيارات)وماتخليش نضافة الحوض يخدعك بيتغسل وبيرجع جديد وده بتعرفه من ريحة الجاز اهم حاجه بص على اساسيات العربيه وماتسمعش كلام الى يقولك وحياة عيالى يارب اعدمهم يارب مااوعى اروحلهم العربيه دى ماتلمست من جوه انتا الى هاتشترى فانتا الى تحكم وخلى بالك اسهل حاجه ممكن يتلعب فيها عداد الكيلومتر اوعى تتخدع بانه قليل وفى ناس بتقلله 8:عند حرف الباب من جوه بيبقى فى برشام عامل زى السيليكون ده الفابريقه بيحطوه عشان المياه لو البرشام ده مفرقع تعرف ان الباب اتخبط لان البرشام ده استحاله يرجع زى الاول ودى طريقه سهله مش محتاجه صنعه والبرشام ده بيكون على حرف الابواب الاربعه وكمان الشنطه والكبوت 9:وانتا بتفتح الكبوت حسيت انه تقيل زياده عن اللزوم اعرف ان الكبوت ده اترش والتقل ده بيكون من المعجون 10:امسك خرطوم الفايز بتاع الموتور وخلى حد يزود لو خرج دخان ابيض يبقى الموتور خفيف واخيرا ياجماعه اى حاجه بقى ليها علاج يعنى دلوقتى العربيه لو مقلوبه ورشت دواخل بيدعكوا دواخلها بعد ماتترش ببطاس عشان يكوى ومايبانش انها ادهنت فخلى باللك واتفرج عالعربيه الف مره وبلاش تثق فى البنزينه

على رأي بنداري ... أستاااااااااااااااااااااا ذptmnlo123per193 ...
كروسير أصلي مصري، أم الأجنبي ptmnlo123per122 ...
وضيف على الكلمتين الحلوين دول المشاركة الجامدة دي :

المشاركة الأصلية كتبت بواسطة hossamhussein0 مظبوط كلامكم كله ،،، السوق نصب كثير و بهدله اكثر و معظمه تجار × تجار و الزبائن الحقيقيين لا تتعدي نسبتهم 5% من المتواجدين و المشكلة الحقيقية إن التجار جشعين جدا جدا جدا فعندما تشتري يمنحوك احساس انك هتشتري قطعة الماظ و الجميع يتهافتون عليها وان ما فيش اختها ثاني و في الغالب بتكون مشغولة و زي ازفت بس البودي بيلمع و نظيفة من جوه و يقعد يحلف لك أن كان هوه طالب 50000 ج مثلا ان جاله 49000 ج و رفض (ده علشان يربط دماغك و يفهمك انه ما فيش فصال) و لما تييجي تبيع و انت عارف ان عربيتك زي الفل و فبريكة و بحالة ممتازة و كمان انت علي درايه بسعرها في السوق (الوسيط و الاعلانات المنافسة ) يقولو لك ان السوق مريح و لسه شاري واحدة من يومين بنصف الثمن و حالتها احسن من عربيتك و ماحدث بيشتري بالاسعار دي و ان قدامه واحدة 100% بتاعت مستشار و ارخص من عربيتك و يبعت لك واحد و اثنين و ثلاثة من صبيانه يسمعوك أسعر تخليك تتجنن و بعدين لما تزهق فعلا و تحس انها مش هتجيب اكثر من كده ييجي هوه بعرضه اللي لازم يكون أقل من سعرها بخمسة الاف جنيه علي الاقل (لسيارة قيمتها من 40 الي 50 الف) و ساعتها ممكن البائع يضعف وده حصل معايا شخصيا بعت سيارة بـ 31 الف و في الاسبوع التالي مباشرة كان بيبيعها و مش عاوز ينزل عن 38 الف جنيه واحد و فيه وسيلة نصب ثانية ،،، يتعامل معاك علي انه زبون و مش فاهم في العربيات خالص و لو انك مثلا كنت طالب 30 الف في عربيتك يعرض عليك 27 الف و يتحايل عليك علشان دي كل امكانياته وه شاريها من وشك و انت و تحت ذلك الالحاح وافقت و قولت في بالك (مش مشكلة و ربنا يعوض عليه في الفرق) يطلب منك الخروج معه بالسيارة من السوق للذهاب للكشف علي السيارة في بنزينة قريبة ،،، و بعد ما تخرج من السوق و يضمن ذلك يبدأ في شغل التلكيك ( ده فيه خبطة في العفشة ، ده الموتور تعبان ، العربية بتطقطق ،،، ) و يقعد يغني عليك و يكون مربط مع واد صايعي في البنزينة يشرك العربية خاصة الموتور و العفشة و في النهاية ترسي علي 22 - 23 ألف و ساعتها بتكون علي اخرك و كرهت العربية و كل الناس عيبولك فيها حتي البنزينة

كلام م الآخر فعلاً المشاركتين دول اختصروا سوق العربيات في مصر وطرق التجار الكتيرة للنصب على الزبون الي مهما كان ناصح فمش هيبأة أنصح من دول الي هي مهنتهم وبايتين في السوق ليل نهار بيتفننوا كل يوم والتاني في النصب ع الناس وهنقول إيه غير حسبي الله ونعم الوكيل ...